Žychary Pleščanic skardzilisia, što drevy abrezali «pad słup». Ułady skazali, što ŭsio zakonna, a potym pakarali vinavataha
Uviesnu čynoŭniki kazali, što parušeńniaŭ praviłaŭ nie ŭstanoŭlena. Adnak praz paŭhoda znajšoŭsia vinavaty ŭ parušeńniach.
Žychary Pleščanic, što ŭ Łahojskim rajonie, viasnoj paskardzilisia ŭ rajvykankam na dziŭnaje abrazańnie dreŭ «pad słup»: kamunalniki vydalili z dreŭ krony i pakinuli tolki absiečanyja stvały.
Pietycyja da ŭładaŭ źjaviłasia na partale «Zručny horad». Jaje aŭtary zajaŭlali, što kamunalniki parušyli praviły ŭtrymańnia azielanionych terytoryj, jakija zabaraniajuć takoje abrazańnie, piša Blizko.by.
Aŭtary pietycyi patrabavali ad uładaŭ patłumačyć, na jakoj padstavie pravodzilisia raboty pa kraniravańni dreŭ z poŭnym vydaleńniem krony i vierchniaj častki stvała dreva, vyśvietlić słužbovych asob, vinavatych u praviadzieńni rabot pa kraniravańni, a taksama vinavatych u parušeńni narmatyvaŭ.
Adkaz na zvarot pryjšoŭ za podpisam namieśnika staršyni rajvykankama Anžeły Rajeŭskaj. U im havaryłasia, što čynoŭniki sapraŭdy vyjavili drevy, abrezanyja «pad słup», adnak nijakich parušeńniaŭ u hetym niama.
«Praviedzienyja raboty nie źjaŭlajucca abrezkaj, a źjaŭlajucca pieršym etapam rabot pa vydaleńni dreŭ na terytoryi ŭ suviazi ź ich niezdavalniajučym stanam. Raboty pa vydaleńni dreŭ płanujecca zaviaršyć da žniŭnia 2024 hoda», — havaryłasia ŭ dakumiencie.
Taksama ŭ adkazie havaryłasia, što zamiest vysiečanych dreŭ da listapada vysadziać novyja.
Adnak u listapadzie z rajvykankama raptam pryjšoŭ novy adkaz — taksama za podpisam Rajeŭskaj. Tam havorycca, što vinavataha ŭ parušeńni praviłaŭ, jakoje čynoŭniki admaŭlali, znajšli i pakarali.
«U suviazi ź nievykanańniem patrabavańniaŭ artykuła 38 zakona Respubliki Biełaruś ad 14.06.2003 №205-3 «Ab raślinnym śviecie» na terytoryi dziaržaŭnaj ustanovy «fizkulturna-azdaraŭlenčy centr «Skarb-Sport» pa adrasie: h.p. Pleščanicy, vuł. Savieckaja, 11, kiraŭnik byŭ pryciahnuty da adkaznaści pa artykule 16.7 Kodeksa Respubliki Biełaruś ab administracyjnych pravaparušeńniach», — paviedamlajecca ŭ adkazie.
Artykuł 16.7 KaAP «Parušeńnie patrabavańniaŭ u halinie karancinu i abarony raślin» praduhledžvaje štraf 100 bazavych vieličyń (4000 rubloŭ). Pry hetym nie zusim zrazumieła, za što pakarali słužbovuju asobu: za abrazańnie dreŭ abo za toje, što nie byli vysadžanyja novyja.
Kamientary