Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK

3 1 kastryčnika supracoŭniki KDB pačali svaje vizity da ludziej u roznych rehijonach u ramkach kryminalnaj spravy, zaviedzienaj pavodle artykuła 357 KK (zmova ci inšyja dziejańni, učynienyja z metaj zachopu dziaržaŭnaj ułady).

Pravaabaroncy paviedamili, što adnych zatrymanych pakinuli za kratami, inšyja ž vyjšli na volu ŭ statusie śviedkaŭ pa kryminalnaj spravie.

Na prycele — dvaravyja čaty i aktyvisty roznych abjadnańniaŭ

Imavierna, najbolšaja častka zatrymańniaŭ źviazanaja z tym, što KDB pryznaŭ ekstremisckim farmavańniem kaalicyju dvarovych čataŭ «Orden». Rašeńnie pra heta było pryniata 29 kastryčnika, a viadoma pra jaho stała ciapier. 

Pradstaŭnik adnoj z kamand, jakaja dapamahała aktyvistam u Biełarusi, prakamientavaŭ zatrymańni.

Na jaho dumku, masavyja zatrymańni stali vynikam papiaredniaha maštabnaha rasśledavańnia KDB, jakoje pačałosia jašče ŭ kancy 2021-ha — 2022 hodzie.

«Tady kadebešniki paśla zatrymańniaŭ pačali atrymlivać pieršuju infarmacyju pra roznyja mierapryjemstvy i samo isnavańnie peŭnych abjadnańniaŭ. Jany pačali vyvučać ich i, tak skazać, usio bolš padrabiazna vyvučać hetuju infarmacyju, zachoplivać i dapytvać novych ludziej. Takim čynam jany skłali peŭnuju karcinu i ciapier zrabili toje, što zrabili».

Surazmoŭca dapuskaje, što śpiecsłužby zmahli identyfikavać asobnych ludziej, bo ŭ ich u rukach apynułasia infarmacyja, atrymanaja pry niečym zatrymańni. «Ale ŭ nivodnaha z zatrymanych nie było poŭnaj karciny», — śćviardžaje jon.

Dakumient KDB vyznačaje novaje «ekstremisckaje farmavańnie» jak «hrupu hramadzian ź liku pradstaŭnikoŭ dvarovych supołak (farmavańniaŭ/kaalicyj) «Orden» pad nazvami «Złyja kipciki», «Sucharava», «Sienica 2.0», «Salidarnaść», «Volnyja vaŭki», «Navahrudskija partyzany», «Vilija», «Ścipłyja matroški», a taksama arhanizacyju «Susiedzi».

U dakumiencie zhadvajucca imiony Iryny Jakaŭlevaj, Natalli Daroninaj, Dyjany Haŭryłavaj, kiraŭnika arhanizacyi «Susiedzi» hramadzianina Ukrainy Ivana Amielana. Taksama ŭ dakumient uniesienyja Volha Niachajčyk, Kastuś Kirylenka, Lizavieta Plitnik, Natalla Hužova, Iryna Smalarova, Stanisłaŭ Botvin, Natalla Łantuch — ich KDB nazyvaje «kuratarami», a ŭ dužkach «mientarami».

Infarmacyju, što supracoŭniki KDB padčas rejdaŭ 31 kastryčnika — 1 listapada cikavilisia ŭ tym liku dvarovymi čatami, paćviardžajuć i pravaaabaroncy.

HUBAZiK adnačasova adpracoŭvaŭ pradpryjemstvy

Padobna, što ŭ toj ža čas HUBAZiK «adpracavaŭ» niekalki pradpryjemstvaŭ i rajonaŭ u rehijonach. Jon dziejničaŭ pa ŭłasnym płanie, paralelna.

HUBAZiK pieravažna prychodziŭ da ludziej, jakija traplali pad uvahu siłavikoŭ raniej. Heta adpaviadaje łohicy apieracyi pa pieradvybarčym zastrašvańni nasielnictva, pra jakuju «Naša Niva» paviedamlała raniej.

Abłavu 31 kastryčnika — 1 listapada pa maštabie možna paraŭnać z aryštami svajakoŭ palitviaźniaŭ i ludziej, jakija im dapamahali, zimoj 2024-ha.

Viadoma, što izalatary časovaha ŭtrymańnia ŭ rehijonach i Akreścina ŭ Minsku pierapoŭnienyja. 

«Nachapali kuču narodu. U dvuch– i trochmiesnych kamierach — pa 15-20 čałaviek», — raskazvaje čałaviek, jaki vyzvaliŭsia niadaŭna.

Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected]. Abo lubomu redaktaru ci žurnalistu «Našaj Nivy», jakoha viedajecie asabista. Važna kab śviet viedaŭ pra toje, što robiać ź biełarusami.

• 1
• 2
• 2
• 8
• 8
• 3
• 75
• 0