Za «abrazu pradstaŭnika ŭłady» mastačcy z Połacka pryznačyli prymusovaje lačeńnie. Jana viarnułasia z Polščy

19 lipienia jaje proźvišča źjaviłasia ŭ «ekstremisckim śpisie MUS», adkul stała viadoma, što joj pryznačany «prymusovyja miery biaśpieki i lačeńnia». Vierahodna, padstavaj dla kryminalnaj spravy stali dopisy pałačanki ŭ sacyjalnych sietkach. «Viciebskaja viasna» raspaviała padrabiaznaści pieraśledu mastački z Polšy: pra vykarystańnie jaje prapahandystami i viartańnie dadomu z Polščy. 

Litaraturna-tvorčaja asoba

Tak Neli Ałfiorava nazyvała siabie ŭ sacyjalnych sietkach. Jana zarehistravana ramieśnicaj, vystaŭlała na prodaž svaje karciny i suvieniry. Pisała vieršy i apaviadańni dla dziaciej. Na sajcie Połackaha dziciačaha prytułku možna znajści infarmacyju pra navahodniuju sustreču ź piśmienicaj Neli Ałfioravaj u 2018 hodzie.

Pavodle bazy zvarotaŭ u KDB, jakaja źjaviłasia ŭ internecie, u 2016 hodzie pałačanka pisała tudy zajavu pra karupcyju ŭ Połacku. Byŭ i jašče adzin zvarot u hetuju strukturu — u 2017 hodzie. Neli Ałfiorava pisała, što «zacikaŭlena ŭ pracaŭładkavańni», i dasyłała svajo reziume. Z dopisu nie zrazumieła, ci jana chacieła ŭładkavacca na pracu mienavita ŭ KDB, ci prasiła paspryjać pracaŭładkavańniu ŭ inšaje miesca.

Znajomyja adznačajuć, što Neli — vielmi emacyjnaja žančyna, jakaja nie cierpić niespraviadlivaści i chvaravita na jaje reahuje. I dziela adstojvańnia svaich pohladaŭ zdolnaja na adčajnyja ŭčynki.

U 2019 hodzie Ałfiorava bałatavałasia ŭ Pałatu pradstaŭnikoŭ pa Połackaj vybarčaj akruzie №27. Hety fakt dziaržaŭnyja prapahandysty pryhadajuć joj paźniej, u 2023 hodzie.

Była nieadnarazova pakaranaja pa administracyjnych artykułach paśla 2020 hoda

Pravaabaroncam viadomyja niekalki faktaŭ administracyjnaha pieraśledu Neli Ałfioravaj. Pra niekatoryja ź ich jana raspaviadała ŭ adnym sa svaich videazvarotaŭ da Łukašenki i vyšejšych dziaržaŭnych čynoŭnikaŭ, detali inšych byli vyśvietleny ŭ sudach.

U 2020 hodzie pałačanka była naziralnicaj na prezidenckich vybarach. Na toj čas u siłavych strukturaŭ jana ŭžo była na admysłovym uliku. 6 listapada 2020 hoda ŭ Połacku pravodzili mitynh z nahody adkryćcia adramantavanaha mosta i vielmi bajalisia pravakacyjaŭ. Supracoŭniki milicyi byli ŭ stanie «bojehatoŭnaści» i papiaredžvali miascovych aktyvistaŭ ab niedapuščeńni pravakacyjaŭ.

Siłaviki pryjšli da Ałfioravaj i sustreli jaje kala doma. Jany byli ŭ cyvilnaj vopratcy i pryjechali na mašynie biez znakaŭ prynaležnaści da MUS. Kali adzin z mužčynaŭ pačaŭ zadavać joj pytańni na vulicy, jana praihnaravała ich i nie spyniłasia, bo śpiašałasia ŭ kramu. Žančynu stali hvałtam zaciahvać u mašynu, jana supraciŭlałasia i klikała na dapamohu. Neli Ałfioravu zavieźli ŭ RAUS i pratrymali tam piać hadzin.

