Irłandski palityk abvinavaciŭ Biełaruś u vyrabie fejkavaj rekłamy ź jaho vyjavaj
Irłandski palityk i były premjer-ministr krainy Michoł Marcin abvinavaciŭ Biełaruś i Rasiju ŭ vyrabie falšyvaj rekłamy kryptavaluty z vykarystańniem jahonaj vyjavy, zaŭvažyła Reform.news.
«Miarkujecca, što falšyvaja rekłama ŭ internecie z vykarystańniem vyjavy… Michoła Marcina była stvoranaja ŭ Biełarusi i Rasii», — paviedamiła vydańnie Irish Times.
Marcin padaŭ pazoŭ u Viarchoŭny sud suprać Google, patrabujučy dać infarmacyju pra ludziej, jakija stajać za falšyvaj rekłamaj kryptavalut, u jakoj vykarystoŭvajecca jahonaje fota i jakaja źjaŭlajecca na lehalnych veb-sajtach.
«Padroblenaja rekłama, vidać, pachodziła ź jurysdykcyj Biełarusi i Rasii. Padobna na toje, što dla apłaty rekłamy vykarystoŭvalisia skradzienyja kredytnyja karty», — paviedamiŭ vydańniu Marcin.
Jon taksama adznačyŭ, što sutyknuŭsia ź vialikimi ciažkaściami pry ŭstanaŭleńni asoby ludziej, jakija nasamreč zamovili hetuju rekłamu.
«Google supracoŭničaŭ [u suviazi z najaŭnaściu] pastanovy Vysokaha suda, i my atrymali vielizarnuju kolkaść dakumientacyi, i daviałosia naniać ludziej dla praviadzieńnia sudovaj ekśpiertyzy, kab pasprabavać vyznačyć, chto zapłaciŭ za padroblenuju rekłamu», — udakładniŭ palityk.
Marcin asudziŭ raspačatuju Rasijaj vajnu va Ukrainie, adnak jon nie ŭpeŭnieny, što staŭ achviaraj dyfamacyi mienavita z hetaj pryčyny.
U pačatku 2024 hoda Marcin znoŭ staŭ abjektam falšyvaj rekłamy ŭ sacsietcy X, jakaja źjaviłasia napiaredadni refierendumaŭ u krainie «pa pytańniach siamji i dohladu». Palityk adznačyŭ, što Ch išła na supracoŭnictva ź im u pytańni vyśviatleńnia zakazčykaŭ falšyvaj rekłamy značna horš, čym Google. U suviazi z hetym Marcin płanuje inicyjavać pierahlad u krainie zakonaŭ ab dyfamacyi.
Kamientary