U ZŠA 26-hadovy piedafił na praciahu hoda chadziŭ u adzin kłas z padletkami. Nichto nie zdahadaŭsia

Užo zvyčajnym stali paviedamleńni ab vykryćci internet-piedafiłaŭ, jakija ŭvachodziać u davier da padletkaŭ, vydajučy siabie za ich ravieśnikaŭ. Vypadak, jaki adbyŭsia ŭ ZŠA, adbyŭsia ŭ realnym žyćci i ŭ zvyčajnaj škole. 26-hadovy chłopiec vydaŭ siabie za 17-hadovaha, chadziŭ u škołu, znajomiŭsia ź dziaŭčatami i atrymlivaŭ žadanaje. Małodšaj achviary było 13 hadoŭ.

Jak piša The Waschington Post, nadzvyčajny vypadak adbyŭsia ŭ horadzie Linkaln (štacie Niebraska). Miascovy žychar Zachary Šejch (Zachary Scheich) majučy rost prykładna 162 sm i chudarlavy ciełaskład, vydaŭ siabie za 17-hadovaha i staŭ naviedvać škołu.

Z sudovych dakumientaŭ niezrazumieła, jakuju historyju mužčyna prydumaŭ, kab być pryniatym. Zhodna z pakazańniami adnaho z čynoŭnikaŭ sistemy adukacyi horada, Šejch pakazaŭ paśviedčańnie ab naradžeńni, tabiel paśpiachovaści, dakumienty ab miedahladzie i zapisy ab pryščepkach. Jak paźniej vyjaviłasia, usie jany byli padroblenymi.

Mužčyna spačatku chadziŭ u adnu z škoł na paŭnočnym zachadzie horada, a viasnoj 2023 hoda źjaviŭsia ŭ inšym rajonie horada ŭ škole, jakuju skončyŭ u 2015 hodzie. U dźviuch dziaržaŭnych škołach horada Šejch pravioŭ u ahulnaj kolkaści 54 dni z kastryčnika 2022-ha pa maj 2023-ha hoda. Paśla taho, jak jon pierastaŭ źjaŭlacca na ŭrokach, spravazdačy ab prahułach adpraŭlalisia na pradstaŭleny im vydumany adras.

Zhodna z materyjałami suda, Zachary Šejch byŭ viadomy ŭsim u škole jak Zak Chies (Zach Hess), jakomu 17 hadoŭ. Jon aktyŭna pierapisvaŭsia ź dziaŭčatami sa škoły ŭ sacyjalnych sietkach, chadziŭ na spatkańni, dabivaŭsia seksualnych kantaktaŭ, a ŭ niekatorych vypadkach adpraŭlaŭ dziaŭčatam hrošy i prasiŭ padzialicca ź imi zdymkami seksualnaha źmiestu.

Niekalki takoha kštałtu paviedamleńniaŭ i fota seksualnaha charaktaru palicyja znajšła ŭ Šejcha padčas praviadzieńnia pieratrusu ŭ lipieni 2023 hoda.

Mužčyna zajšoŭ tak daloka, što sustreŭsia ź siemjami niekatorych dziaŭčat-padletkaŭ. Tolki praz peŭny čas niekalki zakłapočanych baćkoŭ paviedamili ab svaich padazreńniach u palicyju.

Na sudu mužčyna pryznaŭ, što vydavaŭ siabie za padletka, ale admaŭlaŭ abvinavačvańni ŭ tym, što mieŭ seksualny kantakt z kim-niebudź ź dziaŭčat.

Sud pryhavaryŭ Šejcha da turemnaha źniavoleńnia pa piaci kryminalnych złačynstvach na termin ad 85 da 120 hadoŭ. Jak patłumačyŭ sudździa, taki praciahły termin źniavoleńnia abumoŭleny niekalkimi faktarami: kolkaściu vyjaŭlenych achviar, ich uzrostam, uździejańniem złačynstvaŭ Šejcha i praciahłaściu času ich ździajśnieńnia. Mužčyna maje prava na ŭmoŭna-daterminovaje vyzvaleńnie praz 40 hadoŭ.

Akramia hetaha, u spravie fihuruje 23-hadovaja dziaŭčyna, jakaja vydavała siabie za maci Šejcha, kali chadziła na sustrečy ŭ škołu. Jana nie pryznała siabie vinavataj i zajaviła, što Šejch joj manipuliravaŭ. Jana vypuščana pad zakład i čakaje suda.

• 4
• 1
• 8
• 6
• 6
• 3
• 2
• 0