«Jandeks Go» tłumačyć rost cen na taksi: u Minsku kiroŭcaŭ na linii stała na 35% mienš
Paśla ŭviadzieńnia «Rejestra aŭtapieravozak pasažyraŭ u nierehularnych znosinach» minčuki zaŭvažyli skačok cen na taksi. U bujnym servisie patłumačyli, što adbyvajecca.
Kiraŭnik «Jandeks Go» u SND Kirył Śvincoŭ patłumačyŭ, što paśla ŭviadzieńnia novych praviłaŭ kolkaść kiroŭcaŭ na linii istotna skaraciłasia.
Ź jahonych słoŭ, žychary zaŭvažyli nie tolki rost cen, ale i pavialičany čas čakańnia mašyny, piša Onliner.
«Pavodle źviestak našaha servisu, u pieršyja dni pracy rejestra kolkaść kiroŭcaŭ na linii skaraciłasia ŭ siarednim na 25% u krainie i na 35% u Minsku. Žychary, jakija chacieli zamović mašynu, zaŭvažyli, što čakańnie stała časta zajmać bolš času, a košt pajezdak pa zvykłym maršrucie moh pavialičycca», — kanstatuje Kirył Śvincoŭ.
Z-za taho, što vykanaŭcaŭ u servisie stała mienš, a kolkaść achvotnych źjechać zastałasia zvyčajnaj, u sistemie staŭ spracoŭvać padvyšajučy košt kaeficyjent.
«Kali ałharytm nie pavialičyć canu, u dadatku my časta budziem bačyć «Niama svabodnych mašyn», — adznačyŭ Śvincoŭ.
Jon dadaŭ, što pry toj kolkaści kiroŭcaŭ, jakija vykonvajuć zakazy z dapamohaj servisu ciapier, niemahčyma zabiaśpiečyć uzrovień cen i čas padačy, jakija byli da 1 listapada.
«Viarnuć popyt i prapanovu ŭ stan bałansu (kali kiroŭcaŭ na linii dastatkova, kab vykanać usie biahučyja zakazy) možna, tolki pavialičyŭšy kolkaść kiroŭcaŭ u rejestry i, jak śledstva, u našym servisie», — ličyć kiraŭnik «Jandeks Go» u SND.
Pry hetym Śvincoŭ ličyć stvareńnie rejestra dobraj idejaj.
«Rejestr jak instrumient pavyšeńnia prazrystaści haliny — dobraja inicyjatyva, jakaja pracuje ŭ mnohich krainach. Dla jaje paśpiachovaj realizacyi ŭ Biełarusi ciapier nieabchodna likvidavać prablemy, jakija pieraškadžajuć kiroŭcam i pieravozčykam ustupać u rejestr.
Važna źmiakčyć patrabavańni da abstalavańnia aŭtamabila, tak jak vydatki na padrychtoŭku ŭsiaho nieabchodnaha dla ŭstupleńnia ŭ rejestr dla mnohich kiroŭcaŭ pieravyšajuć ich miesiačny dachod, heta moža być krytyčna dla kiroŭcaŭ z častkovaj zaniataściu, a ich bolšaść. Nieabchodna likvidavać techničnyja prablemy, ź jakimi sutykajucca vadzicieli i pieravozčyki pry rehistracyi ŭ rejestry.
Jak ja ŭžo kazaŭ raniej, značna dapamoža spraścić ustupleńnie ŭ rejestr uviadzieńnie statusu samazaniataści dla kiroŭcaŭ», — prapanavaŭ ideju Śvincoŭ.
Pradstaŭnik «Jandeks Go» prahnazuje, što ŭ chutkim časie kiroŭcaŭ taksi stanie bolš.
«Ministerstva transpartu ŭžo ŭviało niekatoryja źmieny ŭ paradak ustupleńnia ŭ rejestr. Naprykład, termin prachodžańnia kursaŭ pavyšeńnia kvalifikacyi dla kiroŭcaŭ byŭ ssunuty na 1 sakavika 2025 hoda, a z 3 listapada pastanovaj Savieta Ministraŭ №809 było dazvolena nie ŭnosić u rejestr źviestki ab pracoŭnaj damovie.
Spadziajemsia, što najbližejšym časam kiroŭcaŭ u rejestry i na linii stanie bolš», — padkreśliŭ Śvincoŭ.
Z 1 listapada ŭstupili ŭ siłu novaŭviadzieńni ŭkaza №32 «Ab aŭtamabilnych pieravozkach pasažyraŭ». Pačaŭ pracavać «Rejestr aŭtapieravozak pasažyraŭ u nierehularnych znosinach», jaki źmiaščaje źviestki ab pieravozčykach, ich TS (aŭtobusach, lehkavych aŭtamabilach, aŭtamabilach-taksi), kiroŭcach, dyśpietčarach.
Usie, chto praciahnie pracavać u nierehularnych pieravozkach, nie ŭklučyŭšysia ŭ rejestr, buduć ličycca nielehałami i nieści adkaznaść pa artykule 13.3 KaAP «Niezakonnaja pradprymalnickaja dziejnaść» (pakarańnie — až da kanfiskacyi TS).
U kancy kastryčnika čynoŭniki ŭ Biełarusi ŭzialisia za «Jandeks Go» z-za skarhaŭ na pavyšanyja taryfy navat nie ŭ hadzinu pik. Servis pryznali manapalistam na rynku pasažyrskich pieravozak Biełarusi. Ciapier «Jandeks Go» treba vykanać šerah patrabavańniaŭ. U pieršuju čarhu — uvieści cenavaje rehulavańnie.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary