Pa stanie na 1 lipienia ŭ Litvie pražyvała 221 285 zamiežnikaŭ. Ukrainskaja dyjaspara zastajecca samaj vialikaj u Litvie — 76 145 čałaviek, piša Delfi.lt
Bolš za pałovu hetych zamiežnikaŭ — amal 44 tysiačy — źjaŭlajucca vajskovymi ŭciekačami, jakija pakinuli krainu z-za rasijskaj ahresii, jany padpadajuć pad dziejańnie miechanizmu časovaj abarony, uviedzienaha ES. Kolkaść ukraincaŭ, jakija pražyvajuć u Litvie, za apošnija šeść miesiacaŭ skaraciłasia na 10 tysiač.
Druhoj pa vieličyni pryjezdžaj dyjasparaj u Litvie źjaŭlajucca biełarusy, za apošnija paŭhoda kolkaść krychu pavialičyłasia. Pavodle źviestak na 1 lipienia, usiaho ŭ Litvie pražyvała 62 535 hramadzian Biełarusi, a na 1 studzienia takich asob było 62 167.
Kolkaść hramadzian Rasii, jakija pražyvajuć u Litvie, niekalki źmienšyłasia. Na pačatak hetaha hoda ŭ Litvie pražyvała 15 tysiač 888 rasijanaŭ, na 1 lipienia — 15 536.
Čaćviortaja pa vieličyni zamiežnaja dyjaspara ŭ Litvie — uźbieki. Za apošnija šeść miesiacaŭ kolkaść hramadzian hetaj centralnaazijackaj krainy pavialičyłasia z 8,2 tys. čałaviek na 1 studzienia da 10,2 tys. na 1 lipienia.
Piataje miesca — tadžyki, jakich ciapier u Litvie pražyvaje amal 7 tys. Paŭhoda tamu kolkaść hramadzian Tadžykistana była krychu mienšaj — 5,7 tys.
Bolšaja častka ŭsich hramadzian zamiežnych krain, jakija pražyvajuć u krainie, praciahvajuć pryjazdžać na zarobki. Nastupnymi pa vieličyni hrupami źjaŭlajucca členy siemjaŭ, vysokakvalifikavanyja rabočyja i studenty, pakazvajecca ŭ paviedamleńni.
Adznačajecca, što kolkaść pašpartoŭ, jakija vydajucca zamiežnikam, pastupova pavialičvajecca. U 2023 hodzie takija dakumienty atrymali 84 zamiežniki, a ŭ pieršym paŭhodździ hetaha hoda vydadziena ŭžo 85.
U Litvie takija dakumienty vydajucca zamiežnikam z pravam pražyvańnia ŭ krainie, jakija pa abjektyŭnych pryčynach nie mohuć atrymać adpaviedny dakumient u krainie pachodžańnia.
Pa źviestkach Departamienta mihracyi, rost kolkaści vydavanych pašpartoŭ zamiežnikaŭ źviazany z rašeńniem režymu Alaksandra Łukašenki nie dazvalać mianiać dakumienty ŭ dyppradstaŭnictvach u zamiežnych krainach.
Kamientary