U hety čas doma zastavałasia dzicia ź invalidnaściu. Suprać pałačanki skłali dva pratakoły — za «niepadparadkavańnie milicyi» i za «abrazu słužbovaj asoby». 3 śniežnia sudździa Natalla Sankovič aštrafavała Ałfioravu na 25 bazavych vieličyniaŭ.

5 kastryčnika 2021 hoda sud pryznaŭ Neli Ałfioravu vinavataj u «publičnym demanstravańni nacysckaj simvoliki i atrybutyki» ŭ VK. A taksama abvinavaciŭ jaje ŭ «raspaŭsiudzie ekstremisckaj pradukcyi». Žančynu aštrafavali na 40 bazavych

Adjezd u Polšču i videaroliki, skarystanyja prapahandystami

Hod tamu na telekanale «Źviazda» vyjšła pieradača «Pa toj bok «zmaharstva»», dzie byli vykarystanyja videaroliki Neli Ałfioravaj, jakaja ŭ kancy 2021 hoda vyrašyła źjechać ź Biełarusi. Žančyna z synam pajechali ŭ Polšču. U videarolikach jana raspaviadała pra prablemy, ź jakimi daviałosia sutyknucca ŭ emihracyi. Ale dziaržaŭnyja prapahandysty pierakrucili jaje historyju na svoj ład: maŭlaŭ, «roznyja fondy» abiacajuć biełarusam pažyćciovaje ŭtrymańnie ŭ zamiežžy, ale nie spraŭdžvajuć abiacańni. I voś, maŭlaŭ, žančyna-biełaruska sutyknułasia ź nieabchodnaściu šukać pracu i žytło…

Neli Ałfiorava narakała i na słabuju padtrymku polskich uładaŭ, i na biełaruskija demakratyčnyja siły, dziejnaść jakich raniej ščyra padtrymlivała. Znajomyja emihranty-biełarusy prapanoŭvali žančynie dapamohu, ale jana admaŭlałasia i pry hetym «vyhladała padaŭlenaj, złomlenaj».

Viadučaja prahramy na telekanale «Źviazda» dziakavała Ałfioravaj za ščyraść i zaprašała chutčej viarnucca dadomu. Žančyna i nasamreč nieŭzabavie viarnułasia ŭ Biełaruś.

Viartańnie ŭ Biełaruś i kryminalnaja sprava

Pryjechaŭšy ŭ Połack, Neli Ałfiorava praciahvała pisać u sacsietkach pra biurakratyju ŭ dziaržaŭnych ustanovach, ź jakoj davodziłasia sutykacca. Paraŭnoŭvała staŭleńnie da ludziej polskich i biełaruskich čynoŭnikaŭ, pryčym nie na karyść apošnich. Krytykavała stan połackich pradpryjemstvaŭ, adhukałasia na padziei ŭ śviecie.

Ale siabry zaŭvažali, što dopisy žančyny časam byvali sumburnyja, a ŭčynki — niepradkazalnyja, što jana skardziłasia na psichałahičnaje źniasileńnie i šukała ad hetaha paratunku — čytała šmat litaratury pa psichałohii.

Naprykancy 2023-ha na staronkach Neli Ałfioravaj pieryjadyčna źjaŭlalisia teksty z krytykaj dziejnych biełaruskich uładaŭ. I adnačasova žynčyna paviedamlała pra toje, što jaje patajemna pieraśledujuć, što ŭ svajoj kvatery jana znachodzić schavanyja videakamiery, a na vulicy jaje supravadžajuć vižy.

Taksama ŭ sacyjalnych sietkach žycharki Połacka možna zaŭvažyć šmat repostaŭ ź internet-resursaŭ, pryznanych «ekstremisckimi». Vierahodna, supracoŭniki milicyi zaŭvažyli heta, a pa zatrymańni stali šukać padstavaŭ dla raspačynańnia ŭžo nie administracyjnaj, a kryminalnaj spravy.

Apošnija dopisy žančyny ŭ sacyjalnych sietkach datavanyja pačatkam lutaha hetaha hoda.

Pravaabaroncy vyśviatlajuć, z kim zastaŭsia jaje niepaŭnaletni syn, jaki maje invalidnaść.

• 1
• 0
• 0
• 0
• 1
• 10
• 1
• 0