U minułuju sieradu ŭ Iranie paviesili nie mienš za 29 čałaviek, u tym liku 26 asudžanych padčas hrupavoha pakarańnia ŭ adnoj z turmaŭ krainy, paviedamlajuć pravaabarončyja arhanizacyi. Za dzień da hetaha mižnarodnaja supolnaść asudziła pakarańnie adnaho z udzielnikaŭ pratestaŭ 2022 hoda, piša Ruskaja słužba Bi-bi-si.
Narviežskaja arhanizacyja Iran Human Rights paviedamiła, što 26 čałaviek byli pakaranyja ŭ turmie Hiezielchiezar u horadzie Kieredž niedaloka ad Tehierana i jašče troje — u haradskoj turmie Kieredža.
Pavodle danych AAN, u hetym hodzie ŭ Iranie było pryviedziena ŭ vykanańnie pa mienšaj miery 345 śmiarotnych prysudaŭ, siarod jakich 15 — u dačynieńni da žančyn.
Pakaranyja śmierciu, siarod jakich byli dva hramadzianina Afhanistana, byli asudžanyja za zabojstvy, narkotyki i zhvałtavańni.
Inšyja pravaabarončyja hrupy, uklučajučy infarmacyjnaje ahienctva Human Rights Activists (HRANA), jakoje bazujecca ŭ ZŠA, i Centr pravoŭ čałavieka ŭ Iranie (CHRI), taksama paćvierdzili pakarańnie prynamsi dvuch dziasiatkaŭ čałaviek u Kieredžy.
Pravaabarončyja hrupy nieadnarazova abvinavačvali Iran u vykarystańni śmiarotnaha pakarańnia dla nahniatańnia strachu ŭ hramadstvie paśla pratestaŭ 2022 hoda. Pavodle acenak pravaabaroncaŭ, u Iranie štohod karajuć śmierciu bolš ludziej, čym u luboj inšaj krainie śvietu, akramia Kitaja.
«Kali ad mižnarodnaj supolnaści nie budzie nieadkładnaj reakcyi, sotni ludziej mohuć stać achviarami mašyny zabojstvaŭ Isłamskaj Respubliki ŭ najbližejšyja miesiacy», — zajaviŭ dyrektar IHR Machmud Amiry-Mahadam.
Pravaabarončyja arhanizacyi taksama asudzili pakarańnie 34-hadovaha Hałamreza Rezajei, asudžanaha za zabojstva pałkoŭnika Korpusa vartavych Isłamskaj revalucyi padčas pratestaŭ, jakija ŭspychnuli ŭ Iranie ŭ 2022 hodzie. Aktyvisty zajavili, što jaho pryznańnie było atrymana pad katavańniami.
Hałamreza Rasajei — pradstaŭnik kurdskaj etničnaj mienšaści Irana. Jon staŭ dziasiatym čałaviekam, pakaranym u Iranie ŭ suviazi sa šmatmiesiačnymi pratestami, jakija ŭspychnuli ŭ vieraśni 2022 hoda paśla śmierci 22-hadovaj aryštavanaj Machsy Amini. Jon byŭ paviešany ŭ turmie horada Kiermanšach u aŭtorak.
Kamientary