Navukoŭcy nie vyjavili suviazi pamiž vykarystańniem sacyjalnych sietak i psichičnymi prablemami
Nasupierak raspaŭsiudžanamu mierkavańniu, vyniki daśledavańnia pakazali, što kolkaść času ŭ sacyjalnych sietkach amal nie ŭpłyvaje na ŭzrovień depresii, tryvožnaści abo stresu. Naadvarot, vykarystańnie sacsietak palapšaje niekatoryja navyki.
Daśledniki z aŭstralijskaha Univiersiteta Dž. Kiorcina vyvučyli, kolki času ludzi pravodziać u sacyjalnych sietkach i jak heta adbivajecca na ich psichičnym stanie. Pra heta piša telehram-kanał cybulinka.
U daśledavańni ŭziali ŭdzieł bolš za 400 čałaviek (va ŭzroście 17-53 hady). U adroźnieńnie ad papiarednich daśledavańniaŭ, dzie ŭdzielniki samastojna aceńvali čas, praviedzieny ŭ sacyjalnych sietkach, hetym razam navukoŭcy vykarystoŭvali dadzienyja ź ich mabilnych telefonaŭ, kab dakładna zafiksavać, kolki chvilin jany praviali ŭ anłajn-prastory. Zatym hetyja dadzienyja paraŭnali z uzroŭniami tryvožnaści, depresii i kantrolu ŭvahi.
Asnoŭny vynik akazaŭsia niečakanym: čas, praviedzieny ŭ sacyjalnych sietkach, amal nie ŭpłyvaje na psichičnaje zdaroŭje. Naprykład, daśledniki znajšli słabuju suviaź pamiž vykarystańniem sacyjalnych sietak i tryvožnaściu, ale suviazi z depresijaj i stresam nie vyjaŭlena.
Bolš za toje, akazałasia, što ludzi, jakija bolš aktyŭna karystajucca sacyjalnymi sietkami, majuć krychu lepš raźvityja navyki ŭvahi, choć hety efiekt byŭ niaznačnym.
Chłoja Džons, kiraŭnica daśledavańnia, miarkuje, što vyniki pracy nie aznačajuć, što sacyjalnyja sietki biaśpiečnyja dla psichiki, i važnym źjaŭlajecca toje, jak my imi karystajemsia, a nie kolki času na heta marnujem. Sacyjalnyja sietki mohuć być jak padtrymkaj, tak i faktaram ryzyki. Naprykład, dla čałavieka, jaki žyvie adzin, udzieł u anłajn-supolnaści moža być sapraŭdnym vyratavańniem, a voś praciahły prahlad stužki znakamitaściaŭ moža tolki ŭzmacnić niezadavolenaść saboj.
Jašče adzin cikavy aśpiekt daśledavańnia — upłyŭ roznych płatformaŭ. Vyśvietliłasia, što, naprykład, TikTok krychu palapšaje ŭvahu, a Facebook byŭ źviazany ź nievialikim pavyšeńniem uzroŭniu stresu, navat kali aŭtary ŭličvali ŭzrost karystalnikaŭ.
Skončyła žyćcio samahubstvam Śviatłana Krucikava ź Pinska, jakuju nieadnarazova sudzili za «ekstremizm»8
Kamientary