Hramadstva1111

Asudzili milicyjanta, jaki ŭ 2020-m danosiŭ na pratestoŭcaŭ. Jon prabivaŭ ludziej pa bazach MUS i pradavaŭ źviestki

Siłavik prasiŭ za heta tysiačy dalaraŭ. «Źviažusia z pacanami i ŭsio daviedajusia — heta ž vahniery, FSBšniki».

Uładzimir Hieleskuł. Skrynšot ź siužeta salihorskaha telebačańnia

Uładzimir Hieleskuł słužyć u MUS z 1998-ha. Da zatrymańnia pracavaŭ u DAI, dasłužyŭsia da pasady kiraŭnika ŭzvoda DPS DAI Salihorskaha rajvykankama i zvańnia majora. Praŭda, u śniežni 2022-ha jaho panizili da inśpiektara.

Akramia dziažurnych intervju dziaržaŭnym miedyja, jon zaśviaciŭsia ŭ bazie danosčykaŭ. U vieraśni 2020-ha jon niekalki razoŭ paviedamiŭ u milicyju pra toje, što na stajancy kala «Vitalura» na vulicy Łyńkova naniesienyja «antypalityčnyja nadpisy» z tekstam «Saša, ty prajhraŭ, sychodź». Pa spravie pačynali kryminalnuju spravu, ale niezrazumieła, čym jana skončyłasia.

A ŭ 2022-m jon zaśviaciŭsia ŭ karupcyjnym skandale. Biznesoviec z proźviščam na R. prahareŭ — daŭ hrošy čałavieku, jaki musiŭ budavać jamu biznes u Irłandyi, a toj źnik. Dla taho, kab jaho adšukać, jon praz pasiarednikaŭ źviarnuŭsia spačatku da niejkich «prabiŭščykaŭ» u Rasii, jakija pieradali jamu źviestki. Ale źviestak było niedastatkova, kab adšukać daŭžnika.

R. raspavioŭ pra heta Hieleskułu. Toj skazaŭ, što jość u jaho čałaviek, jaki moža dapamahčy, ale heta budzie doraha. Čałaviek toj, maŭlaŭ, źviazany z «Vahnieram», Interpołam, MUS i FSB adnačasova. Ale sprava składanaja i darahaja, tamu daviadziecca zapłacić 7 tysiač dalaraŭ.

Paśla hetaha Hieleskuł źvioŭ jaho sa svaim daŭnim znajomym Leanidam Piatrušam, jaki byŭ vinien jamu hrošaj. Toj hraŭ rolu «siłavika z suviaziami». Hieleskuł pasprabavaŭ pašukać pa biełaruskich bazach AIS «Pašpart» i AIS «DAI» čałavieka, jakoha zaprasiŭ R., ale jaho nie isnavała.

Uładzimir nie zdaŭsia, a skazaŭ R., što treba jašče hrošy — 3000 dalaraŭ, bo, maŭlaŭ, pošuk zanadta składany. Paśla atrymańnia 1500 u jakaści zadatku jon znajšoŭ u bazach vizualna čymści padobnaha čałavieka pa proźviščy Śpisak. Źviestki pra jaho, u tym liku i z bazaŭ FSZN, jon pieradaŭ R. Toj pačaŭ sumniavacca, ale vyrašyŭ nie ryzykavać i pieradaŭ Hieleskułu jašče 1000 dalaraŭ.

Ahułam Hieleskuł atrymaŭ ad R. 9500 dalaraŭ. Praŭda, užo ŭ čas śledstva «manitorynhavym mietadam OSINT» vyśvietliłasia, što R. padmanuli pieršapačatkova i infarmacyja, jakuju jamu pieradali «z Rasii», taksama była lipavaj i naležała čałavieku pa proźviščy na S.

Uładzimir Hieleskuł. Fota: starobin.edus.by

Nastupnym razam raźviali ŭžo Hieleskuła — jahonyja kalehi, jakija atrymali źviestki pra toje, što Hieleskuł handluje infarmacyjaj ź milicejskich bazaŭ.

U sakaviku 2023-ha jany paprasili niejkaha K. paznajomicca z Hieleskułam, spasyłajučysia na ahulnaha znajomaha R., i prapanavać jamu znajści ŭładalnika aŭto. Viadoma, jon zhadziŭsia, ale skazaŭ, što heta vielmi składanaja zadača, treba šukać ludziej za miažoj i davać im chabar, tamu cana pytańnia — 7000 dalaraŭ.

