Matacyklist razahnaŭsia da 199 km/h i źbiŭ dzicia na pierachodzie. Padrabiaznaści žachlivaha DTZ pad Kobrynam
Trahiedyja adbyłasia na trasie M1 19 lipienia. Matacyklist i dzicia zahinuli.
Stali viadomyja padrabiaznaści śmiarotnaha DTZ na trasie M1 kala vioski Iłask Kobrynskaha rajona. 19 lipienia 28-hadovy matacyklist źbiŭ na trasie 13-hadovaha chłopčyka na piešachodnym pierachodzie. U vyniku sutyknieńnia abodva zahinuli.
Na miescy zdareńnia śledčyja ŭbačyli, što cieły zahinułych znachodzilisia na značnym addaleńni ad miesca DTZ. Tak, cieła matacyklista znajšli za 99 mietraŭ ad miesca sutyknieńnia, cieła chłopčyka — za 60 mietraŭ. Matacykł byŭ znojdzieny na adlehłaści zvyš 390 mietraŭ, na im adsutničali rehistracyjnyja znaki. Śledavaja karcina śviedčyła pra toje, što chutkaść motatranspartu była kardynalna vyšejšaja za dapuščalnyja 80 km/h.
Śledstva ŭstanaviła, što matacyklist pierad sutyknieńniem razahnaŭsia da chutkaści 199 km/h.
«Pa kryminalnaj spravie ŭ jakaści śviedak dapytanyja kiroŭcy aŭtamabilaŭ, jakija źjaŭlalisia vidavočcami avaryi. Jany raskazali, što padjazdžali da piešachodnaha pierachodu, a ŭ hety čas pa pravaj pałasie razhonu ich na vysokaj chutkaści apiaredziŭ matacykł. Zatym jany ŭbačyli ŭspyšku z datčyka kantrolu parušeńniaŭ, a paśla — vobłaka pyłu i dymu. Ubačyŭšy nastupstvy DTZ, jany vyklikali milicyju i chutkuju miedycynskuju dapamohu», — paviedamlaje Śledčy kamitet.
Matacyklist padčas DTZ byŭ ćviarozy, u jaho ŭ kryvi nie było znojdziena śladoŭ etyłavaha śpirtu. Śledčyja vyznačyli, što matacyklist mieŭ mahčymaść zatarmazić da piešachodnaha pierachodu, kali b jechaŭ na maksimalna dazvolenaj chutkaści ŭ 80 km/h.
Viadoma taksama, što raniej kiroŭca matacykła nieadnarazova vyjazdžaŭ na trasu pahaniać. Pierad hetym jon zdymaŭ numary z matacykła.
Zahinuły chłopčyk vučyŭsia ŭ 8 kłasie siaredniaj škoły Bresta, zajmaŭsia sportam. Na letnija kanikuły pryjechaŭ u viosku da babuli i pa viečarach lubiŭ viačernija prabiežki i piešyja prahułki.
Vinavatym u DTZ pryznany matacyklist, jaki «pry padjeździe da nierehulavanaha piešachodnaha pierachodu pieravysiŭ chutkaść, prajaviŭ złačynnuju niadbajnaść, niaŭvažlivaść i nieabačlivaść da darožnaj abstanoŭki i jaje źmienaŭ, nie byŭ hatovy źnizić chutkaść ruchu i spynicca, kab vyklučyć vierahodnaść najezdu na dzicia, choć abaviazany byŭ heta zrabić i mieŭ takuju mahčymaść».
Kryminalnaja sprava spynienaja ŭ suviazi sa śmierciu kiroŭcy matacykła.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary