Paśla pryjomu ŭ ministra Kubrakova aryštavali žančynu, jakaja šmat hadoŭ zmahajecca z «piedafilskim łobi»
Natalla Mikulič vyhladała prafiesijnaj skaržnicaj. Sud staŭ na bok ziacia, ale jana nie zdavałasia i kožny dzień pisała abvinavačvańni ŭ bok siłavikoŭ, jakija admovilisia zavodzić kryminalnuju spravu.
«Hety akaŭnt padtrymlivaje palityku Prezidenta Respubliki Biełaruś Łukašenki Alaksandra Ryhoraviča», — paznačana ŭ epihrafie na fejsbuk-staroncy 52-hadovaj Natalli Mikulič. Adnak heta nie dapamahło žančynie paźbiehnuć losu palitźniavolenaj u sučasnaj Biełarusi.
U fejsbuku i tyktoku ŭ Natalli Mikulič pa 5 tysiač padpisčykaŭ. Užo bolš za piać hadoŭ jana viadzie zaciaty boj ź piedafiłami i siłavikami, jakija, na jaje dumku, prykryvajuć piedafiłaŭ.
U raniejšych realijach jana b prosta atrymlivała adna za druhoj adpiski ad dziaržaŭnych orhanaŭ. A ŭ Biełarusi-2024 na jaje zaviali ažno try kryminalnyja spravy.
Kožny z artykułaŭ, jaki inkryminujecca žančynie, vykarystoŭvajecca dla raspravy z palityčnymi apanientami — «raspalvańnie varožaści abo razładu» (č. 1 art. 130 KK), «dyskredytacyja Biełarusi» (art. 369-1 KK) i «paklop» (art. 188 KK). Ale, jak vidać, moža prymianiacca i da prafiesijnych skaržnikaŭ — kali ich aktyŭnaść nadakučvaje siłavikam.
Chto takaja Natalla Mikulič? Žančyna rodam ź Vilejki, ale ŭrešcie asieła ŭ Vałožynie. Vyjšła zamuž, naradziła dačku. Prynamsi raniej Natalla zajmałasia drobnym biznesam, u jaje była krama adzieńnia. Adnak ciapier usia jaje publičnaja aktyŭnaść była pryśviečanaja piedafilskaj temie.
Da prezidenckich vybaraŭ — 2020 jana niekalki razoŭ repościła niezaležnyja miedyja (naprykład, Biełsat), ale paśla 16 žniŭnia 2020 hetaha bolš tak nie rabiła. Zhodna sa źviestkami prajekta Digital intelligence team, žančyna trapiła ŭ bazu «Biesparadki» — mahčyma, mienavita za heta. Praŭda, padobna, što dostup da staronki ŭ Adnakłaśnikach, na jakoj byli reposty, jana straciła, tamu nie mahła navat vydalić ich.
Svajo žyćcio ŭ apošnija hady Natalla pryśviaciła tamu, kab pakarać ziacia. Žančyna pierakonvała hramadstva ŭ tym, što jon hvałtavaŭ svaju dačku — adpaviedna, unučku Natalli.
Heta surjoznaje abvinavačvańnie, jakoje na ciapierašni momant zastajecca niepaćvierdžanym, tamu dziela abarony intaresaŭ dziciaci my nie budziem ukazvać imiony členaŭ siamji i padrabiaznaści historyi.
Paśla biaskoncaj kolkaści pravierak i pierapravierak śledčyja vyrašyli nie zavodzić kryminalnuju spravu, skarhi Natalli Mikulič nie dali efiektu. Da taho ž u mai 2023 hoda ziać žančyny padaŭ suprać jaje pazoŭ pra abaronu honaru i hodnaści. I vyjhraŭ.
Padčas zmahańnia ź ziaciem Natalla Mikulič abrała cikavuju stratehiju — jana stała zaciata padkreślivać svaju addanaść Alaksandru Łukašenku, spadziejučysia, što toj dapamoža. Taksama jana stała prychilnicaj partyi ŁDPB i ŭ niejki momant ustupiła ŭ jaje. Alehu Hajdukieviču jana pieryjadyčna dziakavała ŭ sacsietkach za niejkuju padtrymku, praŭda, nieviadoma, u čym jana była.
Repościła jana i inšyja praŭładnyja materyjały — naprykład, zvarot kiraŭnika Vałožynskaha rajvykankama nakont Dnia narodnaha adzinstva dy abviestku pra «akcyju Hieorhijeŭskaja stužka».
Ale ŭsio ž asnoŭnym kantentam, jaki jana rabiła kožny dzień, byli zvaroty da hramadskaści i razvažańni pra toje, što varta jak maha chutčej «pakarać vinavatych». Jana vajavała ŭžo nie tolki ź ziaciem, a pierakonvała padpisčykaŭ, što ŭsie dziaržaŭnyja struktury pakryvajuć piedafiłaŭ – i škoła dy dziciačy sadok, kudy chadziła ŭnučka, i orhany apieki, i miascovyja milicyjanty dy śledčyja.
14 lutaha 2024 hoda Natalla z mužam Siarhiejem schadziła na pryjom da ministra ŭnutranych spraŭ Ivana Kubrakova, jaki pryjazdžaŭ u Vałožyn. Heta dało joj vialikuju nadzieju, bo toj zahadaŭ pierapravieryć materyjały kryminalnaj spravy. Ale praz dva miesiacy žančyna źnikła z usich sacsietak.
Padpisčyki žančyny nie viedali, kudy jana padziełasia, ale adkaz źjaviŭsia ŭ raskładzie sudoŭ — žančyna, imavierna, pad vartaj i jaje buduć sudzić.
Sud nad joj pačaŭsia 9 vieraśnia ŭ Minskim abłasnym sudzie. Natalli Mikulič pahražaje da piaci hadoŭ kałonii sa štrafam.
«Naša Niva» — bastyjon biełaruščyny
PADTRYMAĆ«Skazaŭ chłopčyku, što bačyć u im akciorskija danyja». Viadomaha minskaha artysta sudziać pa piaci artykułach za piedafiliju
Piedafiły šukajuć achviar na papularnaj stryminhavaj płatformie. Jana dazvalaje im nazirać za dziećmi ŭ žyvym efiry
Sudziać 50-hadovaha nastaŭnika sa Śvietłahorska. Siarod artykułaŭ — zhvałtavańnie padletka i stvareńnie porna
«Pahladzicie, što narabili mužčyny». Maryna Mientusava — pra žančyn, što vyratujuć śviet, pracu ŭ Rasii, asabistaje žyćcio i «Obyčnoje utro»37
Kamientary