U Kitai za machlarstvy ź lekami ad raku aryštavali kiraŭnika AstraZeneca

Jak piša The Wall Street Journal, 6 listapada kampanija AstraZeneca paviedamiła ab zatrymańni svajho vykanaŭčaha vice-prezidenta Leona Vana, adkaznaha za Kitaj i azijacki rehijon. Akramia Vana, pad śledstvam znachodziacca dva ciapierašnija i dva byłyja top-mieniedžara AstraZeneca ŭ Kitai.

Na minułym tydni kampanija zajaviła, što supracoŭničaje sa śledstvam. Hetaja navina pryviała da padzieńnia jaje akcyj adrazu na 8%, a za tydzień — na 12%.

Adpaviedna zajavie, jakuju raspaŭsiudziła sama kampanija, ułady Kitaja rasśledujuć vypadki niezakonnaha impartu preparataŭ dla lačeńnia raku hrudziej Enhertu i piečani Imjudo z Hankonha, a taksama niezakonny zbor danych ab pacyjentach.

Abodva preparaty byli adobranyja ŭ Hankonhu, ale na momant rasśledavańnia nie mieli licenzii na macierykovym Kitai. Enhertu atrymaŭ adabreńnie ŭ lipieni 2023 hoda.

Kitaj źjaŭlajecca važnym rynkam dla AstraZeneca. Jaje prybytak za pieršaje paŭhodździe ŭ hetaj krainie skłaŭ 13% ad ahulnaj vyručki.

Da hetaha, jak piša WSJ, kampanija trapiła ŭ skandał, źviazany z machlarstvam jaje supracoŭnikaŭ adnosna miedycynskaha strachavańnia.

U pačatku 2022 hoda Nacyjanalnaje ŭpraŭleńnie miedycynskaha strachavańnia Kitaja vyjaviła, što supracoŭniki AstraZeneca ŭ zmovie z łabaratoryjami falsifikavali hienietyčnyja testy, kab pacyjenty mahli atrymać strachoŭku za nabyćcio preparatu Tagrisso, pryznačanaha dla lačeńnia raku lohkich pry najaŭnaści peŭnaj mutacyi. Pry adsutnaści hetaj mutacyi lek nie daje efiektu.

Kitaj upieršyniu adobryŭ Tagrisso ŭ 2017 hodzie i z 2018 hoda dazvoliŭ jaho nabyćcio pa značna nižejšych koštach dla pacyjentaŭ z peŭnymi pakazańniami z kampiensacyjami ad strachavych kampanij.

Kab uvajści ŭ dziaržaŭnuju prahramu miedycynskaha strachavańnia, AstraZeneca nieadnarazova panižała canu, što pryviało da vielmi nizkaj prybytkovaści. Kab jaje pavialičyć, kampanija daviała supracoŭnikam vysokija płany prodažaŭ, što, jak śćviardžajuć niekatoryja supracoŭniki, stvaryła mocny cisk na ich i stała pryčynaj machlarskich schiem.

Hetaja sprava ličycca najbujniejšym strachavym machlarstvam u farmaceŭtyčnym siektary Kitaja za apošnija hady. Kitajskija ŭłady vyjavili kala sta byłych supracoŭnikaŭ AstraZeneca, jakija byli zamiašanyja ŭ machlarstvie sa strachavańniem, niekatoryja ź ich atrymali turemnyja terminy.

Adpaviedna raspaŭsiudžanaj zajavie kampanii, ciapierašniaje rasśledavańnie maje inšy charaktar i nie źviazana z raniejšym skandałam.

• 1
• 0
• 1
• 0
• 1
• 0
• 0
• 0