Hramadstva88

U eks-milicyjanta z žonkaj u emihracyi naradzilisia dvajniaty, ale jaho pryznali «pahrozaj nacbiaśpieki». Na što siamja pajšła, kab lehalizavać dziaciej?

Ivan* u svoj čas pracavaŭ u pravaachoŭnych orhanach, ale jašče ŭ 2019 hodzie zvolniŭsia z orhanaŭ. Razam z žonkaj Natallaj jany žyli ŭ adnym z pratesnych rajonaŭ Minska i nie źbiralisia źjazdžać. Ale vosieńniu 2021-ha da ich ź pieratrusam pryjšoŭ HUBAZiK. Potym byli dopyty, pahrozy, 15 sutak Akreścina dla Natalli, chutkija ŭcioki Ivana ź Biełarusi i sproby pabudavać žyćcio nanoŭ u Hruzii.

Ale paśla pačatku vajny va Ukrainie Ivanu admovili ŭ DNŽ, pryznaŭšy jaho «pahrozaj nacyjanalnaj biaśpieki», jak mnohich biełarusaŭ i ruskich.

Na toj momant para ŭžo čakała dvajniat. Pačynałasia poŭnaja krutych pavarotaŭ daroha ź misijaj — lehalizavacca samim i lehalizavać budučych dziaciej biez pašpartoŭ za miažoj. Jany padzialilisia svajoj historyjaj z «Našaj Nivaj».

*My nie publikujem sapraŭdnyja imiony hierojaŭ pa ich prośbie.

Častka pieršaja: HUBAZiK, Akreścina i ŭcioki

U kvateru Natalli i Ivana pryjšli vosieńniu 2021-ha. U pastanovie na pieratrus, pa słovach Natalli, było kala dziesiaci roznych artykułaŭ Kryminalnaha kodeksa, pa jakich chacieli pravieryć mienavita jaje. Siłaviki padčas vobšuku viali siabie dosyć prystojna. Zabrali z saboj techniku, noŭtbuk, telefon, płanšet i zatrymali Natallu.

Užo ŭ HUBAZiKu pačalisia pahrozy — dziaŭčynie kazali, što jana siadzie nadoŭha, kali nie raskaža, adminam jakoha čatu była — jany byli ŭpeŭnienyja, što jana administravała čat svajho rajona, jaki byŭ vielmi pratesna aktyŭny. Pužali, što muž nie dačakajecca i što jana nikoli nie narodzić dziaciej, bo vyjdzie z turmy stararodziačaj. Abiacali vykinuć jaje žyvioł na vulicu i zatrymać Ivana taksama. Adzin z supracoŭnikaŭ, razzłavaŭšysia, što ničoha nie moža dabicca, schapiŭ Natallu za tvar i mocna šturchanuŭ.

Akreścina. Ilustracyjnaje fota: «Naša Niva»

Pakul Nataša była zamknionaja na Akreścina 15 žudasnych sutak pa administracyjnym artykule 24.3 (niepadparadkavańnie), jaje muž spačatku chavaŭsia ŭ siabroŭ, a potym paprasiŭ znajomaha arhanizavać dla jaho adjezd u Rasiju.

«Kali mnie raspaviali, što ŭ našu kvateru prychodzili jašče raz, raskidaŭšy tam usie rečy, adzieńnie, krupy, a paźniej — pieradaŭšy mnie piersanalnaje «pryvitańnie», ja vyrašyŭ źjazdžać.

Jechaŭ lasami-palami da miažy z Rasijaj. U Maskvie ja prabyŭ da vyzvaleńnia Natašy. Potym pa takoj ža schiemie my arhanizavali pajezdku joj, a z Maskvy praź Jerevan ulacieli ŭ Tbilisi. Kančatkovym punktam byŭ Batumi».

Ilustracyjny zdymak. Fota: «Naša Niva»

Častka druhaja: ciažarnaść, dumki pra Arhientynu i «pahroza nacbiaśpieki» dla Hruzii

Ivan adkryŭ u Batumi firmu, spravy ŭ kampanii išli dobra.

«Kali my tolki pierajechali, u Batumi było realna kajfova. Servis, kaniečnie, byŭ nižejšy za siaredni, ale i za adnosna nizkuju canu. Adnak kali ŭžo pačałasia vajna z Ukrainaj i pajšła chvala rełakacyj, to ŭźlacieli ceny na nieruchomaść, na inšaje taksama vyraśli. Heta było pradkazalna, ale ja nie čakaŭ, što razam z hetym vyraście ŭzrovień achraniełaści asobnych hramadzian — ludzi nibyta schapili ci to zorku, ci to boha za baradu, kali mieli chatu ŭ Batumi», — dzielicca ŭražańniami Ivan.

Arendnuju płatu za ich kvateru padniali ŭ dva razy — z 350 dalaraŭ da 700, a na letni siezon — da 800.

Situacyja napaliłasia, kali mužčynie admovili ŭ DNŽ. Prytym što na toj momant Nataša była ŭžo ciažarnaja: para čakała dvajniat. Biez dakumientaŭ u baćkoŭ niemahčyma było zabiaśpiečyć ich dzieciam.

«Ja vyrašyŭ abskardzić admovu, pajšoŭ da hruzinskaha advakata. Jon mianie supakojvaŭ, što heta pamyłka, maŭlaŭ: ty ž dyrektar firmy, u ciabie zarobak — niekalki tysiač, siamja, dzieci — 90%, što tabie sudździa prosta na miescy sam vypiša DNŽ. Tym bolš pieršapačatkova my ŭvohule dumali padavać mianie na hramadzianstva za inviestycyi ŭ ekanomiku: u majoj firmy chapała abarotu.

U vyniku maju spravu razhladali chvilin 20 — i znoŭ admova z farmuloŭkaj «pahroza nacyjanalnaj biaśpiecy», — raskazvaje Ivan.

«Byŭ varyjant iści ŭ Viarchoŭny sud, ale tam takaja praktyka, što znoŭ možna pračakać paŭhoda i ničoha. Bo sudovaje rašeńnie prymajecca na padstavie danych ad miascovych orhanaŭ biaśpieki. A jany lapili «pahrozu» na mnohich zamiežnikaŭ, asabliva biełarusaŭ i ruskich paśla vajny.

Kab vy razumieli, za niejki čas da adjezdu z Hruzii ja padaŭ 10 supracoŭnikaŭ svajoj kampanii na DNŽ, siarod ich 9 byli ruskija i adzin ukrainiec. Zdahadajciesia, chto atrymaŭ doki? Tolki ŭkrainiec. Astatnija taksama byli pryznanyja pahrozaj». 

Natalla kaža, što pradčuvała niadobraje, tamu jašče da druhoj admovy muža zadumvałasia nad tym, kab pajechać naradžać u Arhientynu, kab u dziaciej dakładna byli pašparty, jakija tam vydajucca pa naradžeńni.

«Mianie ŭsie adhavorvali: jakaja Arhientyna, ty ž ciažarnaja, kudy ty praz akijan palaciš. Supakojvali, što prydumajecca niešta. U pačatku vieraśnia 2022-ha Ivanu, akurat, admovili ŭ DNŽ, i ja tady vyrašyła lacieć u Arhientynu. Ale pakul damoviłasia z usimi, užo było nielha: arhanizacyja, jakaja dapamahała z hetym, nie chacieła brać na siabie ryzyku. Na 30-m tydni z dvajniatami — heta ličycca składanym vypadkam», — udakładniaje Natalla.

Kali dzieci naradzilisia, para asensavała, u jakoj jany situacyi: na rukach — tolki paśviedčańni ab naradžeńni, pašpartoŭ niama, DNŽ nie dajuć. U Hruzii dla biełarusaŭ isnuje praviła abnulać svajo znachodžańnie tam kožnyja 365 dzion, pakidajučy krainu, a navat hetaha jany nie mahli b zrabić biez dakumientaŭ na novanarodžanych.

«My pačali šukać varyjanty, što rabić. Samym apošnim dla nas było — palacieć mnie ź nianiaj i małymi ŭ Biełaruś i rabić tam pašparty, pakidajučy Vaniu ŭ Hruzii, bo jamu bolš niebiaśpiečna (z ulikam jaho pracy ŭ orhanach) u minułym, čym mnie. A ja nibyta maci ź niemaŭlatami — mohuć i nie čapać. I kali pačałasia vajna, my bačyli, što šmat jakich dziaciej ukraincaŭ potym vyvozili tolki z dakumientami padarožnikaŭ na rukach, i my padumali, moža, heta i naš varyjant? Napisali ŭ Biełaruski dom u Varšavie i polskamu konsułu ŭ Hruzii. Jon nam praź niejki čas adkazaŭ i dazvoliŭ padavacca na vizy. Ale ź dziećmi… Ich vizy nie było kudy ŭkleić fizična. U našy pašparty? Dyk, moža, heta nie našy dzieci, i my ich prosta skrali — takija mahli ŭźniknuć padazreńni».

Tady na maładzionaŭ vyjšaŭ pres-ataše polskaj ambasady, ź jakim jany abmiarkoŭvali mahčymaje vyrašeńnie situacyi.

«Jašče adzin z varyjantaŭ byŭ — Vania lacić u Polšču, robić tam DNŽ, na asnovie jaho robić dakumient padarožža dla dziaciej, pryvozić jaho ŭ Hruziju, i tady ja z małymi mahu prylacieć. Ale heta zaciahnułasia b na 6-9 miesiacaŭ. Uzvažyŭšy ŭsio, vyrašyli, što pasprabujem zrabić u biełaruskim konsulstvie dzieciam paśviedčańni na viartańnie ŭ Biełaruś i pakažam ich pres-ataše — usio ž jany vyhladajuć amal jak pašpart i, što samaje hałoŭnaje, tam jość kudy ŭkleić vizy», — praciahvaje Natalla.

U vyniku siamja tak i zrabiła.

Paśviedčańnie na viartańnie ŭ Biełaruś. Fota: foursquare.com

Častka treciaja: dopyty ŭ Biełarusi i na miažy Hruzii

«Byŭ ža momant, kali ja ŭžo była ciažarnaja, na trecim-čaćviortym miesiacy, i taksama pajšła ŭ konsulstva. Ja zhubiła pašpart i nie viedała, što rabić. Mnie było vielmi strašna, ale inšaha varyjantu my nie bačyli: ja vyrašyła dla siabie zrabić paśviedčańnie na viartańnie i jechać u Biełaruś, — ahałomšvaje Natalla. — U mianie było adno spadziavańnie — što ciažarnuju čapać nie buduć (u mianie byŭ užo bačny žyvot). Tyja 10 dzion u Biełarusi ja zhadvaju z dryžykami».

Pa prylocie ŭ Minsk u aeraporcie dziaŭčynu adrazu adviali ŭ asobny pakoj i zładzili amal paŭhadzinny dopyt.

«Mianie ŭsiu ŭnutry tresła. Plus paniziŭsia cisk. Jak ja zrazumieła, u pakojčyku sa mnoj byli pamiežniki i kadebešnik. Pytalisia, čamu ja ŭ Hruzii, čym zajmajecca moj muž, ci pracuju ja, kali mnie naradžać, jakija ŭ mianie byli administratyŭki, čamu pryjechała ŭ Biełaruś. Mianie adpuścili, ale ŭsie dni — i dzień padačy na paskoranaje atrymańnie pašpartu, i jaho čakańnie — byli składanyja. Ja žyła to ŭ maci, to ŭ babuli, to ŭ siastry — była ŭ roznych miescach. Časta vychodziła na bałkon — hladzieła, jakija tam mašyny na parkinhu».

Dziaŭčynie pašancavała — jana atrymała pašpart i viarnułasia ŭ Hruziju, ale toj stres jana zapomnić nadoŭha. Jak i Vania, jaki kožnyja paru hadzin źviazvaŭsia z žonkaj, pieražyvajučy i pytajučysia, jak jana tam.

Ilustracyjny zdymak. Fota: «Naša Niva»

Kali vizy va ŭsich členaŭ siamji byli na rukach, jany pačali płanavać pierajezd u Polšču — krainu pieršapačatkova vybrali pa pryčynie samaj zrazumiełaj dla ich pa lehalizacyi ź dziećmi plus mahčymaść atrymać ženieŭskija pašparty. Ale i tut nie abyšłosia biez uskładnieńniaŭ.

«Mnie jakraz treba było zrabić vizaran (visa running — vyjezd za miažu i nazad na karotki čas, kab abnavić termin dazvolenaha znachodžańnia ŭ krainie. — NN), — zhadvaje Natalla. — Z Batumi ja pajechała ŭ Turcyju. Jašče na vyjeździe moj pašpart zabrali na 15 chvilin, ale prapuścili. Na terytoryi Turcyi ja nabyła ŭ Duty Free roznych smačniach i pajšła nazad. Ja ledź zajechała, biez žartaŭ! Turki prapuścili mianie biez pytańniaŭ, a hruziny znoŭ zabrali pašpart i skazali čakać. Sa mnoj stajaŭ adzin chłopiec — rasijanin, jaho taksama nie puskali. Jon skazaŭ, što pierad im dvuch rasijan raźviarnuli. Ja śpiecyjalna ŭziała z saboj paśviedčańni ab naradžeńni dziaciej, kvitki ŭ Polšču — na toj momant my ŭžo kupili ich, heta było prykładna za 12-14 dzion da zapłanavanaha vyletu. Ale jak ža mocna hrukała serca, ja ŭsia była na niervach. My ŭžo ź Ivanam dumali — kali što, to ja viartajusia ŭ Stambuł i adtul palaču ŭ Polšču asobna».

Na hruzinskaj miažy dziaŭčynie zładzili paŭhadzinny dopyt na temu, čamu jana ŭ Hruzii, čym tam zajmajecca, čamu nie ŭ Biełarusi. Jana nahadvała, što ŭ Batumi jaje čakajuć šaścimiesiačnyja dzieci — moža, heta ŭ tym liku dapamahło joj viarnucca da siamji.

Potym było pakavańnie valizak — dźvie vialikija, dźvie maleńkija i dva zaplečniki. Jašče kiłahramaŭ 50 Ivan papiarednie adpraviŭ da Polščy hruzinskaj poštaj. Zhadvaje pra heta asobna, bo ŭ adździaleńni nie znajšłosia karobak ci polietylenavaj plonki i, kab zakrucić u jaje rečy dla adpraŭki, Ivan sam šukaŭ jaje na rynku Batumi.

«Kaniečnie, i ŭ aeraporcie my kapiec jak chvalavalisia. Supracoŭnica Wizz Air doŭha kruciła paśviedčańni dziaciej z uklejenymi tudy vizami, spatrebiŭsia hołas načalstva avijakampanii, kab dazvolić nas zarehistravać na rejs. Pamiežnik ža chvilin 15-20 vyvučaŭ pašpart Vani, što taksama dadało niervaŭ», — raskazvaje Natalla.

«Ja dumaŭ, što jon pakaštuje maju vizu na smak», — paśmichajecca Ivan.

Ilustracyjny zdymak. Fota: «Naša Niva»

Častka čaćviortaja: polski pieryjad i zmahańnie za Ženieŭski pašpart

Jašče da vyletu siamja addalena arandavała ŭ Polščy kvateru i źviazałasia ź inicyjatyvaj «Partyzanka» — tyja dapamahli im ź pierakładčykam, jaki pracavaŭ pry padačy na mižnarodnuju achovu.

— My vyjšli z samalota apošnija i adrazu nakiravalisia da pamiežnikaŭ: skazali, my siamja takaja voś i prosim mižnarodnaj achovy. Heta možna było zrabić i paźniej, bo ŭsie dakumienty ŭ nas byli ŭ paradku, ale my vyrašyli prajści ŭsie pracedury adrazu. Pa vyniku praces padačy z fatahrafavańniem, miedycynskaj pravierkaj, apytańniem zaniaŭ kala vaśmi hadzin, — raskazvaje siamja. — U Polščy nas pryniali jak rodnych na kantraście z Hruzijaj.

Praź dzieviać miesiacaŭ čakańnia siamji pryjšło stanoŭčaje rašeńnie pa dadatkovaj achovie. Ale dadatkova jany marać, kab ich dzieci atrymali ženieŭskija pašparty. 

Natalla i Ivan žartujuć na temu taho, jak adnojčy buduć raskazvać dzieciam toje, što jany pieražyli jašče da naradžeńnia.

«U mianie, zdarajecca, pytajucca, jak my rašylisia na dziaciej u emihracyi, — kaža Natalla. — Kali ja vyzvaliłasia z Akreścina i dajechała da Vani, my sieli razmaŭlać i aboje skazali, što bačym dalejšaje žyćcio ź dziećmi, što my chočam siamju. A dla dziaciej nikoli nie nadydzie «toj samy čas».

Zaŭsiody budzie nie chapać to zarobku, to kvatery, to jašče ty nie pavandravaŭ dastatkova… I jak pakazvaje naš dośvied, usie składanaści mahčyma pieraadoleć i ź dziećmi».

Kamientary8

  • Rodny skłon
    24.06.2024
    > ale jaho pryznali «pahrozaj nacbiaśpieki»

    Bastyjonie, ci vy z rasiejskaj svaje artykuły huhlem pierakładajecie?
  • etot
    24.06.2024
    Biba i Boba,možiet i dalšie ustraivało. Siejčas v robie mientovskoj budiet na strojkie bieton varšavskoj miesiť.
  • Brest
    24.06.2024
    Pavažaju vas. I buduć ščaślivymi vašy dzieci - kali takija mocnyja charaktary ŭ taty i mamy. A da nas u Biełaruś jašče viernieciesia, i karjery zrobicie.

Stała viadoma pra aryšt historyka Ihara Mielnikava3

Stała viadoma pra aryšt historyka Ihara Mielnikava

Usie naviny →
Usie naviny

Pieršyja prablemy biełarusaŭ na Alimpijadzie ŭ Paryžy. Vieślary ŭžo tam, a łodki nie prapuścili 

Topavy amierykanski časopis sprahnazavaŭ, kolki biełarusy zavajujuć miedaloŭ na Alimpijadzie. U rasijan budzie nul

Charys zaručyłasia dastatkovaj padtrymkaj dla vyłučeńnia kandydatam u prezidenty

Pucin zrabiŭ Z-śpievaka Šamana zasłužanym artystam Rasii5

Jeŭrasajuz pačynaje pieramovy pra biaźvizavy režym z Armienijaj3

Biaźvizam u Biełaruś pieršym skarystaŭsia hramadzianin Hiermanii9

Zianon Paźniak vydaŭ čarhovuju knihu19

U čornych busłoŭ u Biełarusi stała vyvodzicca bolš ptušaniat. U čym pryčyna?

Stryžak raskazaŭ, jak zmoh tak pachudzieć8

bolš čytanych navin
bolš łajkanych navin

Stała viadoma pra aryšt historyka Ihara Mielnikava3

Stała viadoma pra aryšt historyka Ihara Mielnikava

Hałoŭnaje
Usie naviny →