MZS Biełarusi paskardziŭsia ŭ AAN nakont «pravakacyjnych dziejańniaŭ» Ukrainy
MZS Biełarusi praciahvaje aktyŭnaść z nahody nibyta źniščeńnia nad Biełaruśsiu 13 ukrainskich bieśpiłotnikaŭ.
U suviazi ź incydentam z ukrainskimi BPŁA na terytoryi Respubliki Biełaruś biełaruski bok nakiravaŭ zvarot staršyni Savieta Biaśpieki AAN, u jakim pryciahnuŭ uvahu da nieabchodnaści spynieńnia Ukrainaj pravakacyjnych dziejańniaŭ, jakija niasuć pahrozu ŭciahvańnia Biełarusi va ŭzbrojeny kanflikt i jaho raspaŭsiudžvańnia na inšyja krainy rehijonu, paviedamlaje pres-słužba MZS.
U zamiežnapalityčnym viedamstvie zajavili, što kali jašče raz padobnyja fakty paŭtoracca, to Biełaruś pakidaje za saboj prava na sklikańnie pazačarhovaha pasiedžańnia Rady Biaśpieki AAN.
Nijakich pratestaŭ suprać palotaŭ rasijskich bieśpiłotnikaŭ nad našaj krainaj, Biełaruś nie vykazvała.
Učora ŭ MZS Biełarusi byŭ zaprošany dypłamat ES. Pa viersii biełaruskaha boku, na ŭkrainskim dronie, jaki nibyta źbili nad Biełaruśsiu, była markiroŭka ES.
Pra toje, što SPA Biełarusi 9 žniŭnia źbiła nad Mahiloŭskaj vobłaściu 13 bieśpiłotnikaŭ, jakija lacieli z Ukrainy, zajaviŭ učora namieśnik načalnika fakulteta Hienštaba Vajennaj akademii Biełarusi Andrej Bahadziel.
Adnak, pavodle manitorynhavaj hrupy «Biełaruski Hajun», 9 žniŭnia 2024 hoda padčas vyletaŭ avijacyi US RB nijakich dronaŭ vyjaŭlena nie było. Taksama nie było nijakich zapuskaŭ rakiet sa źniščalnika SU-30 abo viertalota Mi-24.
Mienavita na padstavie nibyta źbitych dronaŭ Łukašenka zahadaŭ uzmacnić hrupoŭku biełaruskaj armii na miažy z Ukrainaj.
10 žniŭnia na telekanale ANT źjaviłasia videa ad Ministerstva abarony Biełarusi z reštkami, jak śćviardžajecca, źbitych ukrainskich bieśpiłotnikaŭ.
Kamientary