Abvinavačanaha va ŭciečcy dakumientaŭ Pientahona Džeka Tejšejru prysudzili da 15 hadoŭ

Były vajskoviec Nacyjanalnaj hvardyi ZŠA Džek Tejšejra, jaki letaś dapuściŭ adnu z samych maštabnych uciečak sakretnych dakumientaŭ u historyi Pientahona, prysudžany da 15 hadoŭ turemnaha źniavoleńnia, piša Bi-bi-si.

U sakaviku 22-hadovy Tejšejra pryznaŭ vinu ŭ naŭmysnym zachoŭvańni i pieradačy infarmacyi ab nacyjanalnaj abaronie.

Pracujučy na bazie 102-ha raźviedvalnaha padraździaleńnia vajenna-pavietranych sił nacyjanalnaj hvardyi ZŠA ŭ štacie Masačusets, Tejšejra atrymaŭ dostup da sakretnych materyjałaŭ, uklučajučy karty, spadarožnikavyja zdymki i raźviedźviestki ab sajuźnikach ZŠA, a zatym raźmiaščaŭ hetyja dakumienty na anłajn-płatformie Discord, papularnaj siarod hiejmieraŭ.

Siarod dakumientaŭ, jakimi jon padzialiŭsia z udzielnikami zakrytaj hrupy, była kanfidencyjnaja infarmacyja pra vajnu va Ukrainie.

Prakurory prasili pryznačyć Tejšejru pakarańnie ŭ vyhladzie 16,5 hadoŭ pazbaŭleńnia voli. Advakaty prasili prysudzić jaho da 11 hadoŭ turmy.

Prosiačy ab źmiakčeńni prysudu, advakaty Tejšejry śćviardžali ŭ sudovych dakumientach, što jon byŭ abjektam ździekaŭ padčas vučoby ŭ škole, a zatym i ŭ vajskovaj častcy.

Prakurory vystupali za bolš praciahły termin, zajaŭlajučy, što abvinavačany ździejśniŭ adno z samych značnych i surjoznych parušeńniaŭ Zakona ab špijanažy ŭ historyi ZŠA».

«Tejšejra razumieŭ ryzyku dla svajoj krainy i ŭsio roŭna zrabiŭ heta», — zajavili prakurory ŭ sudzie ŭ aŭtorak.

Abvinavačany paprasiŭ prabačeńnia i skazaŭ, što «ŭsia adkaznaść i nastupstvy kładucca tolki na jaho plečy», paviedamlajuć žurnalisty z zały suda ŭ Bostanie.

Tejšejra, jakomu na momant aryštu byŭ 21 hod, kuryravaŭ nievialikuju zakrytuju hrupu na płatformie Discord, dzie pačaŭ vykładvać sakretnyja fajły jašče ŭ kancy 2022 hoda. Paźniej jany razyšlisia pa internecie.

Tejšejra pastupiŭ na słužbu ŭ padraździaleńnie Nachvardyi ŭ Masačusietsie ŭ 2019 hodzie. Pa pasadzie jon mieŭ zvyšsakretny dopusk.

Kab atrymać jaho, Tejšejra padpisaŭ «pažyćciovaje abaviazkovaje pahadnieńnie ab nievydavańni«, u jakim pryznaŭ, što «niesankcyjanavanaje razhałašeńnie achoŭnaj infarmacyi moža pryvieści da kryminalnaha pieraśledu», havaryłasia ŭ sudovych dakumientach.

Maštabnaja ŭciečka prymusiła Pientahon pierahledzieć pryncypy abychodžańnia z sakretnaj infarmacyjaj.

• 1
• 1
• 0
• 0
• 0
• 1
• 0
• 0