Žychar Baranavičaŭ pasprabavaŭ zabić znajomaha, kab nie viartać vialiki doŭh
A toj paśla ŭdaru nažom prytvaryŭsia miortvym, a potym vyskačyŭ z bahažnika.
Historyja adbyłasia ŭ pačatku vieraśnia. U svajho znajomaha 36-hadovy žychar Baranavičaŭ pazyčyŭ 1,5 młn rasijskich rubloŭ (16 tysiač dalaraŭ). Hrošy viartać nie mieŭ namieru, a paličyŭ, što lepš pazbavicca ad pazyčalnika, paviedamiŭ SK.
«Unačy 13 vieraśnia fihurant paprasiŭ 49-hadovaha mužčynu pryjechać i dapamahčy adbuksiravać aŭtamabil, a zaadno paabiacaŭ viarnuć hrošy. Padčas sustrečy na abočynie trasy niedaloka ad Baranavičaŭ padazravany prapanavaŭ prysieści ŭ mašynu, dzie nibyta lažała torba z hrašyma. Kali znajomy sieŭ u aŭtamabil, fihurant udaryŭ jaho nažom u šyju. Paciarpieły sprabavaŭ abaraniacca i ŭstupiŭ u baraćbu, adnak paśla atrymańnia jašče adnaho nažavoha ranieńnia straciŭ siły i ŭpaŭ na ziamlu, prykinuŭšysia miortvym», — raskryŭ detali SK.
Fihurant pavieryŭ, što sa znajomym skončana. Jon zahruziŭ jaho ŭ bahažnik mašyny i pajechaŭ u bok horada. U darozie paciarpieły zmoh znutry adkryć kryšku bahažnika i na chadu vybracca z aŭtamabila.
Ściakajučy kryvioj, mužčyna dajšoŭ da bližejšaj zapraŭki, rabotniki jakoj vyklikali jamu chutkuju dapamohu, a taksama patelefanavali ŭ milicyju. Paciarpiełaha dastavili ŭ balnicu, jaho žyćciu ničoha nie pahražaje.
Złamyśnik ža pryjechaŭ dadomu i tolki tam vyjaviŭ adsutnaść znajomaha. Nieŭzabavie padazravanaha zatrymali.
«Padčas ahladu aŭtamabila i haraža padazravanaha vyjaŭlenyja nož, cyrata i rydloŭka. Taksama ŭstanoŭlena, što fihurant nie adnojčy atrymlivaŭ hrošy ŭ doŭh ad svaich znajomych i nie mieŭ namieru viartać hrošy», — zaŭvažyŭ aficyjny pradstaŭnik USK pa Bresckaj vobłaści.
U dačynieńni da mužčyny raspačali kryminalnuju spravu pa niekalkich artykułach. U śledčych jość padstavy mierkavać, što faktaŭ supraćpraŭnaj dziejnaści mužčyny moža być bolš.
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary
Kali pytajucca ŭ Babrujsku Zajmi hrošy Babrujčanin adkazvaje U koho?.