Žonka biełaruskaha bodzibiłdara Illi «Holema» Jefimčuka raskazała, jak jon pamior u najlepšaj klinicy Prahi i što stała pryčynaj
Taksama Hanna Jefimčuk rastłumačyła, čamu viadomy bodzibiłdar ź Biełarusi raptoŭna kinuŭ vieści svaje sacsietki prykładna hod tamu.
Pra śmierć 36-hadovaha bodzibiłdara Illi «Holema» Jefimčuka stała viadoma niadaŭna. Ciapier jahonaja žonka raskazała YouTube-kanału GoB Channel, jakim było jaho žyćcio.
Raniej Illa žyŭ niekatory čas u ZŠA, potym pierajechaŭ u Dubaj. Ale, jak kaža žonka, bodzibiłdaru było składana žyć u tym śpiakotnym i vilhotnym klimacie. Jon ža byŭ sapraŭdnym vołatam — važyŭ 158 kiłahramaŭ pry roście 185 santymietraŭ.
— Jašče kali my žyli ŭ Dubai, Illa lataŭ u Maskvu ŭ kardyjałahičny centr na poŭnaje abśledavańnie serca. Tady ničoha krytyčnaha, što b pahražała žyćciu, nie znajšli. Ja navat učora znajšła dakumienty z taho abśledavańnia, pieračytała jašče raz — kłasičnaje serca spartoŭca, jaki spažyvaje niejkija rečyvy.
Praz toje, što Illi nie pasavaŭ dubajski klimat, siamja vyrašyła šukać novuju krainu dla žyćcia. A tut jakraz źjaviłasia takaja mahčymaść: bodzibiłdaru prapanavali ŭvajści ŭ dolu ŭ adnym jeŭrapiejskim brendzie. Spartoviec zacikaviŭsia biznes-prapanovaj.
— Illa znajšoŭ u Čechii daŭniaha znajomaha, jaki byŭ hatovy inviestavać hrošy ŭ prajekt. I voś my pierajechali ŭ Čechiju, kab zajmacca tym brendam adzieńnia. My pracavali razam, usio było dobra.
Ale minułym letam Illa zachvareŭ na karanavirus.
— Spačatku dumaŭ, što heta prosta prastuda. Potym jahony stan usio paharšaŭsia i paharšaŭsia. Jon nie treniravaŭsia, nie prymaŭ nijakich preparataŭ, šmat adpačyvaŭ.
U vyniku źviarnuŭsia da doktara. Terapieŭt zrabiŭ spartsmienu kardyjahramu, adpraviŭ zdavać analizy. A praź niekalki hadzin pryjšło paviedamleńnie: doktar raiŭ jak maha chutčej jechać u kardyjałahičny centr. Bodzibiłdara terminova špitalizavali z vostraj sardečnaj niedastatkovaściu. Daktary skazali, što heta vielmi častaja pabočnaja źjava paśla kavidu.
— Kali jon vyjšaŭ z kliniki, było jasna, što ni ab jakim bodzibiłdynhu havorki być nie moža. Illa vielmi adkazna da ŭsiaho pastaviŭsia. Jon mocna schudnieŭ i staŭ važyć niedzie 110 kiłahram.
Pa słovach Hanny, mienavita takija źmieny ŭ źniešnaści prymusili Illu zakinuć svaje sacyjalnyja sietki.
— Jon nie chacieŭ u takim vobrazie viartacca ŭ sacyjalnyja sietki. Usie ž pryvykli, što Illa vializny, što jon monstr. A tut… Jon usio jašče niezvyčajny, ale ŭžo nie monstr — prosta Illa Jefimčuk.
Žančyna kaža, što padčas pieršaha pryjezdu ŭ kliniku ŭ Illi frakcyja vykidu była ŭsiaho 15%. Užo tady daktary davali nie vielmi dobry prahnoz. Jany kazali, što navat z dapamohaj lekaŭ naŭrad ci atrymajecca dabicca frakcyi vykidu vyšej za 30%.
— Illa nie viartaŭsia da trenirovak. Jon tolki chadziŭ na prahułki. My dziela hetaha navat sabaku zaviali — kab jon chadziŭ ź im špacyravać. Potym my pierajechali za horad, stali žyć pobač z pryhožym parkam: uzhorki, skały…
Štodzień rankam Illa chadziŭ pa 5 kiłamietraŭ. Kožnyja dva miesiacy jon abśledavaŭsia ŭ klinicy.
— Frakcyja vykidu ŭsio palapšałasia i palapšałasia. U pačatku leta jana była ŭžo 45%. Uračy hetaha nie čakali. Doktar jaho paradavaŭ, što heta ŭžo amal zdarovaja frakcyja vykidu.
Hanna kaža, što Illa staŭ adčuvać siabie cudoŭna.
— Mnie zdajecca, toje, što adbyłosia paśla kavidu, Illa ŭspryniaŭ jak znak, što treba spyniacca i źmiaścić fokus uvahi na niešta inšaje, važniejšaje. I jon sapraŭdy źmiaściŭ fokus na čas, praviedzieny sa mnoj, na prahułki. I jamu heta padabałasia.
U budučym Illa płanavaŭ viarnucca ŭ kačałku, ale nie dla taho, kab znoŭ pieratvarycca ŭ monstra, a dla siabie. Jon adčuvaŭ siabie ŭžo davoli dobra, kab pačać treniravacca.
— Rankam 6 vieraśnia ja spuściłasia ŭniz, jon hatavaŭ śniadanak. Ja abniała jaho, pacałavała, adviarnułasia — i jon upaŭ. Ja patelefanavała ŭ chutkuju, dyśpietčar pačała tłumačyć, što treba rabić masaž serca. Chutka pryjechała vielmi apieratyŭna — mabyć, praz 6 chvilin. Jaho na viertalocie advieźli ŭ najlepšuju kliniku Prahi.
U pieršy dzień Hańnie skazali, što ŭ Illi było spynieńnie serca, jon pieražyŭ kliničnuju śmierć. Bodzibiłdara padklučyli da aparataŭ, jon znachodziŭsia ŭ štučnaj komie. Doktar skazaŭ, što na zdymku niama acioku mozhu, serca pačało bicca i jość spryjalny prahnoz.
Na druhi dzień, kali Hanna pryjechała, Illu sprabavali ŭžo vyvieści z komy.
— U jaho ŭžo byli pryadkrytyja vočy, ja ź im razmaŭlała. U jaho byli refleksy, jon mirhaŭ. Prybory pakazvali, što ŭ jaho pačaščajecca puls. Ja była ź im pobač, u mianie była nadzieja, što jon mianie čuje i što jon pračniecca.
Ale na treci dzień doktar skazaŭ Hańnie, što ŭ Illi znajšli aciok mozhu. Bodzibiłdar bolš tak i nie pryjšoŭ u prytomnaść. Paśla čarhovaha abśledavańnia daktary paćvierdzili śmierć mozhu.
Kamientary