Łukašenka z Kryhieram sieŭ u łužynu. A sens vyzvaleńnia rasijskich palitviaźniaŭ voś u čym
Tak śmiešna, jak łukašenkaŭcy rabili vyhlad, što niešta rašajuć, Hładkuju pryciahnuli, advakata — tady jak Maskva z Vašynhtonom i Bierlinam užo daŭno ŭsio vyrašyła, i samaloty ŭžo zapraŭlenyja stajali, piša Siarhiej Hiezhała.
A jakoje było kino, jak ihrali akciory: insceniravany vybuch u Aziaryščy, śmiarotny prysud.
Prastafila Ryka Kryhier u vyniku pa-chutkamu trapiŭ dadomu, pryčym lacieŭ u kampanii hodnych ludziej.
Možna tolki paradavacca za Kara-Murzu, Jašyna, Arłova, Skačylenku dy inšych vyzvalenych palitviaźniaŭ.
Hučać smutnyja hałasy: a biełarusaŭ niama kamu vykuplać, niama na kaho mianiać. Što ž, takaja dola mnohich hierojaŭ — ad Nelsana Mandeły da Łarysy Hienijuš. Mnohija ź ich vychodzili pieramožcami — adno praz doŭhija hady.
Samo rašeńnie ZŠA i Niamieččyny ŭzamien za patrebnych Pucinu ahientaŭ uratavać, vyciahnuć niekaha z rasijskich antyvajennych i prademakratyčnych aktyvistaŭ — mudraje.
Jano daść nadzieju, natchnić ich paplečnikaŭ pa rasijskaj apazicyi. A im ža niaprosta tam. Miž tym i budučynia Biełarusi zaležyć ad taho, ci ŭdasca śvietu źmianić Rasiju. I rasijskija siły, jakija pracujuć na hetyja źmieny, zasłuhoŭvajuć padtrymki. Voś čamu i vyzvaleńnie dysidentaŭ — heta krok u dobrym kirunku, jak u saviecki čas abmieny Bukoŭskaha i Ščaranskaha.
Ale ŭsia hetaja historyja taksama jasna pakazała ŭradam u tym liku Polščy, Litvy i Łatvii jak najbolš zacikaŭlenych — kali chočaš mieć chacia b šaniec niekaha vyciahnuć ź Biełarusi, treba zdabyć kahości, chto tamu režymu patrebny.
Jak pierakanalisia ŭ Varšavie dy inšych stalicach, prosta słovaŭ u Minsku nie razumiejuć.
Dumaju, uśviedamleńnie hetaha prymusić zaraz paniervavacca łukašenkaŭskuju pramuju ahienturu i ahientaŭ upłyvu.
Łatuška — Łukašenku: Ja hatovy ŭdzielničać u vybarach-2025 hodzie, ale ty — bajaźliviec i šuler27
Kamientary
==========================
I jak Bukoŭski ci Ščaranski, apynuŭšysia na Zachadzie, spryčynilisia da źmien u SSSR? Ci była rola Bukoŭskaha i Ščaranskaha z Zachadu dla inicyjacyi źmien u SSSR roŭnaja choć 0,001%, ci blizkaja da nula?
A Pucin sustreŭ svaich jak hierojaŭ. Zaraz u Jaŭropie vata, marhinały i sudździ šmidty zrazumiejuć - zab'eš "voraha narodu" ci inahienta, zrobiš padpał ci špijanaž - kančatkovym vynikam stanie čyrvonaja darožka i kvietki ad prezidenta. Što tam kvietki. Stanieš zorkaj telebačańnia, deputatam ci biaźbiednym piensijanieram, jak bačym pa papiarednim abmienam.
Kali spatrebicca abmienny fond, režymy schopiać žurnalista, spartoŭcu, ci prastafilu ź bieźvizam. Handal ludźmi pracuje ŭ ich, jak Kamaroŭka ŭ žniŭni.
Cynična prahučyć, prabačcie, ale ŭ siarednieterminovym vyniku budzie bolš achviar, čym vyratavanych u hetym abmienie. I jašče treba vielmi pilnavać voś hetych vyratavanych, kab raptoŭna nie patanuli ci nie atrucilisia, adčyniajučy dźvier u chatu...