Achoŭniku ŭ Chojnikach dapamoh adbicca ad vaŭka rolik u TikTok. Milicyjaniery zastrelili drapiežnika z vośmaha razu
Padčas napadu mužčyna raptam uspomniŭ videa, jakoje niadaŭna trapiłasia ŭ rekamiendacyjach, i heta, mahčyma, vyratavała jamu žyćcio.
Voŭk napaŭ na vartaŭnika fiermierskaj haspadarki ŭ Chojnickim rajonie 26 listapada. Žyviolina pakusała Michaiłu Tarasienku ruki, učapiłasia ŭ nahu, ale vartaŭnik zmoh adbicca i schavacca ŭ bytoŭcy.
Sam Michaił raskazaŭ «Anłajnieru», što dziejničaŭ intuityŭna.
«Usio adbyłosia, moža, za jakuju chvilinu. Było jašče ciomna, kala piataj ranicy, kali ja pačuŭ brech sabak i vyrašyŭ vyjści na vulicu pahladzieć, što tam adbyvajecca. Adčyniŭ dźviery — i ŭsio, što paśpieŭ zaŭvažyć, heta sabak, jakija raźbiahajucca, i vaŭka, jaki lacić da mianie. Jon schapiŭ mianie za nahu, ja pasprabavaŭ razadrać jamu pašču, usunuŭ tudy kułak i ŭ vyniku adbiŭsia. Zabieh u bytoŭku, padpior dźviery i nabraŭ pieršy numar u mabilnym — heta byŭ numar žonki Natašy», — uspomniŭ Michaił.
Žonka adrazu zrazumieła, što zdaryłasia biada: raniej muž nie telefanavaŭ joj tak rana.
«Jon mnie nikoli ŭ taki čas nie telefanavaŭ, a tut čuju: «Mianie pakusaŭ voŭk, vyklič chutkuju i MNS» — i ŭsio, na hetym jaho hołas abarvaŭsia. U mianie pačałasia poŭnaja isteryka, šok. Usio, što ja paśpieła ŭ jaho spytać, ci žyvy jon. Užo potym Miša mnie raskazaŭ, što nie moh sa mnoj havaryć, tamu što źvier kidaŭsia na dźviery vartoŭni, a jon ich trymaŭ, ściakajučy kryvioj», — raskazała Natalla.
Jana patelefanavała susiedu, a toj nabraŭ numary milicyi, chutkaj i ahulnaha znajomaha Leanida. Siabar, praŭda, adrazu vyjechać na miesca zdareńnia nie zmoh: vyjšaŭšy na vulicu, jon pabačyŭ kala mašyny jašče troch vaŭkoŭ.
Paźniej Leanid usio ž zmoh dabracca da fiermy. Jon patelefanavaŭ Natalli i paviedamiŭ, što jaje muž žyvy, ale ściakaje kryvioj. A vaŭka zastrelili milicyjaniery — atrymałasia daloka nie ź pieršaha patrona.
«Mišu ja pabačyła ŭžo ŭ balnicy. Jon kazaŭ, što milicyja pryjechała pieršaj, i voŭk staŭ kidacca na kiroŭcu «uazika». Tolki z vośmaha patrona zabili taho vaŭka, i tolki potym da Mišy zmahli padstupicca miedyki», — adznačyła Natalla.
A jašče jana ŭspomniła cikavy momant: vyratavać žyćcio jaje mužu moh rolik u TikTok.
«Niezadoŭha da hetaha Miša mnie raskazvaŭ, što bačyŭ u TikTok rolik pra toje, što rabić pry napadzie drapiežnika, i, kali ŭsio zdaryłasia, jon pryznaŭsia, što na siekundu ŭspomniŭ hety rolik i zrabiŭ usio tak, jak tam havaryłasia», — raskazała Natalla.
Analizy zaśviedčyli, što voŭk byŭ chvory na šalenstva. Ciapier Michaił prachodzić terapiju: jamu pastavili ŭkoły vakoł rany, u vienu i pad łapatku. Prahnozaŭ pa vypiscy daktary pakul nie dajuć.
Kamientary
Vierojatno vsio žie on strielał iz rużja kartieċju. Nie dumaju, čto u nieho był pistolet ili tiem boleje korotkostvolnyj avtomat. Ni to, ni druhoje - nie oružije dla ochoty. I popasť iz nich v podvižnoho źvieria tiažieło. Tiem boleje u biešiennoho vołka budiet ponižiennyj bolevoj poroh. Nie śmiertielnaja rana jeho nie ostanovit. Vot poetomu i było mnoho vystriełov.
p.s. mužčyna (vartaŭnik) maładziec kaniečnie. paščaściła, što niezadoŭha rolik pahladzieŭ, niby pradčuvaŭ. była b vierujučaja, skazała b, što anioł jaho źbiaroh