U Čarkaskaj vobłaści kryminalny aŭtarytet vyklikaŭ na razborki byłoha abaroncu Bachmuta, źbiŭ i prymusiŭ vybačacca
Što pasłužyła pryčynaj dla kanfliktu i što budzie dalej?
Jak paviedamlaje Ofis hienieralnaha prakurora Ukrainy, prakuratura Śmielanskaha rajonu Čarkaskaj vobłaści zaviała kryminalnuju spravu na miascovaha kryminalnaha aŭtaryteta.
Pryčynaj pasłužyŭ apublikavany ŭ internecie videarolik kanfliktu pamiž kiroŭcami dvuch transpartnych srodkaŭ. Udzielniki razborak — miascovy kryminalny aŭtarytet Vadzim Dałacienka i vieteran bajavych dziejańniaŭ, udzielnik abarony Bachmuta Anatol Hančarenka.
Napiaredadni aŭtamabil Hyundai kryminalnaha aŭtaryteta padrezaŭ mašynu, u jakoj jechali baćki Hančarenki, stvaryŭšy takim čynam avaryjnuju situacyju. Baćki raskazali pra vypadak synu.
Syn vyrašyŭ razabracca z kiroŭcam Hyundai. Adšukaŭ aŭtamabil, ale sustrecca z kiroŭcam nie atrymałasia. Tady Anatol źniaŭ z aŭtamabila rehistracyjny znak i źviarnuŭsia praz sacyjalnyja sietki z prośbaj dapamahčy znajści ŭładalnika.
U chutkim časie z Hančarenkam źviazaŭsia Vadzim Dałacienka — kiroŭca Hyundai. Jany damovilisia sustrecca. Razmova pierarasła ŭ bojku.
Na miesca prybyli palicejskija, jakija vyklikali dla Hančarenki chutkuju i apytali ŭdzielnikaŭ kanfliktu. Paciarpieły admoviŭsia ad špitalizacyi i napisaŭ zajavu, u jakoj prasiŭ nie pravodzić dalejšych jurydyčnych dziejańniaŭ i spynić razhlad spravy.
Videa kanfliktu paźniej źjaviłasia ŭ internecie. Na im vidać, jak Dałacienka dvojčy bje Hančarenku, a zatym prymušaje jaho vybačycca za toje, što vajskoviec nibyta źniavažyŭ jaho na ŭvieś horad.
Paśla incydentu Hančarenka zapisaŭ videa z prabačeńniami i zajaviŭ, što ŭ vypadku na darozie vinavatyja jaho baćki. Na tvary mužčyny vidać ślady pabojaŭ.
Dałacienku nazyvajuć miascovym paŭkryminalnym aŭtarytetam. Jon niekalki razoŭ stanaviŭsia fihurantam kryminalnych spravaŭ za naniasieńnie cialesnych paškodžańniaŭ ci rabavańni.
U sakaviku 2024 hoda mužčyna atrymaŭ hod źniavoleńnia pa spravie ab rabavańni. Ale pakarańnie paźniej było zamieniena na ŭmoŭny termin.
Jak paviedamlajuć miascovyja ŚMI, paźniej z Hančarenkam sustrelisia palicejskija, paśla razmovy ź jakimi jon pahadziŭsia napisać zajavu ab naniasieńni jamu cialesnych paškodžańniaŭ.
Sprava nabyła hramadski rezanans. Jaje razhladali na pasiadžeńni meryi horada. A paśla zvarotu deputata Ukrainy Siarhieja Rudnika da ministra ŭnutranych spraŭ spravu ŭziali pad asabisty kantrol ministra i hienieralnaha prakurora.
Vadzima Dałacienku abviaścili ŭ vyšuk.
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary