Adzin z hałoŭnych kandydataŭ na pasadu kiraŭnika Interpała padazrajecca ŭ vykradańni ludziej
Namieśnik kamisara palicyi Zambii Mubita Nava źjaŭlajecca adnym z hałoŭnych kandydataŭ na pasadu prezidenta Interpała i byŭ padtrymany ŭsimi krainami Afryki. Ale napiaredadni asnoŭnaha hałasavańnia suprać čynoŭnika ŭspłyli vielmi surjoznyja abvinavačańni.
Namieśnika kamisara palicyi Zambii Mubitu Navu, adnaho z čatyroch asnoŭnych kandydataŭ na pasadu prezidenta Interpała, padazrajuć u datyčnaści da vykradańnia, niezakonnaha zatrymańnia, napadu i sproby vymahalnictva ŭ dačynieńni da dvuch indyjskich biznesmienaŭ u 2022 hodzie.
Adpaviednuju skarhu aficyjna nakiravali ŭ Interpał advakaty paciarpiełych mužčyn, paviedamlaje vydańnie The Guardian.
Pavodle skarhi, Mabita Nava, kali byŭ namieśnikam dyrektara zambijskaha Departamienta kryminalnych rasśledavańniaŭ, niepasredna ŭdzielničaŭ u arhanizacyi zasady na bratoŭ Vinada i Udzita Sadchu, kiraŭnikoŭ indyjskaj farmaceŭtyčnaj kampanii Sun Pharmaceuticals, jakaja pierad hetym pieramahła ŭrad Zambii ŭ sudzie za parušeńnie ŭmoŭ kredytavańnia z boku zambijskaha Banka raźvićcia.
«Braty Sadchu tady damahlisia ad Zambii vialikaj hrašovaj kampiensacyi, ale paśla suda na bratoŭ Sadchu napali ludzi, jakija vydavali siabie za palicyjantaŭ, i pahruzili ich u furhon biez apaznavalnych znakaŭ, paśla čaho advieźli ŭ niejki pryvatny dom, dzie padvierhnuli pahrozam i prymusu, pakul adnamu z pałonnych nie ŭdałosia skarystacca schavanym telefonam i vyklikać dapamohu.
Dalej indyjskich biznesmienaŭ advieźli ŭ adździaleńnie palicyi, dzie ich praciahnuli padviarhać pahrozam i prymusu ŭžo niepasredna z boku Mabity Navy, kab braty Sadchu admovilisia ad svaich sudovych pretenzij da Zambii», — piša The Guardian sa spasyłkaj na aficyjnuju skarhu advakataŭ bratoŭ Sadchu.
Z tych časoŭ, jak śćviardžajuć paciarpiełyja, nivodny napadnik nie byŭ pryciahnuty da adkaznaści, a prysudžanaja hrašovaja kampiensacyja ad Zambii tak i nie była vypłačanaja kampanii bratoŭ Sadchu.
Ciapier biznesmieny spadziajucca, što Interpał padrabiazna vyvučyć pytańnie i nie dapuścić Mabitu Navu da prezidenckaha kresła arhanizacyi.
Palicyja Zambii, u svaju čarhu, adprečyła ŭsie abvinavačvańni ŭ bok Mabity Navy, śćviardžajučy, što jaho reputacyju «śpiecyjalna chočuć sapsavać da budučych vybaraŭ kiraŭnika Interpała». A samich bratoŭ Sadchu viedamstva nazvała «ašukancami, jakija svaimi skarhami sprabujuć adciahnuć uvahu ad svaich finansavych złačynstvaŭ u Zambii».
Adznačym, što pa indeksie ŭzroŭniu ŭsprymańnia karupcyi za 2023 hod Zambija pakazała adzin z najhoršych vynikaŭ u śviecie i mieła stolki ž bałaŭ, kolki i Biełaruś. Biadotnaje stanovišča ŭ Zambii taksama zajmaje situacyja z pravami čałavieka i palityčnymi represijami ŭ dačynieńni da niaŭradavych struktur.
Kamientary