U ZŠA adrestaŭravali režysiorskuju viersiju «Dzikaha palavańnia karala Stacha»

Amierykanskaja studyja Deaf Crocodile u supracoŭnictvie z Seagull Films praviali restaŭracyju, jak jany śćviardžajuć, režysiorskaj viersii filma Valeryja Rubinčyka «Dzikaje palavańnie karala Stacha».

Režysior Valeryj Rubinčyk pracavaŭ na «Biełaruśfilmie» z 1969 pa 1990 hady. U hety čas jon źniaŭ takija karciny, jak «Mahiła lva» (1972), «Apošniaje leta dziacinstva» (1974 hod), «Vianok sanietaŭ» (1976), «Kultpachod u teatr» (1982). Jon staŭ adnym z samych značnych biełaruskich režysioraŭ XX stahodździa.

Film pa matyvach adnajmiennaj apovieści Uładzimira Karatkieviča vyjšaŭ na ekrany ŭ 1980 hodzie.

Dziejańnie karciny razhortvajecca ŭ kancy XIX stahodździ ŭ nievialikim majontku Bałotnyja Jaliny na biełaruskim Paleśsi, dzie pasialiŭsia małady navukoviec-etnohraf Andrej Biełarecki, jaki vyvučaje narodnyja padańni. Jamu davodzicca rasśledavać žachlivuju historyju pra karala Stacha, jaki čas ad času paluje na pradstaŭnikoŭ rodu Janoŭskich, da jakich naležyć i haspadynia majontka.

U anatacyi da filma adznačana źmiašeńnie ŭ im žanraŭ folk-choraru, źviazanaha ź miascovymi lehiendami i padańniami, i zvyšnaturalnaj misteryi.

«Karol Stach» — heta miełanchaličnaje kino, ad jakoha duša zdranćvieje, spałučeńnie stylu Terensa Hilijama, italjanskaha hatyčnaha žachu, filmaŭ studyi Hammer 1960-ch hadoŭ i «Plecienaha čałavieka» — i vialikaje adkryćcio dla prychilnikaŭ žanru».

Terens Hilijam — brytanski kinarežysior amierykanskaha pachodžańnia. U asnoŭnym pracuje ŭ žanry kamiedyi absurdu, zvyčajna na fantastyčnyja ci kazačnyja temy. Jaho filmy časta siurrealistyčnyja, adroźnivajucca jarkimi hrateskavymi vyjavami i ŭjaŭlajuć saboj prytčy ź fiłasofskim abo satyryčnym padtekstam.

Plecieny čałaviek (anhł. The Wicker Man) — kultavy brytanski folk-chorar 1973 hoda źniaty režysioram Robinam Chardzi.

Film možna nabyć na Blu-ray z 60 staronkavaj knihaj, jakaja źmiaščaje ese kinakrytykaŭ i historykaŭ kino. Akramia hetaha, u kamplekt uvachodziać analiz filma i jaho značeńnia ŭ kantekście hatyčnaha choraru, dva aŭdyjakamientary ad ekśpiertaŭ-restaŭrataraŭ. Pa QR-kodzie, raźmieščanym na futalary z dyskam, možna paznajomicca ​​z dadatkovymi materyjałami pra film.

• 19
• 0
• 0
• 0
• 0
• 0
• 0
• 7