Anioły na stoli, załaty joršyk i dyzajn z vokładki časopisa. Jak vyhladajuć kvatery ŭ elitnych damach Minska ŠMAT FOTA
Što ŭnutry darahich kvater u domie Čyža, «Parusie», «Alimpik Park» i inšych prestyžnych žyllovych kompleksach? Pahladzieli, jak vyhladajuć niekatoryja kvatery ŭ elitnych damach stalicy.
«Załataja» kvatera ŭ domie Čyža
Na Staražoŭskaj, 6 pradajecca kvatera za 900 tysiač dalaraŭ. Ahulnaja płošča — 309 kvadrataŭ.
Ramont u joj 2019 hoda, vykanany ŭ kłasičnym styli. Na ścienach šmat pałotnaŭ u załatych ramkach. Załaty koler prahladajecca ledź nie ŭ kožnaj detali mebli i inšych pradmietach interjeru.
U adnym z pakojaŭ na stoli namalavanaja karcina z aniołami.
Santechnika ŭ vannych pakojach taksama załatoha koleru. Ahułam u kvatery čatyry sanvuzły, dva ź jakich zamacavanyja za spalnymi pakojami.
Adzinaje miesca ŭ kvatery, jakoje vyłučajecca z ahulnaj stylistyki, — łodžyja z kresłam i padviesnym kokanam.
«Styl, raskoša i ŭschodniaja kłasika ŭ kožnaj detali», — havorycca ŭ apisańni da kvatery.
Taksama paznačana, što šmat detalaŭ, mebli i dekoru vykanany pad zakaz i pryviezieny z-za miažy.
Admietna, što hetaja kvatera znachodzicca ŭ prodažy minimum z maja 2022 hoda. Tady za jaje prasili $1,5 miljona. U pačatku 2023-ha — $1,15 miljona. Ciapier za jaje prosiać «usiaho» $900 tysiač.
Amal dva miljony za čatyry pakoi
Udvaja daražej kaštuje čatyrochpakajoŭka pa tym ža adrasie. Za kvateru z ahulnaj płoščaj 242,8 m² prosiać $1 790 000.
U adroźnieńnie ad papiaredniaha varyjanta ramont tut bolš sučasny, choć miescami ŭkrapiny załatoha koleru ŭ interjery taksama sustrakajucca. Ale asnoŭny akcent zrobleny na spałučeńni biełaha, čornaha i ciomna-karyčnievaha koleraŭ.
U kvatery try sanvuzły — čorny, bieły i čorna-bieły. U čornym mieścicca dušavaja kabina, a ŭ biełym vanna i chamam.
Prastornaja kuchnia zasłanaja marmurovaj padłohaj.
Taksama ŭ kvatery jość adrazu čatyry harderobnyja pakoi płoščaj ad 3,5 da 11 kvadrataŭ. U samaj vialikaj harderobnaj — asobny sanvuzieł.
Mebla ad Versace
U dom na Hrybajedava, 4 pradajuć vializnuju dvuchuzroŭnievuju 9-pakajoŭku. Prosiać za jaje $1 080 000. U prodažy jana minimum ź viasny 2023 hoda, cana za hety pieryjad nie źmianiłasia.
Niejkaha ahulnaha stylu ŭ interjery nie nazirajecca. Naprykład, kuchnia vykanana ŭ zialonym kolery.
A voś u spalnym pakoi ramont u kłasičnym styli. Pakoj troški nahadvaje carskija charomy. Łožak z bałdachinam ledź nie ŭpirajecca ŭ stol.
Kvatera pradajecca razam z usioj meblaj i bytavoj technikaj. Dyzajnierskaja mebla Versace rabiłasia pa indyvidualnaj zamovie, havorycca ŭ apisańni.
Styl, u jakim vykanany dziciačy pakoj, ciažka paddajecca apisańniu.
U kvatery za miljon dalaraŭ čatyry sanvuzły, ułasnaja sauna i džakuzi.
U canu ŭvachodziać adrazu dva mašyna-miescy na padziemnym parkinhu i adno miesca ŭ dvary.
Kałony i załaty joršyk
U ŽK «Parus» na Kalvaryjskaj, 16 pradajecca trochpakajoŭka na 100 «kvadrataŭ» za $310 tysiač.
Ramont u kvatery vykanany ŭ kłasičnym styli.
Daminujuć biełyja kolery. Kuchnia taksama biełaha koleru ź ciomna-šeraj stalnicaj.
Adnoj z admietnaściej hetaj kvatery možna nazvać kałony i lapninu na stolach.
Ale całkam biez «załatych» akcentaŭ nie abyšłosia. Praŭda, usie jany prychodziacca na vanny pakoj.
Navat joršyk dla ŭnitaza nibyta z zołata.
Sučasny ramont i vychad na dach
Na Miaśnikova, 27 za amal miljon dalaraŭ pradajecca kvatera na 160 kvadrataŭ. Dla jaje abrali sučasny styl biez zołata ŭ interjery.
Kuchnia abjadnanaja z haścioŭniaj, zamiest stała tolki barnaja stojka. Jość dva spalnyja pakoi.
U kvatery, jak i naležyć žytłu takoha kłasu, jość harderobnyja i dva vannyja pakoi.
U adnym mieścicca dušavaja, a ŭ druhim vannaja. Ale hałoŭnaja fiška hetaj kvatery — łodžyja, ź jakoj možna padniacca na ŭłasny kavałak dachu.
U apisańni paznačana, što na dachu, aproč zony dla adpačynku, jość dušavaja z sanvuzłom.
Biełaruskija karciny ŭ «Majaku Minska»
U ŽK «Majak Minska» pradajuć trochpakajoŭku na 97 kvadrataŭ (na Turaŭskaha, 2). Haspadary paznačajuć, što ŭ kvatery zrobleny «aŭtarski ramont». Prosiać za jaje $260 tysiač.
U afarmleńni haścioŭni pieravažaje bieły koler, a zona kuchni naadvarot vykanana ŭ ciomnych adcieńniach. Kanapu rabili pa indyvidualnaj zamovie.
Karciny, jakija ŭpryhožvajuć ścieny, napisanyja biełaruskaj mastačkaj.
Kvatera pradajecca razam z meblaj i technikaj. Haspadar adznačaje, što kvateru rabili dla siabie i pražyli ŭ joj niekalki hadoŭ.
Dyzajn z vokładki časopisa
U ŽK «Alimpik Park» pradajecca dvuchpakajoŭka z ahulnaj płoščaj 121 kvadrat. Kvateru acanili ŭ paŭmiljona dalaraŭ.
Dyzajn-prajekt kvatery sioleta staŭ finalistam premii Kukha Design Award.
Aŭtary dyzajnu ŭ intervju apisvali zadaču tak:
«Metaj było abmiežavacca minimalnaj pierapłaniroŭkaj i pry hetym stvaryć sučasny statusny interjer biez standartnaj kłasiki, jakaja ŭžo padnadakučyła našym zakazčykam».
Hałoŭnaja fiška kvatery — sonca na stoli, jakoje imituje druhoje śviatło. Z kuchni-haścioŭni jość vychad na prastornuju łodžyju.
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ1
Kamientary