«Źviažusia z pacanami i ŭsio daviedajusia. Chłopcy z Rasii, jany sami pracujuć u Interpole, heta ž vahniery, heta ž interpołaŭcy ŭsie, FSBšniki», — kazaŭ jon.

I infarmacyju Hieleskuł sapraŭdy dastaŭ. Jon paprasiŭ Piatrušu praz chreśnika, jaki pracavaŭ u DAI, pahladzieć źviestki pra aŭto, imavierna, kab nie padstaŭlacca samomu. Paśla jon pieradaŭ K. fota i asabistyja źviestki ŭładalnika aŭtamabila. A 7 krasavika 2023-ha jaho zatrymali pry pieradačy zadatku ad K. — 4000 dalaraŭ.

Padobna, što Hieleskuł pradavaŭ źviestki praciahły čas, ale dakazać atrymałasia tolki dva epizody. Pa-pieršaje, miarkujučy pa sudovaj pastanovie, pad jaho daŭno kapali. Pa-druhoje, u śniežni jaho panizili da zvyčajnaha inśpiektara. Načalnik Hieleskuła, Siarhiej Pryma, kazaŭ u sudzie, što suprać jaho pravodzilisia słužbovyja pravierki «ŭ suviazi z adsutnaściu kantrolu nad asabovym składam i nienaležnymi pavodzinami».

Sud nad Hieleskułam skončyŭsia 23 lutaha 2024-ha. Jaho abvinavačvali pa čatyroch artykułach — «Niezakonnyja dziejańni ŭ adnosinach da piersanalnych źviestak» (č. 1 art. 203-1 KK), «Padbuchtorvańnie da dačy chabaru ŭ bujnym pamiery» (č. 1 art. 13, č. 2 art. 431 KK), «Złoŭžyvańnie ŭładaj abo słužbovymi paŭnamoctvami» (č. 2 art. 424 KK) i «Machlarstva» (č. 3 art. 209 KK). Pahražała jamu da šaści hadoŭ turmy.

U vyniku prysud davoli miakki (PDF). Dla Hieleskuła — try z pałovaj hady kałonii sa štrafam u 350 bazavych, pazbaŭleńniem prava być pradstaŭnikom ułady na piać hadoŭ i pazbaŭleńnie zvańnia majora. Jahonaha padzielnika Leanida Piatrušu vinavacili tolki ŭ machlarstvie i niezakonnych dziejańniach da piersanalnych źviestak — atrymaŭ jon try hady i adzin miesiac «chimii» dy 150 bazavych štrafu.

«Naša Niva» — bastyjon biełaruščyny

PADTRYMAĆ

Kamientary11

  • Hańba
    21.06.2024
    [Red. vydalena]
  • ta poniatno:
    21.06.2024
    [Red. vydalena]
  • )
    21.06.2024
    Biźniesmient

Jarmošyna raskazała, kaho dapuściać da ŭdziełu ŭ vybarach-20257

Jarmošyna raskazała, kaho dapuściać da ŭdziełu ŭ vybarach-2025

Usie naviny →
Usie naviny

Urahan źmioŭ kiempinh na Vilii, paviedamlajuć pra zahinułaha3

U Minsku štorm vyryvaŭ drevy i rujnavaŭ rekłamnyja ščyty FOTY i VIDEA15

Pa Biełarusi kocicca niepahadź, mocnyja viatry i zalevy FOTY i VIDEA2

U minčuka skrali rečy, pakul jon kupaŭsia ŭ Cnianskim vadaschoviščy

«Kachańnie ŭsiaho majho žyćcia». Aryna Sabalenka paćvierdziła svaje adnosiny z brazilskim biznesmienam16

«Bunt» z-za rajona, čaŭnaki na paŭzie i los staroha parku. Čym žyvie samy zachodni horad Biełarusi?

Aŭstryjski palitołah sprahnazavaŭ, što pačatku vajny Rasii z NATA moža papiaredničać paŭstańnie palakaŭ u Biełarusi. A čamu nie bunt reptyłoidaŭ?10

«Maje aksesuary prynosiać pośpiech, upeŭnienaść u sabie i hrošy». Śpiavačka Halina Šyškova stała dyzajnierkaj5

«Akazvajecca, i na tym baku jość ludzi». Maci Ivana Padreza ŭsio ž nie vysialajuć6

bolš čytanych navin
bolš łajkanych navin

Jarmošyna raskazała, kaho dapuściać da ŭdziełu ŭ vybarach-20257

Jarmošyna raskazała, kaho dapuściać da ŭdziełu ŭ vybarach-2025

Hałoŭnaje
Usie naviny →