U Nihieryi padčas pratestaŭ aryštavali 7 palakaŭ za «razmachvańnie rasijskimi ściahami». Imi akazalisia studenty i vykładčyk Varšaŭskaha ŭniviersiteta
U spravu ŭmiašaŭsia MZS Polščy i patłumačyŭ svaju viersiju padziej.
6 studentaŭ i adzin vykładčyk z Varšaŭskaha ŭniviersiteta byli zatrymanyja nihieryjskimi śpiecsłužbami padčas masavych demanstracyj i biesparadkaŭ pa ŭsioj krainie. Aficyjnaja pryčyna aryštu — «razmachvańnie rasijskimi ściahami», paviedamlaje nihieryjski partał The Spectacles sa spasyłkaj na Departamient dziaržaŭnych słužbaŭ Nihieryi (DSS).
Pavodle DSS, zatrymanyja polskija hramadzianie dałučylisia da biesparadkaŭ u bujnym paŭnočnym nihieryjskim horadzie Kano, zdymali pratesty na kamiery i razmachvali rasijskimi ściahami, što stała častkaj bolš maštabnaj i tryvožnaj tendencyi pa ŭsioj krainie, kali nihieryjskija demanstranty stali vynosić rasijskija ściahi i ahitavać za źmienu ŭłady na karyść Rasii.
U spravu terminova ŭmiašaŭsia MZS Polščy i asprečyŭ abvinavačańni suprać svaich hramadzian.
«Nihieryjski bok prainfarmavaŭ nas, što našy studenty i vykładčyk, mahčyma, z-za ich niaviedańnia miascovych zakonaŭ byli pamyłkova ŭciahnutyja ŭ demanstracyi. Mnie składana pavieryć u toje, što jany pry hetym razmachvali rasijskimi ściahami, ale my robim usio mahčymaje, kab našy hramadzianie chutka i biaśpiečna viarnulisia dadomu», — zajaviŭ namieśnik ministra zamiežnych spraŭ Polščy Jakub Višnieŭski, pieradaje telekanał TVP World.
Telekanał adznačaje, što polski konsuł u Nihieryi ŭžo sustreŭsia z zatrymanymi studentami i ich vykładčykam u piatnicu dniom i što ich vyzvaleńnie stała pryjarytetam dla MZS na hetyja vychodnyja.
Nahadajem, u šmatlikich haradach i rehijonach Nihieryi z 1 žniŭnia pačalisia masavyja antyŭradavyja pratesty z-za prablem z karupcyjaj, vysokaj inflacyi i hoładu. U demanstracyjach i biesparadkach udzielničajuć sotni tysiač nihieryjcaŭ, častka ź jakich pierakryvaje aŭtamahistrali, zachoplivaje administratyŭnyja budynki i zmahajecca z palicyjaj.
Siarod pratestoŭcaŭ taksama byli zaŭvažanyja ludzi z rasijskimi ściahami, jakija zaklikajuć da vajskovaha pieravarotu ŭ Nihieryi i źviartajucca da Uładzimira Pucina, «kab toj ich vyratavaŭ».
Fakt najaŭnaści rasijskich ściahoŭ u častki pratestoŭcaŭ vyklikaŭ rezkuju reakcyju z boku nihieryjskich uładaŭ. Tak, prezident krainy Boła Cinubu sklikaŭ terminovuju naradu z kiraŭnikami dziaržaŭnych śpiecsłužb i armii, na jakoj abmiarkoŭvalisia kontrmiery suprać prarasijskich ahientaŭ upłyvu.
«My dakładna i adnaznačna papiaredžvajem, što nie dazvolim nikomu padymać zamiežny ściah u Nihieryi. Heta dziaržaŭnaja zdrada, i jana budzie razhladacca nami mienavita tak», — pryhraziŭ načalnik Hienštaba nihieryjskaj armii Krystafier Musa adrazu paśla narady z prezidentam.
Na fonie hetaha pasolstva Rasii ŭ Nihieryi paśpiašałasia zajavić miascovaj presie, što nie maje nijakaha dačynieńnia da źjaŭleńnia rasijskich ściahoŭ u nihieryjskich pratestoŭcaŭ, ale pry hetym dadała, što «rasijskija ściahi — heta asabisty vybar asobnych nihieryjcaŭ».
U toj ža čas śpiecsłužby Nihieryi zajavili miascovaj presie, što ŭ ich jość dokazy sprobaŭ Rasii zładzić vajskovy pieravarot u krainie.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary