Čamu Łosika pavinny byli vyzvalić u abmien na rasijskich špijonaŭ i čamu heta nie adbyłosia
Publicyst Siarhiej Navumčyk źviartaje ŭvahu na losy dvuch žurnalistaŭ «Radyjo Svaboda», jakija znachodziacca ŭ biełaruskich kałonijach i jakija pavinny byli vyjści ź ich naroŭni z rasijskaj žurnalistkaj hetaha ŚMI Ałsu Kurmašavaj. Ale hetaha nie adbyłosia.
«Dumaju, maje racyju Pavieł Łatuška, kažučy, što niadaŭni abmien byŭ vynikam supracoŭnictva CRU, SZV (Słužby źniešniaj vyviedki RF) i FSB RF.
Ale heta tolki adzin, techničny ŭzrovień. Śpiecsłužby (i ZŠA, i RF) vykonvali palityčnuju zamovu vyšejšaha kiraŭnictva. Za vyklučeńniem dvuch-troch čałaviek z abodvuch bakoŭ, pra jakich śpiecsłužbam mahli być dadzienyja piersanifikavanyja ŭkazańni (skažam, Pucin byŭ zacikaŭleny ŭ vyzvaleńni Krasikava, Bajden — Hierškoviča, Kurmašavaj i, da jaho zabojstva, Navalnaha), nakolki ja mahu ŭjavić, pa astatnich davalisia ahulnyja, nie piersanifikavanyja ŭkazańni, i nie na ŭzroŭni Bajdena — najchutčej, na ŭzroŭni Salivana, daradcy ŭ spravach nacbiaśpieki.
I ŭkazańni byli takoha kštałtu: plus — piać-šeść rasiejskich palityčnych fihur, jakija ŭ turmach, jakich kankretna — vyrašajcie pa situacyi. I kali b było vymaŭlena słova «i biełaruskich» — pieramoŭščyki sa śpiecsłužbaŭ heta mieli b na ŭvazie. I prapanavali b dałučyć da rasiejskich palitviaźniaŭ niekalkich biełaruskich.
Va ŭsiakim razie, žurnalistaŭ amierykanskaj karparacyi «Radyjo Svabodnaja Jeŭropa — Radyjo Svaboda», jakaja finansujecca Kanhresam ZŠA, Ihara Łosika (15 hadoŭ uzmocnienaha režymu) i Andreja Kuźniečyka (6 hadoŭ uzmocnienaha režymu), a taksama hramadzianina ZŠA Juryja Ziańkoviča, — uklučyć u śpis prapanovy Kramlu byli ŭsie padstavy. I ja pierakanany, što Łukašenku daviałosia b ich (albo niekaha ź ich) vyzvalać — jak daviałosia jamu adrapartavać Pucinu «Budiet ispołnieno, tovariŝ načalnik!» i vyzvalać niamieckaha hramadzianina», — piša Navumčyk.
Publicyst źviartaje ŭvahu, što pra los Łosika i Kuźniečyka i kiraŭnictva karparacyi RFE/RL rehularna nahadvaje, i dziaržsakratar Blinkien pra ich kazaŭ, i Śviatłana Cichanoŭskaja źviartała ŭvahu Rady biaśpieki AAN.
Ale, niahledziačy na heta, u vysokich čynoŭnikaŭ Biełaha domu ŭ momant, kali addavałasia rasparadžeńnie, słova «Biełaruś» u mazhach nie ŭźnikła. Jak nie ŭźnikła ŭ Šolca dumka pra Kaleśnikavu (chaj i nie hramadzianku FRH, ale stałuju žycharku Niamieččyny, jakaja tam płaciła padatki — pry tym što jaje vyzvaleńnie Šolcu było vyhodna dla apraŭdańnia niamieckamu hramadstvu vydačy FSBšnaha zabojcy), padkreślivaje Navumčyk.
«I heta śviedčyć pra toje, što Biełaruś nie toje što nie znachodzicca ŭ pryjarytecie realnaj mižnarodnaj palityki, ale i na pieršaj pieryfieryjnaj linii ŭvahi. Va ŭsiakim razie, pakul što. Biez asensavańnia hetaj iściny, paŭtaraju, ruchacca dalej niemahčyma», — piša publicyst.
Kamientary