Navukoŭcy vyśvietlili, što ludzi čytajuć Vikipiedyju absalutna pa-roznamu — usio zaležyć ad uzroŭniu adukacyi
Daśledčyki vyznačyli try asnoŭnyja styli cikaŭnaści pry čytańni svabodnaj encykłapiedyi. Praviercie, da jakoha naležycie vy.
Daśledčaja kamanda ź Piensilvanskaha ŭniviersiteta vyjaviła niekatoryja adroźnieńni ŭ paternach uzajemadziejańnia z sajtam, kali vyvučyła zvyčki 482 760 karystalnikaŭ Vikipiedyi z 50 krain śvietu. Pra heta piša telehram-kanał cybulinka.
Navukoŭcam stała zrazumieła, što toje, jakomu stylu pošuku infarmacyi ludzi addajuć pieravahu, moža šmat skazać pra kulturu, u jakoj jany vyraśli.
Vyjaviłasia, što ŭ krainach ź nizkim uzroŭniem adukacyi i hiendarnaj roŭnaści ludzi čaściej šukajuć tolki ciesna źviazanuju z zapytam infarmacyju. Hety styl daśledčyki nazyvajuć «palaŭničy» (hunter).
U krainach z bolšaj roŭnaściu i dastupnaściu adukacyi Vikipiedyju prahladali šyrej, achoplivajučy raznastajnyja temy.
Mnohija zachodziać pačytać artykuł u Vikipiedyi, a paśla ŭ tekście pstrykajuć na spasyłku, zatym jašče raz, i ź impetam čytajuć artykuł, jaki zusim nie byŭ źviazany z temaj ich pieršapačatkovaha pošuku. Hety styl atrymańnia infarmacyi daśledčyki nazvali «platkar» (busybody).
Samym cikavym, pa słovach daśledčykaŭ stała toje, što jany zmahli paćvierdzić najaŭnaść treciaha stylu pošuku infarmacyi, jakomu jany dali nazvu «tancor» (dancer). U hetym vypadku čałaviek taksama pierachodzić ad temy da temy, ale robić heta nie vypadkova, a takim čynam, kab jany vybudoŭvalisia ŭ celnuju karcinu.
Hety styl śviedčyć pra tvorčy padychod i miždyscyplinarnaje myśleńnie, što dazvalaje bačyć suviazi tam, dzie inšyja ich nie zaŭvažajuć.
Aŭtary miarkujuć, što takija vyniki śviedčać pra značny ŭpłyŭ kultury na cikaŭnaść i paznańnie. Dakładna vyznačyć, z čym mienavita źviazanyja roźnicy ŭ stylach pošuku, pakul składana, ale isnujuć hipotezy.
Kamientary