Minsk apynuŭsia ŭ topie samych tannych haradoŭ śvietu — za žyllo treba płacić u 10 razoŭ mienš, čym u Ńju-Jorku

Sajt-ahrehatar danych ab košcie i jakaści žyćcia Numbeo skłaŭ rejtynh 218 haradoŭ śvietu pa stanie na siaredzinu 2024 hoda.

U asnovu analizu byli pakładzieny niekalki pakazčykaŭ: košt žyćcia (u tym liku: praduktovy košyk, kamunalnyja pasłuhi, transpart i inšyja spažyvieckija pasłuhi); arendnaja płata; ceny na pradukty; ceny ŭ restaranach; pakupnickaja zdolnaść nasielnictva.

Za asnovu raschodaŭ i pakupnickaj zdolnaści ŭziaty ceny ŭ Ńju-Jorku, kudy pierajechaŭ piśmieńnik Viktar Marcinovič. Indeks koštu žyćcia hetaha horada pryniata ličyć roŭnym 100. Kali indeks niejkaha horada roŭny 80, to košt pražyvańnia ŭ hetym horadzie na 20% nižej, čym u Ńju-Jorku.

Pieršaje miesca pa koštu žyćcia zaniała Ženieva ź indeksam roŭnym 101,7. Za joj iduć Ciurych (100,4), Ńju-Jork (100), San-Francyska (90,5), Bostan (85,8).

Pavialičyć

Siarod samych tannych haradoŭ apynulisia adrazu try harady z Pakistana — Karačy (19,0), Łachor (19,1) i Isłamabad (21,5) a taksama dva ź Indyi — Kałkuta (21,1) i Čenai (21,8).

Minsk ź indeksam 27,8 zaniaŭ ahulnuju 200-ju pazicyju. Stalica Biełarusi — adzin z samych tannych haradoŭ Jeŭropy. Pierad im apynuŭsia Kijeŭ (28,6), a nižej tolki Lvoŭ i Adesa.

Kali havaryć pra stalicy susiednich krain, to samaj darahoj vyhladaje Ryha, jakaja ź indeksam 50,9 zaniała 97 pazicyju. Dalej iduć Vilnia (102 miesca, indeks 48,2) i Varšava (115 miesca, indeks 43,9). Maskva ź indeksam 38,9 zaniała 137 miesca.

Kali ž pahladzieć na pakupnuju zdolnaść nasielnictva, to na pieršym miescy budzie Ciurych. Jaho žychary mohuć sabie dazvolić za siaredni čysty zarobak nabyć na 81% bolej tavaraŭ i pasłuh, čym žychar Ńju-Jorku. Dalej iduć Luksiemburh (176%), i, jak ni dziŭna, indyjski horad Banhałor (171%).

Niahledziačy na istotnuju roźnicu ŭ pamierach siarednich zarobkaŭ ź Ńju-Jorkam, žychary Minska mohuć nabyć 59,5% taho, što nabyvaje žychar hetaha amierykanskaha miehapolisa.

Pry hetym u stalicy Biełarusi indeks arendnaj płaty składaje tolki 9,6% ad Ńju-Jorku.

Kali ž uziać košt žyćcia i arendu, to Minsk zamykaje dvaccatku haradoŭ z samym nizkim pakazčykam. Pierad im kitajski Čendu, a za im — Kuryciba ŭ Brazilii.

Jašče lepš vyhladaje situacyja, kali pahladzieć na indeks koštu praduktaŭ charčavańnia. Tut Minsk z pakazčykam 26,6 siarod piatnaccaci najbolš tannych haradoŭ śvietu. Pierad im — rasijski Rastoŭ-na-Donie, za im — ukrainskaja Adesa.

A voś ceny ŭ restaranach staviać Minsk na 56-je miesca ź indeksam 27,4. Pierad im irakski Irbi, za im — stalica Małdovy Kišynioŭ.

• 2
• 1
• 3
• 0
• 0
• 0
• 0
• 0