Pierastaraŭsia: 60-hadovy mužčyna pasadziŭ sabie nyrki vitaminam D

Vitamin D — heta hrupa tłuščarastvaralnych vitaminaŭ, jakija adyhryvajuć važnuju rolu ŭ padtrymcy zdaroŭja kostak, imunnaj sistemy i inšych fizijałahičnych pracesaŭ, upłyvajuć na imunnyja reakcyi, rehulujuć rost kletak i ŭdzielničajuć u abmienie rečyvaŭ.

Isnuje niekalki formaŭ vitaminaŭ hetaj hrupy. Naš arhanizm zasvojvaje vitamin D2 (erhakalcyfieroł), jaki pastupaje z praduktami raślinnaha pachodžańnia, i vitamin D3 (chalekalcyfieroł), jaki vypracoŭvajecca ŭ skury pad uździejańniem soniečnaha śviatła i taksama źmiaščajecca ŭ praduktach žyviolnaha pachodžańnia.

Kamu ŭ pieršuju čarhu patrebny vitamin D

Asnoŭnaja rola vitaminu D u arhaniźmie čałavieka — dapamahčy zasvoić kalcyj i fosfar ź ježy praź ścienki tonkaj kiški. Zhodna z šeraham kliničnych daśledavańniaŭ, chraničny deficyt hetaha vitaminu ŭ dziaciej rańniaha ŭzrostu źviazany z pavyšanaj ryzykaj raźvićcia roznych zachvorvańniaŭ u budučyni, takich jak cukrovy dyjabiet, atłuścieńnie, aŭtaimunnyja i ankałahičnyja zachvorvańni, zachvorvańni sardečna-sasudzistaj sistemy, psaryjaz, zapalenčyja zachvorvańni kišečnika.

U hrupie pavyšanaj ryzyki niedachopu vitaminu D znachodziacca taksama ludzi starejšyja za 70 hadoŭ, viehietaryjancy i tyja, chto prytrymlivajecca biezmałočnaj dyjety, ludzi z zapalenčymi zachvorvańniami kišečnika, pry jakich źnižana jaho ŭsmoktvajučaja funkcyja; ludzi ź lišniaj vahoj (vitamin D u ich nazapašvajecca ŭ tłuščavaj tkancy, ale arhanizmu składana jaho vykarystoŭvać), a taksama sa smuhlavaj skuraj (u ich pihmient miełanin abaraniaje skuru ad soniečnaha śviatła i pieraškadžaje vypracoŭcy vitaminu).

Niedachop vitaminu D u darosłych moža prajaŭlacca bolami ŭ roznych častkach cieła i myšačnaj słabaściu (asabliva ŭ vierchnich častkach noh i ruk). Ludzi z deficytam vitaminu čaściej chvarejuć na prastudy i inšyja infiekcyjnyja zachvorvańni. U ich nazirajecca źnižeńnie ščylnaści kosnaj tkanki, jana stanovicca bolš tonkaj i łomkaj.

U čym ryzyka pieradaziroŭki

Śpiecyjalisty źviartajuć uvahu na ryzyku dla zdaroŭja, jakaja źviazana ź pieradaziroŭkaj vitaminu D.

Zališniaja jaho kolkaść u arhaniźmie moža vyklikać prablemy z sercam i nyrkami, hałaŭny bol, hałavakružeńni i stratu prytomnaści, adsutnaść apietytu, vanitavańnie, pavieličeńnie sutačnaha abjomu mačy i častaje močaspuskańnie, pavyšanuju smahu i mocny śvierb.

Niekalki hadoŭ tamu Kamisija pa lekavych srodkach Niamieckaha sajuza daktaroŭ paviedamlała ab dvuch vypadkach pieradaziroŭki vitaminu D.

Abodva pacyjenty (78-hadovaja žančyna i 60-hadovy mužčyna) prymali vysokija dozy vitaminu štodnia biez pryznačeńnia doktara. U vyniku ŭ ich raźviłasia vostraja chvaroba nyrak, źviazanaja z hipierkalcymijaj (pavyšanym uzroŭniem kalcyju ŭ kryvi).

Žančyna akryjała dziakujučy intensiŭnaj terapii, u toj čas jak mužčyna sutyknuŭsia z surjoznymi ŭskładnieńniami i mieŭ patrebu ŭ dyjalizie z-za chraničnaj nyračnaj niedastatkovaści i paškodžańnia nyračnych kanalcaŭ. 

Časopis Kanadskaj miedycynskaj asacyjacyi taksama paviedamlaŭ pra 54-hadovaha mužčynu, u jakoha raźviłasia chvaroba nyrak paśla taho, jak na praciahu niekalkich hadoŭ jon prymaŭ vitamin D u kancentracyi ad 8 da 12 tysiač mižnarodnych adzinak u dzień. 

Kolki vitaminu D prymać

Zhodna ź mižnarodnymi rekamiendacyjami, dla dziaciej da 6 miesiacaŭ rekamiendavanaja doza składaje 400 MIE (10 mkh) u sutki, što spryjaje pravilnamu raźvićciu kostak i praduchilaje deficyt. Z 6 da 12 miesiacaŭ daziroŭka krychu pavialičvajecca da 400-600 MIE (10-15 mkh), pakolki patrebnaść raście razam ź dziciem.

Dzieciam ad 1 da 10 hadoŭ rajać prymać 600-1000 MA (15-25 mkh) štodnia, a padletkam 11-18 hadoŭ — 800-2000 MA (20-50 mkh) u dzień. Heta źviazana z tym, što ŭ hety pieryjad uzmacniajecca rost, i adpaviedna pavialičvajecca patreba ŭ vitaminie D dla padtrymańnia tryvałaści kostak i imunitetu.

Darosłym da 70 hadoŭ rekamiendujecca štodzionny pryjom vitaminu D u daziroŭcy ad 800 da 2000 MA (20-50 mkh). Pažyłym ludziam, starejšym za 70 hadoŭ, rajać bolšuju dozu — ad 1600 da 4000 MA (40-100 mkh) u sutki.

U toj ža čas nieabchodna razumieć, što ŭniviersalnaj dozy nie isnuje. Jana varjirujecca ŭ zaležnaści nie tolki ad uzrostu, ale i inšych faktaraŭ, takich jak vaha, stan zdaroŭja, uzrovień vitaminu D u kryvi, soniečnaja aktyŭnaść i racyjon.

Tamu pierad pačatkam pryjomu rekamiendujecca prakansultavacca z doktaram i zdać analiz na ŭzrovień vitaminu D u arhaniźmie.

Śpiecyjalisty taksama adznačajuć, što najlepš vitamin D (jak i ŭsie vitaminy) zasvojvajecca, kali pastupaje z naturalnych praduktaŭ. Asnoŭnymi pryrodnymi krynicami jaho źjaŭlajecca ryba, takaja jak tuniec, łasoś i sardziny, a taksama rybin tłušč (naprykład, ź piečani traski), ikra, masła, syr, niekatoryja vidy hryboŭ (naprykład, šampińjony i lisički) i jałavičnaja piečań.

• 4
• 1
• 0
• 2
• 3
• 2
• 0
• 0