Polski sud źmiahčyŭ prysud taksistu-biełarusu, jaki na pierachodzie pad kajfam naśmierć źbiŭ viełasipiedystku. Voś čamu

Byŭ pad kajfam i pieravysiŭ chutkaść

Trahiedyja adbyłasia 9 lutaha 2023 hoda na vulicy Dambroŭskaha ŭ Poznani.

27-hadovaja viełasipiedystka Alaksandra pierajazdžała darohu. Jana nie śpiešyłasia, bo na tym pierachodzie była śpiecyjalnaja zona dla viełasipiedystaŭ.

Tym časam u jaje ŭrezaŭsia aŭtamabil Uber, za rulom jakoha znachodziŭsia 35-hadovy hramadzianin Biełarusi. Heta była tolki čaćviortaja jaho źmiena za rulom taksi, jon nie paśpieŭ vyvučyć horad i nie viedaŭ, dzie ludzi mohuć pierachodzić darohu.

Dziaŭčynu vyratavać nie ŭdałosia.

Ekśpiertyza vyjaviła, što ŭ momant DTZ mužčyna znachodziŭsia pad uździejańniem marychuany. Stupień narkatyčnaha apjanieńnia adpaviadała prykładna pałovie pramile ałkaholu. U sudzie jon admaŭlaŭ, što prymaŭ narkotyki ŭ toj dzień, chacia pryznavaŭ, što moh kuryć marychuanu ŭ papiarednija vychodnyja.

Ekśpierty ŭstanavili taksama, što ŭ momant DTZ biełarus jechaŭ z chutkaściu 66 kiłamietraŭ u hadzinu pry dapuščalnych 50. Kali b jon nie pieravysiŭ chutkaść, to paźbiehnuć DTZ u tych umovach usio roŭna nie ŭdałosia b, ale tady jon urezaŭsia b u viełasipied zzadu i, mahčyma, vynik dla dziaŭčyny byŭ by inšym.

Abarona damahałasia źmiakčeńnia prysudu, svajaki achviary — uzmacnieńnia

9 lutaha 2024 hoda, roŭna praz hod paśla trahiedyi, akruhovy sud Poznani pryznaŭ Alaksandra vinavatym u nienaŭmysnym ździajśnieńni DTZ sa śmiarotnym vynikam i kiravańni ŭ stanie narkatyčnaha apjanieńnia. Jaho pryhavaryli da 6,5 hod turmy, a taksama vynieśli pažyćciovuju zabaronu na kiravańnie aŭtamabilem. Taksama sud abaviazaŭ biełarusa vypłacić 30 tys. złotych kampiensacyi svajakam achviary i jašče 5 tys. złotych — u fond dapamohi achviaram.

Abarona paličyła prysud zanadta surovym, svajaki zahinułaj dziaŭčyny — zanadta miakkim. U vyniku spravu razhladaŭ sud druhoj instancyi.

Jaho rašeńnie akazałasia niečakanym. Sudździa Słavamir Enksa paličyŭ, što dziejańni viełasipiedystki taksama ŭ značnaj miery pryviali da trahiedyi.

Dziaŭčyna spyniłasia pierad pierachodam, pierakanałasia, što mašyna, jakaja jechała z druhoha boku, prapuskaje jaje, i vyjechała na pierachod. Na dumku suda, kali b viełasipiedystka pahladzieła naleva, to ŭbačyła b aŭtamabil Uber i nie vyjechała b na darohu.

U piešachodaŭ jość pryjarytet, a ŭ viełasipiedystaŭ — nie

Sudździa zaŭvažyŭ, što, u adroźnieńnie ad piešachodaŭ, u viełasipiedystaŭ, pavodle polskich PDR, niama pryjarytetu pry pierasiačeńni darohi. I toje, što mašyna, jakaja jechała ź inšaha boku vulicy, prapuściła dziaŭčynu, było žestam vietlivaści kiroŭcy, a nie jaho abaviazkam.

Kali b u anałahičnym stanoviščy znachodziŭsia piešachod, jon mieŭ by pryjarytet užo na padychodzie da piešachodnaha pierachodu. Ale sudździa źviarnuŭ uvahu, što, choć pavodziny piešachodaŭ i viełasipiedystaŭ u takim vypadku zdajucca padobnymi, jany traktujucca zakonam pa-roznamu.

Sprava biełarusa źmienić polskija PDR?

Advakat siamji achviary Andžej Jarasłaŭ Rejchielt ličyć, što hety praces pakazaŭ, nakolki niedaskanałyja ciapierašnija PDR u Polščy. Jon vykazaŭ nadzieju, što heta trahiedyja pryviadzie da taho, kab uraŭnavać abaronu piešachodaŭ i viełasipiedystaŭ.

• 0
• 5
• 0
• 2
• 0
• 3
• 0
• 0