Biełarusy ŭvajšli ŭ skład adnoj z kałon, jakija ŭziali ŭdzieł u Maršy niezaležnaści ŭ Varšavie. Tradycyjnaje mierapryjemstva, jakoje arhanizujuć nacyjanalisty, adbyłosia 11 listapada, piša Most.
Usiaho ŭ šeści pa polskaj stalicy ŭ Dzień niezaležnaści pryniali ŭdzieł kala 90 tys. čałaviek. Biełarusy prajšli ŭ składzie «Mižmorskaj kałony», u jakoj abjadnalisia taksama palaki, ukraincy, litoŭcy, łatyšy, estoncy i inšyja. Arhanizatarami kałony vystupili biełaruskija nacyjanalisty z RUCHu i polskaja arhanizacyja Młode Kresy.
Da maršu byŭ padrychtavany banier z centralnym łozunham na łacincy «Intermarium — Naša moc u adzinstvie!»
Intermarium — heta ideja palityčnaha i vajennaha sajuza krain Centralnaj i Uschodniaj Jeŭropy, jakija imknucca da niezaležnaści ad upłyvu Rasii i Zachadu.
Kałona vykarystoŭvała łozunhi «Žyvie Biełaruś», «Niech żyje Polska» («Žyvie Polšča»), «Intermaryum — moc i biaśpieka», «Mińsk-Warszawa — wspólna sprawa» («Minsk-Varšava — ahulnaja sprava»), «Słava Pałku Kalinoŭskaha».
— Staŭleńnie da našaj «Mižmorskaj kałony» było vietlivym i pryjaznym. Šmat palakaŭ padychodziła vykazać svaju padziaku i padtrymku, a taksama zrabić fotazdymki na fonie našaha baniera. Nam było pryjemna razam z palakami adznačyć ich hałoŭnaje śviata. Nie treba zabyvać, što za niezaležnaść Polščy zmahałasia niamała biełarusaŭ. Taksama svaim udziełam my žadali padziakavać polskaj dziaržavie za prychilnaje staŭleńnie da našych suajčyńnikaŭ. Nahadać polskamu narodu, što biełarusy suprać kryvavych nieasavieckich režymaŭ Łukašenki i Pucina. Nu i kaniešnie vykazać našuju mižmorskuju pazicyju, što sapraŭdnaja moc i nadziejnaja biaśpieka našych krain budzie mahčyma tolki ŭ budučym palityčnym partniorstvie i siabroŭstvie, — adznačyli ŭ RUCHu.
Kamientary