Kijeŭ zajaŭlaje pra svaju prychilnaść normam mižnarodnaha prava.
Nihier zajaviŭ u aŭtorak, što razryvaje dypłamatyčnyja adnosiny z Ukrainaj, abvinavaciŭšy Kijeŭ u padtrymcy terarystyčnych hrup. Dvuma dniami raniej ab takim ža rašeńni abviaściŭ urad Mali, paviedamlaje Rasijskaja słužba Radyjo Svaboda.
Ułady Nihiera abviaścili pra svoj namier prasić Radu Biaśpieki AAN sabracca na śpiecyjalnaje pasiadžeńnie, pryśviečanaje abmierkavańniu ŭkrainskaj «ahresii». Z takoj zajavaj vystupiŭ pa telebačańni aficyjny pradstaŭnik urada Nihiera.
Jak piša France-24, Nihier i Mali kirujucca vajennymi ŭradami, jakija niadaŭna pryjšli da ŭłady hvałtoŭnym šlacham, u vyniku pieravarotu. Nieŭzabavie abiedźvie hetyja krainy vyjšli z abaronnych pahadnieńniaŭ z Francyjaj i źviarnulisia pa vajennuju dapamohu da Rasii.
«Urad Respubliki Nihier, całkam salidarny z uradam i narodam Mali, vyrašyŭ, abapirajučysia na svoj suvierenitet, razarvać dypłamatyčnyja adnosiny pamiž Respublikaj Nihier i Ukrainaj. Heta rašeńnie ŭstupaje ŭ siłu nieadkładna», — havorycca ŭ pastanovie ŭładaŭ afrykanskaj dziaržavy.
Pradstaŭnik urada Mali zajaviŭ u niadzielu, što jahonaja kraina pajšła na razryŭ adnosin z Ukrainaj paśla vykazvańnia pradstaŭnika Hałoŭnaha ŭpraŭleńnia raźviedki Andreja Jusava. Ukrainski vajskovy pradstaŭnik nibyta skazaŭ: «Paŭstancy atrymali ŭsiu nieabchodnuju infarmacyju, u jakoj mieli patrebu». Nijakich tłumačeńniaŭ da hetaj zajavy Jusaŭ nie daŭ.
Urad Nihiera nazvaŭ słovy ŭkrainskaha pradstaŭnika aburalnymi i nieprymalnymi.
Kiraŭnik MZS Ukrainy Dźmitra Kuleba zajaviŭ u paniadziełak, što Ukraina «biezumoŭna vykonvaje normy mižnarodnaha prava» i «rašuča abviarhaje abvinavačvańni z boku pierachodnaha ŭrada Mali». Ministr dadaŭ, što škaduje ab «paśpiešnym» rašeńni Nihiera.
Biezydejnaja i biezhustoŭnaja chałtura. Kancepcyju novaha histaryčnaha muzieja dla Łukašenki rychtavali ŭ śpiešcy6
Kamientary
A ŭ čym hetyja adnosiny palahali raniej?