Dzieci špijonaŭ Dulcavych tolki pry abmienie daviedalisia, što jany rasijanie, a nie arhiencincy

Maładaja para hramadzian Arhienciny z dvaimi dziećmi cicha žyvie ŭ pryharadzie stalicy Słavienii Lublany. Baćka Ludvih Hiš kožny dzień na viełasipiedzie jeździć u svoj IT-startap, jaki raźmiaščajecca ŭ niepryvabnym budynku na ŭskrainie horada i akazvaje pasłuhi vobłačnaha chostynhu. Žonka Maryja Majer-Muńjas kiruje mastackaj anłajn-halerejaj. U pary dvoje dziaciej, jakija naviedvajuć Brytanskuju mižnarodnuju škołu.

Jak piša The Wall Street Journal, siamja zaŭsiody svoječasova płacić padatki i nikoli nie atrymlivaje štrafu za parkoŭku. Adna z susiedak potym skaža, što maci była nieprymietnaj «šeraj myškaj». A znajomy fatohraf adznačyć, što žančyna zaŭsiody była ŭ dobrym nastroi.

Baćki ź siabrami i kalehami razmaŭlajuć na anhlijskaj i niamieckaj, ź dziećmi — na ispanskaj. Pry hetym, jak zaŭvažyła inšaja susiedka, ź jakoj razmaŭlali žurnalisty vydańnia, ispanskaja ŭ ich biez akcentu. Jana nazavie ich «miłymi ludźmi», jakija ni jakim čynam nie mohuć być špijonami. Pa słovach žančyny, abvinavačvańnie — vydumka ŚMI.

Maładyja ludzi ažanilisia ŭ Arhiencinie, kudy pryjechali pa turystyčnych vizach u 2012 hodzie. Jon — z Uruhvaja, jana — ź Mieksiki. Paźniej śledstva vyśvietlić, što śviedki na ich viasielli nazvali vydumanyja imiony. Muž i žonka pa padroblenych dakumientach chutka atrymali hramadzianstva.

U 2013 hodzie ŭ pary naradziłasia dačka Safi, a ŭ žniŭni 2015 hoda — syn Daniel.

U 2017 hodzie siamja pierajazdžaje ŭ Słavieniju. Pražyŭšy ŭ krainie piać hadoŭ, ni muž, ni žonka nie pačali razmaŭlać na słavienskaj, tłumačačy tym, što mova nadta ciažkaja dla vymaŭleńnia. Paźniej śledčyja vykažuć zdahadku, što nasamreč sužency chvalavalisia, što pry razmovie na słavienskaj budzie zaŭvažny ich ruski akcent.

Pavialičyć

Usio było spakojna da pačatku poŭnamaštabnaj vajny Rasii suprać Ukrainy. Ale paśla rasijskaja špijonskaja sietka ŭ Jeŭropie aktyvizavałasia. Śpiecsłužby Słavienii atrymali infarmacyju ab «narmalnaj i cichaj» siamiejnaj pary, jakaja pražyvaje ŭ cichim pryharadzie Lublany.

Supracoŭniki mihracyjnaj słužby ŭ Buenas-Ajrasie na zapyt kaleh pravieryli adbitki palcaŭ muža i žonki, jakija jany zdavali pry padačy dakumientaŭ na atrymańnie hramadzianstva, praz bazu Interpała. Vyśvietliłasia, što jany naležać Arciomu i Hańnie Dulcavym. Mužčyna naradziŭsia ŭ Baškartastanie i źjaŭlajecca aficeram Słužby źniešniaj raźviedki Rasii. Žančyna — vysokapastaŭleny aficer ź Nižniaha Noŭharada.

Padčas pieratrusu ŭ ich domie ŭ sakretnym adsieku byli znojdzieny sotni tysiač jeŭra, a na kampjutarach vyjaŭlena prahramnaje zabieśpiačeńnie, jakoje nastolki zašyfravanaje, što raźviedka ZŠA tak i nie zdoleła ŭzłamać kod. Jak śćviardžajuć śledčyja, siamiejnaja para padčas svaich pajezdak pa Jeŭropie pieradavała zakazy i hrošy z Maskvy krynicam infarmacyi.

A što ž dzieci? Ci viedali jany, kim nasamreč źjaŭlajucca ich baćki? Adnaznačnaha adkazu na heta pytańnie niama. Ale nijakich śviedčańniaŭ taho, što dzieci choć na niejkim uzroŭni vałodali ruskaj movaj.

Śledčyja havorać, što baćki papiaredžvali svaich dziaciej, što adnojčy ich mohuć aryštavać. U vyniku tak i adbyłosia.

Možna tolki zdahadvacca, što pieražyli dzieci, kali 5 śniežnia 2022 hoda siarod nočy ŭ ich dom, pieraskočyŭšy praz płot, uvarvalisia palicejskija ŭ maskach i śpiecyjalnaj ekipiroŭcy.

Paśla zatrymańnia baćkoŭ chłopčyka i dziaŭčynku addali ŭ pryjomnuju siamju i pieraviali ŭ inšuju škołu, ale jany mieli mahčymaść naviedvać baćkoŭ, jakija znachodzilisia pad aryštam.

Jak piša Le Nacion, za čas, što dzieci znachodzilisia ŭ pryjomnaj siamji, ni adzin z pramych rodzičaŭ siamji nie cikaviŭsia va ŭładaŭ ni Arhienciny, ni Słavienii stanoviščam niepaŭnahadovych i nie prasiŭ ułady pra apieku. Pryčyna zrazumiełaja — tym samym daviałosia b uskosna pryznać, što baćki nasamreč rasijskija špijony. A ni Arciom, ni Hanna Dulcavy nie davali nijakich pakazańniaŭ, i nastojvali, što jany arhiencincy.

Pavialičyć

Ciapier praz paŭtara hoda siamja ŭźjadnałasia i budzie žyć u Rasii. Nieviadoma, jak chutka zmohuć adaptavacca dzieci da novaj realnaści.

• 1
• 1
• 33
• 0
• 21
• 0
• 4
• 2