Skłali paśla DTZ jeŭrapratakoł, a hrošaj na ramont aŭto nie chapiła. Što rabić?
Adna z umoŭ składańnia jeŭrapratakoła — udzielniki avaryi ličać, što škoda, pryčynienaja kožnamu transpartnamu srodku ŭ DTZ, nie pieravyšaje €800 pa kursie Nacbanka. A što rabić, kali potym apyniecca, što hetych hrošaj na ramont aŭtamabila brakuje?
Hrošy možna spahnać praz sud. Voś realnaja historyja z sudovaj praktyki, pra jakuju raskazali ŭ Viciebskim abłasnym sudzie, piša abw.by.
17 krasavika hetaha hoda ŭ Połacku sutyknulisia dva aŭtamabili. Hramadzianskaja adkaznaść vinoŭnicy DTZ była zastrachavana ŭ ZAST «Task», a druhoha ŭdzielnika avaryi — u STAA «Asoba». Jaho aŭtamabil atrymaŭ paškodžańni, pamier jakich baki na miescy acanili ŭ sumu nie bolš za €800 i zapoŭnili błank paviedamleńnia ab DTZ biez vykliku supracoŭnikaŭ DAI.
Pa damovie «aŭtahramadzianki», «Asoba» vypłaciła kiroŭcu strachavuju kampiensacyju ŭ sumie 2785,52 rubla, što ekvivalentna €800. Adnak košt ramontu aŭtamabila akazaŭsia bolš čym u dva razy vyšejšym — 6163,66 rubla.
Uładalnik aŭtamabila źviarnuŭsia da vinoŭnicy DTZ, kab jana dapłaciła za ramont. Jana admoviłasia heta zrabić, i tady jon źviarnuŭsia sud, dzie z ulikam znosu aŭtamabila ŭ 55% prasiŭ spahnać ź vinoŭnicy avaryi 2198,39 rubli za ramont, a taksama sudovyja vydatki.
Jak nahadali ŭ sudzie, zhodna z artykułam 941 HK, jurydyčnaja asoba abo hramadzianin, jakija zastrachavali svaju adkaznaść pa dobraachvotnym abo abaviazkovym strachavańni na karyść paciarpiełaha (artykuł 823, punkt 1 artykuła 825), u vypadku kali strachavoj kampiensacyi niedastatkova dla taho, kab poŭnaściu kampiensavać pryčynienuju škodu, kampiensujuć roźnicu pamiž strachavoj kampiensacyjaj i faktyčnym pamieram uronu.
U vypadku, kali strachavoj kampiensacyi niedastatkova dla poŭnaj kampiensacyi škody, paciarpieły maje prava pradjavić asobie, jakaja naniesła škodu, pazoŭ ab pakryćci škody na sumu, jakaja składaje roźnicu pamiž strachavoj kampiensacyjaj i faktyčnym pamieram škody, za vyniatkam koštu abnaŭleńnia (h.zn. roźnicy pamiž koštam novych detalaŭ i koštam detalaŭ za vylikam znosu pry zamienie paškodžanych detalaŭ na novyja).
Sud pryjšoŭ da vysnovy, što zajaŭlenyja iskavyja patrabavańni abhruntavanyja i padlahajuć zadavalnieńniu ŭ poŭnym abjomie.
13 vieraśnia rašeńniem suda Połackaha rajona i horada Połacka z adkazčycy na karyść istca spahnana:
- 2198,39 rubla — materyjalnaja škoda;
- 109,92 rubla — dziaržpošlina;
- 80 rubloŭ — vydatki pa apłacie jurydyčnaj dapamohi.
Rašeńnie suda nie abskardžana, nie apratestavana i nabyło zakonnuju moc.
Kamientary