U Dźvinie zavialisia mieduzy, a ŭ minskim vadajomie — amierykanskija pałasatyja raki
Paciapleńnie klimatu, jakoje adznačajecca apošnim časam u Biełarusi, upłyvaje i na žyviolny śviet. U internecie nabirajuć prahlady roliki pra niezvyčajnyja dla našaj krainy vidy žyvioł, paviedamlaje telekanał «Biełaruś 1».
Naprykład, u Dźvinie na Viciebščynie zavialisia mieduzy, videa ź jakimi dasłali hledačy «Biełaruś 1». Raniej hetyja marskija arhanizmy byli zaŭvažanyja ŭ viaślarnym kanale Bresta, a paśla navukoŭcy fiksavali ich znachodžańnie ŭ zakrytych karjerach u Mazyry, u Niomanie, Biarezinie i Pinie.
«Hety vid akvaryumny, i jon moža trapić u našy ekasistemy z akvaryumaŭ. Ale taksama jon moža pieranosicca i na apiareńni, i na nahach vadapłaŭnych ptušak. Tamu tut takoje dvajakaje pytańnie. Ale toje, što ŭ nas ludzi trymajuć u akvaryumach, heta treba kantralavać. Ničoha nielha vypuskać u našy pryrodnyja ekasistemy. Na pieršy pohlad nam zdajecca, što jakija-niebudź trapičnyja vidy nie pryžyvucca, ale na samoj spravie jany vielmi dobra ciapier va ŭmovach paciapleńnia klimatu stali ŭ nas pryžyvacca i adaptavacca», — tłumačyć situacyju viadučaja navukovaja supracoŭnica łabaratoryi hidrabijałohii NPC NAN Biełarusi pa bijaresursach Taćciana Lipinskaja.
A ŭ miežach Minska, kala Nacyjanalnaj biblijateki, znojdzieny škodny dla Biełarusi vid amierykanskaha pałasataha raka. U našu krainu jon trapiŭ z Polščy, upieršyniu jaho vyjavili ŭ basiejnie Niomana. Ciapier takoha raka raz-poraz bačać u Dniaproŭska-Buhskim kanale.
Pavodle acenak navukoŭcaŭ, dla našych zvykłych rakaŭ takija novyja susiedzi — prablema. Invaziŭnyja raki ŭ rekach Biełarusi taksama źjaŭlajucca z-za čałaviečaj chałatnaści.
«Hetych rakaŭ časam sami ludzi raśsialajuć. Voś heta vielmi drenna. Hety amierykanski pałasaty rak pierš za ŭsio drenny tym, što jon niasie na sabie chvaroby, jakija zabivajuć našyja abaryhiennyja vidy — daŭhapałaha i šyrakapałaha rakaŭ. Našyja raki pakul jašče nie prystasavanyja da isnavańnia ŭ asiarodździ hetych chvarob. I pierš za ŭsio heta račynaja čuma», — śćviardžaje viadučy navukovy supracoŭnik łabaratoryi hidrabijałohii NPC NAN Biełarusi pa bijaresursach Anatol Alachnovič.
U Pinsku ŭviali karancin z-za hetaha kryłataha škodnika
Navukoŭcy z Akademii navuk zaklikali biełarusaŭ iści prosta da ich, kali niedzie vyvudziać adnu rybinu
U biełaruskim vadajomie ŭpieršyniu vyłavili niezvyčajnuju rybinu
Kałumbija choča sterylizavać «kakainavych biehiemotaŭ», jakija razmnažajucca što durnyja
«Toje, što chtości siadzić za palityku, źjaŭlajecca častkaj piejzažu». Biełaruska, jakaja naviedała radzimu paśla doŭhaha pierapynku, padzialiłasia ŭražańniami99
Kamientary