«Pracoŭnaje miesca ź vidam na raku». Jak ajcišniki žyvuć u kalivinhu na Niomanie

Alina ŭ paście pieraličvaje plusy kalivinha: 

• Idealnaje miesca dla addalenych pracaŭnikoŭ: cišynia, pryroda, zručnaja pracoŭnaja prastora.
• Mahčymaść pašyryć koła znosin: paznajomicca z novymi ludźmi, jakija pracujuć u roznych śfierach.
• Aktyŭny adpačynak: spłavy, kvadracykły, konnyja špacyry — usio heta dastupnaje na zapyt.
• Raznastajny kalektyŭ: u hrupie mohuć być nie tolki prahramisty, ale i repietytary, dyzajniery, markietołahi, videohrafy i inšyja addalenyja pracaŭniki. 

Niekatoryja kamientary pad pastom piesimistyčnyja:

• «Štości mnie padkazvaje, abstanoŭka tam nie vielmi pracoŭnaja. Ale jak adpačynak — całkam narmalna. Pijanierłahier dla darosłych».
• «Zasialicca z randamnymi ludźmi ŭ adzin budynak, dzie treba pastajanna pierasiakacca — strašniej i nie prydumaješ dla addalenaha pracaŭnika. Jak by sutnaść addalenaj pracy i palahaje ŭ tym, kab pamienš (usich vas) bačyć».
• «Kamary vyjšli na novy ŭzrovień zavablivańnia».

Alina niadaŭna skončyła IT-kursy, ciapier u pošuku pracy, jaje muž — prahramist, pracuje addalena. Para žyvie ŭ kvatery ŭ Minsku i, kali nastaje leta, adčuvaje, što im «krytyčna nie chapaje pryrody — jak byccam i leta, i žyćcio prachodzić mima», — raskazvaje naša surazmoŭnica. A jašče, narakaje Alina, praz addalenuju pracu i joj, i mužu nie chapaje kamunikacyi i novych znajomstvaŭ. 

Idealnym varyjantam dla pary zdavaŭsia kalivinh: «pryroda + novyja znajomstvy + cikavy volny čas» — muž Aliny šukaŭ takija ŭ Biełarusi i nie znachodziŭ. Varyjanty byli tolki za miažoj. 

— I raptam niadaŭna my vypadkova natknulisia ŭ Instagram na rekłamu kalivinha na bierazie Niomana i vyrašyli zapisacca.

Alina raskazvaje, što jany spynilisia ŭ vialikim domie: u im jość pakoi na dvaich, ale jość i na kampaniju z 6 čałaviek, raśsialeńnie — pa hiendarnaj prykmiecie. A jašče možna žyć u svaim namiocie.

Haściej kormiać try razy na dzień. Dniom usie pracujuć — pracoŭny čas pamiž saboj uzhadnili. Miescaŭ dla hetaha dastatkova, Alina naličyła da 20. «Samaje krutoje — na vulicy ź vidam na raku»: tam staić stoł i łavačka. Vialiki pakoj z kaminam usie vykarystoŭvajuć jak mitynh-rum. 

Pavialičyć

Viečarami hości adpačyvajuć, hulajuć u «nastołki», razmaŭlajuć la vohnišča, chodziać kupacca. Chtości navat źbiraŭ hryby — les zusim pobač. Muž Aliny rybačyŭ. 

Arhanizatary kalivinha prapanoŭvajuć haściam roznyja aktyŭnaści: katańnie na kvadracykłach i bajdarkach, možna zajmacca vierchavoj jazdoj.

— Byli siarod nas i tyja, chto pracavaŭ pozna ŭviečary, jany sychodzili albo ŭ inšaje pamiaškańnie, albo siadzieli ŭviečary z nami — im heta nie zaminała.

Alina adznačaje, što dla jaje byŭ vielmi karysny dośvied znosin ź inšymi ajcišnikami — susiedzi pa kalivinhu nie tolki dzialilisia paradami pa pošuku pracy, chtości navat adpraviŭ jaje reziume ŭ HR-adździeł svajoj kampanii».

Pabudavać kalivinh maryŭ kaliści i zasnavalnik PandaDoc Mikita Mikada. Jon žyŭ u takim u razhar pandemii: «Pustujučy pansijanat zasialili blizkimi pa duchu pracaŭnikami ličbavaj industryi. Na piku było čałaviek 30: my razam hatavali, hulali ŭ valejboł, pracavali, śpiavali i tancavali. Było dobra».

Mikita pisaŭ, što «ludziej, jakija pracujuć addalena, stanovicca ŭsio bolš i bolš», i pytaŭsia ŭ svaich padpisčykaŭ u fejsbuku, ci chacieli b jany dałučycca da Mikady. Achvotnych było niamała.

• 1
• 2
• 0
• 0
• 0
• 0
• 0
• 0