Łukašenka: KDB, Minabarony i viertykal ułady ničoha nie zrobiać bieź milicyi
Alaksandr Łukašenka na sustrečy ź ministrami ŭnutranych spraŭ krain SND zaklikaŭ zhurtavacca i vyrašyŭ padkreślić rolu milicyi, paviedamlaje jaho pres-słužba.
«My vydatna bačym, jak siońnia našy krainy sprabujuć pasvaryć i raskałoć znutry. My znachodzimsia pad presam absalutna niezakonnych adnabakovych ekanamičnych sankcyj. Suprać našych narodaŭ viadziecca piermanientnaja hibrydnaja vajna. I kožnaja z krain SND užo pieražyła chacia b adnu kalarovuju revalucyju, jakaja pa svajoj sutnaści źjaŭlajecca sprobaj dziaržaŭnaha pieravarotu», — skazaŭ Alaksandr Łukašenka.
Jon kanstatavaŭ, što nie stała vyklučeńniem i Biełaruś, dzie ŭ 2020 hodzie raspačali sprobu buntu i nibyta chacieli «šturmam pieraviarnuć krainu».
«Raźličvali, jak fašysty, na blickryh. Dziejničali pa viadomych mietadyčkach. My tady nie dapuścili razvału krainy i pačatku ŭ joj hramadzianskaj vajny. I raspačali šerah radykalnych krokaŭ pa źmianieńni situacyi ŭ Biełarusi», — zajaviŭ jon.
Adnoj z najvažniejšych zadač dla dziaržaŭ — udzielnic SND i MUS hetych krain jon nazvaŭ procidziejańnie jak unutranamu, tak i źniešniamu teraryzmu, jaki nabiraje abaroty asabliva ŭ suviazi ź dziejnaściu Zachadu (pierš za ŭsio ZŠA) va Ukrainie.
«Tam nie Ukraina robić heta ŭsio, tam robiać usie amierykancy, rukami ZŠA (usio robicca)», — čarhovy raz vysunuŭ kanśpirałahičnuju teoryju Łukašenka.
«Baraćba z teraryzmam — heta dla nas najvažniejšaja zadača. Ja zaŭsiody svajmu ministru kažu: bieź milicyi my ničoha nie zrobim. Ni KDB, ni Ministerstva abarony, ni viertykal ułady, jakaja ŭ nas žorstkaja, — nichto ničoha nie zrobić bieź milicyi», — padkreśliŭ Alaksandr Łukašenka.
Jon dadaŭ, što ŭ MUS usie — ad učastkovaha da ministra — vałodajuć poŭnaj infarmacyjaj ab apieratyŭnaj abstanoŭcy ŭ krainie, tamu ad ich raboty i hramatnych dziejańniaŭ vielmi mnohaje zaležyć u luboj krainie.
«Hałoŭnaje — atrymać papieradžalnuju infarmacyju. Kali jana ad vas pastupaje, značyć, my pačynajem dziejničać», — rastłumačyŭ Łukašenka.
Kamientary