Amierykanskija astranaŭty zaviśli na arbicie i nie mohuć viarnucca dadomu
Misija, jakaja płanavałasia na tydzień, zaciahnułasia na dva miesiacy. I nieviadoma, kali skončycca. U čym pryčyna?
Astranaŭty NASA Bary Uiłmar (Barry Wilmore) i Sunita Uiljams (Sunita Williams) znachodziacca na Mižnarodnaj arbitalnaj kaśmičnaj stancyi z 6 červienia, kali ich tudy dastaviła kaśmičnaja kapsuła Boeing CST-100 Starliner.
Hety palot — častka najvažniejšych lotnych vyprabavańniaŭ, jakija zaklikany dakazać, što kapsuła biaśpiečnaja dla pieravozki budučych astranaŭtaŭ na Mižnarodnuju kaśmičnuju stancyju i viartańnia ź jaje.
Płanavałasia, što na stancyi Uiłmar i Uiljams prabuduć tydzień, ale ŭžo chutka budzie dva miesiacy, jak jany tam znachodziacca. Jak paviedamlaje Bloomberg, data ich viartańnia zastajecca nieviadomaj, bo NASA i Boeing rasśledujuć šerah techničnych prablem, jakija ŭźnikli pry zapusku Starliner. Siarod ich — uciečki hieliju i prablemy z ruchavikami.
Inžyniery NASA i Boeing niadaŭna skončyli vyprabavańni ruchavika Starliner na ziamli na abjekcie NASA White Sands u Ńju-Mieksika, kab daviedacca, jak aparatnaje zabieśpiačeńnie moža pavodzić siabie na roznych etapach palotu ŭ kosmasie.
Testavańnie pakazała, što ŭščylnieńni, zroblenyja z tefłonu, mohuć być pryčynaj niekatorych prablem z ruchavikom.
Paśla praviadzieńnia dadatkovych vyprabavańniaŭ u kosmasie NASA i Boeing płanujuć pravieści maštabnuju pravierku, mahčyma, u kancy hetaha tydnia, kab vyznačyć, ci hatovyja kamandy dastavić Uiłmara i Uiljams dadomu na Starliner.
NASA i Boeing śćviardžajuć, što asnoŭny płan zaklučaŭsia ŭ viartańni astranaŭtaŭ na Ziamlu z dapamohaj Starliner, ale jany taksama razhladajuć reziervovyja varyjanty. Adnoj z mahčymaściej źjaŭlajecca vykarystańnie kaśmičnaj kapsuły Dragon inšaha kamiercyjnaha partniora NASA — SpaceX.
U toj ža čas NASA paŭtorna siertyfikavała akumulatar Starliner na 90 dzion na arbicie ŭ paraŭnańni ź pieršapačatkovaj siertyfikacyjaj na 45 dzion. Heta aznačaje, što pry nieabchodnaści kapsuła moža zastavacca prystykavanaj da stancyi da pačatku vieraśnia.
NASA pierapracoŭvaje 98 adsotkaŭ mačy astranaŭtaŭ na MKS u pitnuju vadu
4G-internet pavinien źjavicca na Miesiacy da kanca hetaha hoda
Pahladzicie na piakielnuju «pryładu dezaryjentacyi», z dapamohaj jakoj rychtujuć astranaŭtaŭ NASA
Kampanija Iłana Maska budzie spuskać z arbity Mižnarodnuju kaśmičnuju stancyju
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ6
Kamientary