Nie damovilisia? Takoj zakrytaj sustrečy pamiž Pucinym i Łukašenkam jašče nie było
Trochdzionnyja pieramovy Alaksandra Łukašenki i Uładzimira Pucina na vostravie Vałaam na poŭnačy Rasiei prajšli amal u poŭnym infarmacyjnym vakuumie. Dziela čaho spatrebiłasia hetaja raptoŭnaja sustreča pasiarod siezonu letnich adpačynkaŭ, piša Valer Karbalevič na «Svabodzie».
Papiaredni raz Alaksandar Łukašenka i Ŭładzimier Pucin sustrakalisia ŭ traŭni. Tady prezydent Rasiei naviedaŭ Miensk z aficyjnym vizytam. Paźniej była dvuchmiesiačnaja paŭza. Ale za hety čas šmat što adbyłosia.
25 lipienia Łukašenka niečakana prylacieŭ da Pucina na Vałaam — vyspu pasiarod Ładaskaha voziera ŭ Karelii. Jany naviedali manastyr i potym amal na cełyja sodni źnikli ź publičnaj prastory. Jak paviedamiła BiełTA, Łukašenka i Pucin «praciahnuli znosiny ŭ zakrytym farmacie». U siaredzinie dnia 26 lipienia źjaviłasia karotkaje videa i fota ich prahułki. Dzień 28 lipienia minuŭ u poŭnym infarmacyjnym vakuŭmie.
U historyi dvuchbakovych znosinaŭ Łukašenki i Pucina i raniej zdaralisia praciahłyja spatkańni pa try dni. Mocna zaniaty važnymi dziaržaŭnymi spravami, rasiejski kiraŭnik nie škaduje času na pieramovy ź biełaruskim vizavi.
Ale nie było až nastolki zakrytaj sustrečy. Navat na pratakolnyja zdymki ŭ pačatku pieramovaŭ žurnalistaŭ nie dapuścili. Takaja trochi niezvyčajnaja infarmacyjnaja zakrytaść moža śviedčyć pra napružany charaktar pieramovaŭ. I na toje jość pryčyny.
Moža, upieršyniu z pačatku vajny Rasiei suprać Ukrainy ŭ biełaruska-rasiejskich dačynieńniach nazapasiŭsia ceły šerah kanfliktnych vuzłoŭ, jakija patrabujuć raźviazańnia. I rasiejski prezydent vyklikaŭ Łukašenku «na dyvan», — to bok na Vałaam. Kab prynamsi vysłuchać tłumačeńnie.
13 lipienia Łukašenka naviedaŭ vajskovuju častku ŭ Łuninieckim rajonie i niečakana adznačyŭsia kaskadam miralubivaj rytoryki na adras Ukrainy, jakoj nie było čuvać z pačatku rasiejskaj ahresii: «Ciapier u nas uskładnieńniaŭ nijakich niama z ukraincami. I ja spadziajusia, što i nia budzie. My anijakija nia vorahi dla ŭkraincaŭ». I abviaściŭ pra advod biełaruskich vajskoŭcaŭ ad ukrainskaj miažy.
Heta nie mahło spadabacca kiraŭnictvu Rasiei. U adkaz rasiejskija Z-błohiery nazvali Łukašenku «zdradnikam». A na terytoryju Biełarusi raptam pačali zalatać rasiejskija «Šachiedy». Mnohija eksperty paličyli heta papiaredžańniem z Maskvy.
Uviadzieńnie Biełaruśsiu «biaźvizu» dla hramadzian 35 krainaŭ Eŭropy taksama mahło vyklikać niezadavolenaść Rasiei, bo biełaruska-rasiejskaja miaža, ahułam kažučy, adkrytaja: usie, chto pryjechaŭ u Biełaruś, u pryncypie mohuć lohka trapić u Rasieju. A padčas vajny zvyčajna miežy zakryvajuć, a nie adkryvajuć: na toje jość zusim zrazumiełyja abjektyŭnyja pryčyny.
Narešcie, jašče adzin vuzieł, jaki ŭmoŭna možna nazvać kitajskim. Padčas sustrečy Alaksandra Łukašenki i Si Czińpina ŭ Astanie na palach samitu ŠAS Łukašenka zajaviŭ, što padtrymlivaje kitajski mirny plan zaviaršeńnia vajny va Ŭkrainie. Hety tezis paŭtaryŭ ministar zamiežnych spravaŭ Biełarusi Maksim Ryžankoŭ padčas vizytu ŭ KNR.
A, jak viadoma, Uładzimier Pucin nia zhodny ź planam urehulavańnia vajennaha kanfliktu, jaki prapanuje Pekin.
I narešcie — pra namier abmierkavać z Pucinym temu vajny va Ŭkrainie i mahčymaha zamireńnia Łukašenka kazaŭ padčas naviedvańnia vajskovaj častki ŭ Łuninieckim rajonie 13 lipienia. Siońnia heta samaje aktualnaje pytańnie. Pra mirnyja pieramovy ciapier kažuć usie i na Zachadzie, i na Ŭschodzie. Idzie dyskusija pra ŭmovy zamireńnia. I Łukašenka chacieŭ by niejak udzielničać u hetym pracesie, kab vyjści z vajny z palityčnym prybytkam, atrymać «dyvidendy miru». Ale, jak viadoma, «chacieć nia škodna».
Jašče adna tema: umovy vyzvaleńnia niamieckaha hramadzianina Ryka Kryhiera, asudžanaha biełaruskim sudom da śmiarotnaha pakarańnia. Pytańnie: čaho patrabavać ad Niamieččyny?
Praciahłaja historyja sustrečaŭ Łukašenki z Pucinym daje padstavy bačyć peŭnyja zakanamiernaści. Adna ź ich palahaje ŭ tym, što kali niama nijakich paviedamleńniaŭ dla ŚMI, maŭčać presavyja słužby kiraŭnikoŭ, dyk heta śviedčyć, chutčej za ŭsio, pra surjoznyja roznahałośsi padčas pieramovaŭ.
«Pahladzicie, što narabili mužčyny». Maryna Mientusava — pra žančyn, što vyratujuć śviet, pracu ŭ Rasii, asabistaje žyćcio i «Obyčnoje utro»37
Kamientary