Va Ukrainie ŭzbrojenaja hrupoŭka z 2014 hoda rychtavałasia da akupacyi Adesy Rasijaj. U jaje składzie — biełaruska

U Adesie z maja 2024 hoda rasśledujuć spravu pavodle čatyroch artykułaŭ Kryminalnaha kodeksa Ukrainy, jakija tyčacca dziaržaŭnaj zdrady, stvareńnia niezakonnaj vajenizavanaj arhanizacyi, niezakonnaha abychodžańnia sa zbrojaj i apraŭdańnia rasijskaj ahresii, piša «Radyjo Svaboda».

Jak vyśvietlili śledčyja ŭ časie dasudovaha rasśledavańnia, ukrainski advakat, jaki naradziŭsia ŭ Sievastopali, stvaryŭ niezakonnaje vajenizavanaje farmavańnie, jakoje rychtavałasia da sadziejničańnia Uzbrojenym siłam Rasii ŭ vypadku akupacyi Adesy.

Śledčyja ŭžo znajšli dokazy datyčnaści da hetaha farmavańnia 23 hramadzian Ukrainy, Rasii, Kyrhyzstana, Biełarusi, ZŠA i Niamieččyny.

Pavodle śledstva, hrupoŭka pad nazvaj «OBP» mieła arhanizacyjnuju strukturu vajskovaha typu. U joj patrabavali žorstkaj dyscypliny i padparadkavańnia adnamu čałavieku. U arhanizacyi pravodzili lekcyi, zaniatki pa fizičnaj padrychtoŭcy, stralbie i rukapašnym bai. U hrupoŭcy dziejničali piać asnoŭnych padraździełaŭ: šturmavaja hrupa, snajpierskaja hrupa, raźviednaja hrupa, a taksama hrupy apieratyŭnaha zabieśpiačeńnia i suviazi.

Bolšaja častka inšaziemnych udzielnikaŭ farmavańnia nielehalna znachodzilisia va Ukrainie. Papiarednie vyśvietlili, što ŭ jaje skład uvachodzili 16 hramadzian Ukrainy, troje hramadzian Rasii i pa adnym hramadzianinie Biełarusi, Kyrhyzstana, ZŠA i Niamieččyny. Usie jany mieli svaje pazyŭnyja.

Viadoma, što hramadzianin ZŠA źjaŭlajecca ŭradžencam Simfieropala.

Jak stała viadoma Svabodzie, pavodle śledstva, u farmiravańnie ŭvachodziła hramadzianka Biełarusi, jakaja ŭ lipieni 2023 hoda nibyta atrymała va Ukrainie dazvoł na stałaje pražyvańnie. Jaje pazyŭny — Vołcha.

U časie pieratrusu pa miescy pražyvańnia arhanizatara vajenizavanaha farmavańnia znajšli 64 adzinki ahniastrelnaj zbroi i vialikuju kolkaść bojeprypasaŭ da jaje.

Pavodle śledstva, hrupoŭka pierajechała ŭ Adesu ŭ 2014 hodzie paśla akupacyi Rasijaj Kryma. Z taho času ŭ jaje skład pačali vierbavać inšych udzielnikaŭ i rychtavacca da padryŭnoj dziejnaści suprać Ukrainy.

• 12
• 0
• 0
• 13
• 6
• 0
• 8
• 0