Minimum 12 šachiedaŭ za noč u Biełaruś, dva prapali, adzin dalacieŭ da Rečycy
Nočču 12 listapada było zafiksavana jak minimum 12 zachodaŭ rasijskich dronaŭ-kamikadze typu «šachied» u Biełaruś z Ukrainy. Drony pralatali nad Brahinam, Homielem i Rečycaj, a taksama nieadnarazova prachodzili praz «biełaruski kalidor», piša Biełaruski Hajun.
Pieršy zachod byŭ u 22:09 u rajon Brahina, paśla čaho dron viarnuŭsia nazad na Čarnihaŭščynu z paŭtornym zachodam užo ŭ «kalidor», i dalej na Kijeŭščynu. Za noč šachiedy zachodzili ŭ 23:14, 02:58, 03:35, 04:49, 05:05, 05:40, 06:10, 06:58, 07:10, 07:59 i 08:10.
U 07:10 dron byŭ zaŭvažany na poŭnač ad Rečycy i ruchaŭsia ŭ bok Śvietłahorska/Babrujska, to-bok znachodziŭsia za 70 km ad miažy ź Biełaruśsiu. Potym jon zrabiŭ kruh i vylecieŭ na Kijeŭskaje vadaschovišča, sumarna pralacieŭšy nad Biełaruśsiu kala 200 km.
Za noč nie mienš za dva drony byli stračany ŭ Biełarusi, heta paćviardžajuć i Pavietranyja siły Uzbrojenych sił Ukrainy, jakija paviedamili, što 2 BPŁA vyjšli z pavietranaha prastoru Ukrainy ŭ bok Biełarusi i RF.
Heta była ŭžo 4-ja noč zapar, kali ŭ Biełaruś masava zalatali rasijskija «šachiedy», i ŭpieršyniu za hetyja dni była padniata dziažurnaja avijacyja VPS RB. Samalot z Baranavičaŭ uźlacieŭ kala 07:40 ranicy i viarnuŭsia na bazu ŭ 08:45.
Kamientary
Ci ŭ vas rej viadzie rasijskamoŭnaja redakcyja, jakaja, jak umieje, pierakładaje svaju pisaninu na puškinska-pucinskaj na našuju?