Sud adkłaŭ vyniasieńnie prysudu Trampu pa spravie ab hrošach pornazorcy za maŭčańnie
Sudździa pa kryminalnaj spravie Donalda Trampa ab vypłatach za maŭčańnie ŭ piatnicu pastanaviŭ adkłaści vyniasieńnie prysudu na niavyznačany termin. Tramp, jaki rychtujecca viarnucca ŭ Bieły dom, vidavočna zdabyŭ jurydyčnuju pieramohu, piša Radyjo Svaboda.
U mai hetaha hoda Tramp byŭ pryznany vinavatym pa 34 punktach ciažkaha złačynstva. Prysiažnyja ŭstanavili, što jon ašukanskim šlacham źmianiaŭ dziełavyja zapisy, sprabujučy schavać mahčymyja seksualnyja suviazi z pornaaktorkaj Stormi Denijełs pierad vybarami 2016 hoda.
Prakurory śćviardžali, što chavańnie hetaj suviazi pavinna było dapamahčy Trampu vyjhrać na jaho pieršych vybarach u Bieły dom.
Pakolki vyniasieńnie prysudu Trampu było pryznačana na 26 listapada, abrany prezident, chutčej za ŭsio, nie maje inšych šlachoŭ, akramia jak zmahacca ź luboj sprobaj ahałošvańnia prysudu da inaŭhuracyi 20 studzienia nastupnaha hoda.
Amierykanski telekanał ABC News źviartaje ŭvahu na toje, što sud u Ńju-Jorku, prypyniŭšy vyniasieńnie prysudu Trampu, dazvoliŭ abaronie padać chadajnictva ab spynieńni spravy.
Hod tamu ŭ hetym sudzie Trampu vystavili abvinavačvańni ŭ falsifikacyi dakumientaŭ, a ŭ mai jaho pryznali vinavatym pa 34 kryminalnych artykułach, źviazanych z vypłatami hrošaj pornaaktrysie Stormi Denijełs za jaje maŭčańnie. Prysud pa hetaj spravie čakaŭsia jašče ŭ lipieni, ale jaho vyniasieńnie było adkładziena, a paśla pieramohi Trampa na vybarach jaho advakaty stali zmahacca za spynieńnie spravy na padstavie taho, što dziejny prezident pavinien mieć imunitet ad sudovaha pieraśledu.
Prakurory ŭ adkaz zajavili, što Trampa sudziać za pryvatnyja pavodziny, ale ŭ toj ža čas vykazali hatoŭnaść adkłaści vyniasieńnie prysudu da zakančeńnia jaho prezidenckaha terminu ŭ pačatku 2029 hoda.
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»19
Kamientary