Sa śmierci rasijskaha hienierała va Ukrainie robiać hieraičnuju hibiel, a jon prosta jechaŭ pjany
Kanał VČK-OHPU paviedamlaje, što ŭ jaho rasparadžeńni apynulisia dakumienty i apaviadańni vidavočcaŭ, jakija pralivajuć śviatło na hibiel pad Danieckam hienierała US RF Paŭła Klimienki. Abstaviny śmierci, pavodle kanała, dalokija ad hieraičnych.
Pavodle danych VČK-OHPU, Klimienka ŭ pjanym stanie na vialikaj chutkaści źjechaŭ na matacykle ŭ kiuviet i paźniej pamior ad charakternych dla padobnaha DTZ traŭmaŭ. Adnak, było składziena zaklučeńnie, što ŭ kiuviet jon źjechaŭ u vyniku abstrełu z užyvańniem BPŁA. Pryčym u inšych matacyklistaŭ, jakija jechali pobač, nijakich paškodžańniaŭ naohuł niama.
Ciapier hienierała chočuć pradstavić da ŭznaharodžańnia zorkaj Hieroj Rasii, piša kanał.
Zhodna ź infarmacyjaj kanała, miedykam u balnicy, kudy byŭ dastaŭleny traŭmavany hienierał, zahadali nijak nie adlustroŭvać u dakumientacyi, što na momant trahiedyi hienierał znachodziŭsia ŭ stanie mocnaha ałkaholnaha apjanieńnia.
Na ciele Paŭła Klimienki adsutničali jakija-niebudź termičnyja i askiepkavyja paškodžańni, charakternyja dla vybuchu. U hienierała byli dyjahnastavany šmatlikija pierałomy (taz, ściahno, rebry) i traŭma hałavy. Usie traŭmy charakternyja dla DTZ z matacykłami.
U dakumientach, ź jakimi ŭdałosia aznajomicca VČK-OHPU, skazana, što 6 listapada prykładna ŭ 19:30 Pavieł Klimienka viartaŭsia ŭ Danieck u hrupie z troch matacyklistaŭ. U rajonie ŭschodniaj uskrainy Krasnahoraŭki hienierał razam z matacykłam na vialikaj chutkaści źjechaŭ u kiuviet, dzie i atrymaŭ ciažkija traŭmy. Jaho dastavili ŭ Respublikanski centr traŭmatałohii. U 22:00 tam była kanstatavanaja śmierć hienierała.
Pa słovach krynicy VČK-OHPU, pra abstaviny śmierci Klimienki źjaviłasia ŭkazańnie paviedamlać, što jon zahinuŭ u vyniku ataki FPV-drona, nibyta ad vybuchnoj chvali hienierał byŭ adkinuty ŭ kiuviet razam z matacykłam.
Klimienka staŭ 13-m rasijskim hienierałam, pra čyju śmierć paviedamlałasia ź lutaha 2022 hoda. Rasijskija ŭłady paćvierdzili vosiem ź ich.
Jak pišuć «Važnyja historyi», bajcy bryhady zabitaha hienierała datyčnyja da katavańniaŭ i zabojstva amierykanskaha błohiera i prychilnika vajny Raseła Bentli. Viadoma, što trup amierykanca ŭzarvali, kab schavać ślady źvierstvaŭ. Ciapier čaćviora byłych padnačalenych Klimienki znachodziacca pad śledstvam, ale, imavierna, paźbiehnuć pakarańnia, bo znoŭ adpraviacca na front.
Pavodle rasśledavańnia žurnalistaŭ, Klimienka arhanizavaŭ katavalny kancłahier dla rasijskich vajskoŭcaŭ na terytoryi zakinutaj šachty ŭ Daniecku. Tam ich prymušajuć addavać kamandziram zarpłatu i vypłaty za ranieńni (časam dziela hetaha jany sami kalečać bajcoŭ). Taksama kamandavańnie bryhady Klimienki afarmlała davieranaści i zabirała sabie vypłaty za śmierć bajcoŭ.
Kamientary
Na rosii eto sčitajetsia kak idiealnyj puť voina i jeho hieroičieskaja śmierť,v etom vsia "zahadočnaja" ruzzkaja duša,normalnomu čiełovieku nie poniať.