Bajden nie źbirajecca zdymacca z vybaraŭ i abiacaje pieramohu niahledziačy na sumnievy ŭ jaho zdaroŭi
«Abiacaju vam, što my vyjhrajem hetyja vybary», — skazaŭ jon u niadzielu.
Prezident ZŠA Džo Bajden zapeŭniŭ donaraŭ Demakratyčnaj partyi, što moža pieramahčy svajho supiernika-respublikanca na vybarach u listapadzie, niahledziačy na aściarohi z nahody jaho kandydatury, jakija ŭzmacnilisia paśla niaŭdałaha vystupu na debatach z Donaldam Trampam u čaćvier, piša Bi-bi-si.
Prezident, jakomu idzie 82-y hod, naviedaŭ niekalki fandrajzinhavych mierapryjemstvaŭ u Ńju-Jorku i Ńju-Džersi. Akramia zboru srodkaŭ, Džo Bajden sprabavaŭ źmianić staŭleńnie da taho, što adbyłosia ŭ noč prezidenckich debataŭ na kanale CNN.
Vystupajučy na adnym ź mierapryjemstvaŭ, Bajden pryznaŭsia: «U mianie byŭ nie samy lepšy viečar, ale i ŭ Trampa taksama».
«Abiacaju vam, što my vyjhrajem hetyja vybary», — skazaŭ jon.
Paśla prezident ZŠA zajaviŭ, što razumieje sumnievy, jakija avałodali demakratami paśla debataŭ, ale zaklikaŭ nie spyniać baraćbu.
U chodzie debataŭ jon vyhladaŭ i hučaŭ nastolki niaŭpeŭniena, što adrazu paśla ich zakančeńnia libieralnyja kamientatary i palittechnołahi adzin za adnym stali vystupać z zaklikam vyłučyć inšaha kandydata. Na dumku častki ź ich, kali Bajden nie admovicca bałatavacca na druhi termin, heta moža aznačać amal nieminučuju pieramohu Donalda Trampa.
U razmovie z BBC były śpikier Pałaty pradstaŭnikoŭ demakrataŭ Nensi Pełosi skazała, što vystup Bajdena na debatach «byŭ nie vielmi», a jaho były dyrektar pa suviaziach z hramadskaściu Kiejt Biedzinhfiłd nazvała jaho «vielmi rasčaravalnym».
Pradstaŭniki kamandy Bajdena nie admaŭlajuć, što debaty prajšli nie tak, jak jany spadziavalisia, ale zapeŭnili, što jon nie sastupić miesca na karyść inšaha kandydata.
Jak zapeŭniła kiraŭnik pieradvybarčaha štaba Dženifier O'Mali Dziłan, miarkujučy pa apytańniach paśla debataŭ, »mierkavańni vybarščykaŭ nie źmianilisia».
«Heta nie pieršy raz, kali praź pierabolšanyja acenki ŚMI rejtynhi časova pravalvajucca», — zajaviła jana.
Hubiernatar Ńju-Džersi, pradstaŭnik Demakratyčnaj partyi Fił Merfi naviedaŭ mierapryjemstva pa zbory srodkaŭ i skazaŭ Džo Bajdenu: «My z vami na 1000%».
A były prezident i blizki siabar Džo Bajdena Barak Abama napisaŭ u sacsietkach, što «drennyja debaty časam zdarajucca».
«Hetyja vybary — vybar pamiž čałaviekam, jaki ŭsio žyćcio zmahaŭsia za prostych ludziej, i tym, chto kłapocicca tolki pra siabie», — napisaŭ Abama.
Praź niekalki hadzin paśla debataŭ Tramp zajaviŭ svaim prychilnikam, što ŭvažaje ich za «vialikuju pieramohu» dla svajoj kampanii.
«Prablema Džo Bajdena nie ŭ jahonym uzroście, — skazaŭ 78-hadovy Tramp. — Reč u jaho kampietentnaści. Jon aburalna niekampietentny».
Vystup Bajdena vyklikaŭ niepryjemny asadak i ŭ tych, chto nie zajmajecca palitykaj.
Šmathadovy prychilnik demakrataŭ Łory Hrehary skazała Bi-bi — si, što prosta nie mahła hladzieć debaty, pytajučysia siabie: «Niaŭžo heta lepšaje, na što zdolnaja naša kraina?»
A respublikanka Krystał Majiers-Barbier zajaviła, što hetyja debaty było baluča hladzieć i što «Tramp vyhladaŭ vielmi ŭpeŭniena i pa-prezidencku, tady jak Bajden vyhladaŭ vielmi słabym».
Pa vynikach apytańnia Data for Progress, arhanizacyi libieralnaha tołku, 62% patencyjnych vybarščykaŭ, jakija hladzieli debaty abo čytali pra ich, ličać, što pieramoh Tramp. Tolki 30% apytanych kažuć pra pieramohu Bajdena.
Tramp upeŭniena pieramoh Bajdena na debatach
Redakcyja New York Times zaklikała Bajdena źniać svaju kandydaturu z vybaraŭ
Bajden moža źniać svaju kandydaturu z vybaraŭ, kali na jaho nacisnuć svajaki i siabry. A chto jaho moža zamianić?
Amierykanskija ŚMI nazvali, chto moža pierakanać Bajdena vyjści z prezidenckaj honki
Pryčynaj pravału Bajdena na debatach moh stać čas, u jaki hetyja debaty pravodzilisia
Kamientary
Pry Bajdanie 6- 8 miesiacaŭ zatrymki dapamohi Ukrainie pytańnia 5 ci 5 z pałovaj tankaŭ.1 ci 2 atakamsa))) I pajšoŭ druhi hod čakańnia abiacanych Fie 16)) Jaščie Čierčyl adčuł jak mieć u kamradach sajuźnikach Štaty...Bajden Tramp ??Dzie chren a chto redźka?? Zaraz sprečki na moj pohlad kto bolšy " ch.ren"