Biełaruska pad mižnarodnaj abaronaj padałasia na dapamohu. Jaje danyja palaki adpravili biełaruskim čynoŭnikam

Taćciana (imia źmienienaje) znachodzicca ŭ Polščy pad mižnarodnaj abaronaj. Niadaŭna jana straciła pracu i źviarnułasia za dapamohaj pa biespracoŭi. Kab atrymać vypłaty ŭ poŭnym abjomie, joj spatrebiłasia paćvierdzić staž u Biełarusi. Tak jaje danyja akazalisia ŭ biełaruskich čynoŭnikaŭ, i ciapier žančyna niepakoicca ab biaśpiecy. Jaje historyju raskazała hazieta Wyborcza, zaŭvažyŭ Most.

Taćciana i jaje muž uciakli ź Biełarusi ŭ Polšču niekalki hadoŭ tamu, kali siłaviki zacikavilisia imi z-za ŭdziełu ŭ pratestach. U Varšavie biełaruska atrymała mižnarodnuju abaronu, a potym siamja pasialiłasia ŭ Silezskim vajavodstvie. Niadaŭna žančyna straciła pracu i źviarnułasia va ŭpraŭleńnie pa pracy (Urząd Pracy) za pryznačeńniem dapamohi.

Navošta spatrebilisia biełaruskija dakumienty

U Polščy pamier dapamohi pa biespracoŭi zaležyć ad stažu. Pry stažy ad 5 da 20 hadoŭ naznačajecca poŭny pamier dapamohi, pry stažy zvyš 20 hadoŭ dapamoha vypłačvajecca ŭ pamiery 120 pracentaŭ ad standartnaj staŭki. A voś pry stažy da piaci hadoŭ rabotnik moža pretendavać tolki na 80 % ad zvyčajnaj staŭki.

U Polščy biełaruska adpracavała ŭsiaho niekalki hod, tamu pa zmaŭčańni mahła atrymlivać tolki 80% sumy. Ale pamiž Polščaj i Biełaruśsiu dziejničaje damova ab sacyjalnym zabieśpiačeńni, u adpaviednaści ź jakoj biełaruski staž zaličvajecca ŭ ahulny pracoŭny staž u Polščy. Ale ŭličvajecca tolki toj čas pracy, jaki zajaŭnik moža paćvierdzić.

Pracoŭnaj knižki nie chapiła

Padčas sumoŭja va ŭpraŭleńni pa pracy ŭ Taćciany pravieryli dakumienty. Pry sabie ŭ jaje była biełaruskaja pracoŭnaja knižka, žančyna dumała, što hetaha dakumienta budzie dastatkova dla paćvierdžańnia stažu. Ale čynoŭniki papiaredzili, što danyja daviadziecca pravieryć u Biełarusi — u Ministerstvie pracy i sacabarony. Joj vydali błank, i jana jaho padpisała, ale zaniepakoiłasia, što tak jaje danyja apynucca ŭ rukach biełaruskich čynoŭnikaŭ.

U kancy lipienia zapoŭnieny biełaruski błank razam z ksierakopijaj pracoŭnaj knižki supracoŭniki ŭpraŭleńnia pa pracy vysłali ŭ Minsk. U vajavodskim užondzie ŭ Katavicy zapeŭnili, što nijakaj dadatkovaj infarmacyi biełaruskamu boku nie padali. Naprykład, u hrafie «miesca žycharstva» Taćciana pakazała koratka — Polšča.

— Padčas razmovy z čynoŭnikam žančyna nie zhadvała ab statusie abarony. Jana nie ŭniesła nijakich zaŭvah, akramia prośby nie paviedamlać svoj adras, — prakamientavała haziecie Wyborcza namieśnik načalnika adździeła prafiesijnaj mabilnaści Upraŭleńnia pracy ŭ Katavicy Alaksandra Žurak.

Ale Taćciana śćviardžaje, što joj naŭprost skazali, što pa-inšamu spravy nie vyrašyć, akramia jak dasłaŭšy dakumienty ŭ Biełaruś. I jana spadziavałasia, što čynoŭniki viedajuć, što robiać.

Nie pieršy vypadak

Heta nie pieršy vypadak, kali dziaržaŭnyja orhany Polščy nakiroŭvajuć infarmacyju pra biełarusaŭ pad mižnarodnaj abaronaj u Biełaruś.

U krasaviku stała viadoma, što ŭ pasolstva Biełarusi byli nakiravanyja spravy niekatorych biełarusaŭ, jakija majuć status dadatkovaj abarony, kali jany źviarnulisia pa zamienu pravoŭ kiroŭcy na polskija. Daviedka z ambasady polskim čynoŭnikam spatrebiłasia dla paćvierdžańnia, što biełaruskaje paśviedčańnie kiroŭcy sapraŭdnaje.

Paśla hetyja dziejańni supracoŭnikaŭ užonda byli pryznanyja pamyłkaj: danyja ludziej pad mižnarodnaj abaronaj nie mohuć pieradavacca ŭ dziaržavu, dzie im pahražaje niebiaśpieka. Dla takich ludziej praduhledžany sproščany paradak zamieny pravoŭ kiroŭcy i šerahu inšych pracedur.

Tady biełaruskija demakratyčnyja siły źviartali ŭvahu ŭładaŭ Polščy na ​​takija pamyłki pa niaviedańni i adznačali nieabchodnaść praduchilić ich u budučyni. Incydenty pryviali da taho, što MZS Polščy padrychtavała list z tłumačeńniami i razasłała jaho ŭ šerah ministerstvaŭ. U dakumiencie za podpisam kiraŭnika MZS Radasłava Sikorskaha čynoŭnikam tłumačyli, što pieradača źviestak biełaruskamu boku moža być niebiaśpiečnaj dla ludziej pad mižnarodnaj abaronaj i členaŭ ich siemjaŭ u Biełarusi.

Spravu spyniać, a novuju zajavu razhledziać biez pryciahnieńnia Biełarusi

Upraŭleńnie pa pracy ŭ Katavicy atrymała taki list tolki 13 žniŭnia, užo paśla taho, jak dakumienty Taćciany byli adpraŭlenyja biełaruskamu boku.

Ciapier čynoŭniki havorać, što nieadkładna spyniać spravu. A biełaruska zmoža padać novuju zajavu na dapamohu ŭ poŭnym pamiery, i na hety raz jana budzie razhledžana biez pryciahnieńnia biełaruskaha ministerstva.

Heta nie vyrašyć pytańnia biaśpieki, ale, mahčyma, skarocić termin razhladu spravy. Pieršy raz žančynu papiaredzili, što z-za składanaj pracedury paćvierdžańnia jano moža razhladacca da 2025 hoda.

Što rabić, kali vy apynulisia ŭ takoj samaj situacyi

Kali vy majecie status uciekača ci dadatkovaj abarony i prachodzicie niejkuju praceduru, jakaja patrabuje ŭ ahulnym vypadku paćvierdžańnia dakumientaŭ u Biełarusi, papiaredźcie čynoŭnikaŭ ab svaim statusie i nahadajcie im ab niedapuščalnaści pieradačy infarmacyi biełaruskamu boku.

• 1
• 4
• 5
• 16
• 1
• 0
• 8
• 0