Amierykanski štat zahadaŭ vyviesić u kožnym kłasie 10 biblejskich prykazańniaŭ
Na bačnym miescy i vialikimi litarami.
Łuizijana na poŭdni ZŠA stała pieršym z amierykanskich štataŭ, dzie zakonam zahadana vyviesić u kožnym navučalnym kłasie dziesiać biblijnych prykazańniaŭ — na bačnym miescy i bujnymi litarami, piša Bi-bi-si
Zakon u sieradu padpisaŭ hubiernatar Łuizijany, respublikaniec Džef Łendry. U tekście zakona biblijnyja prykazańni nazvanyja «dakumientam fundamientalnaha značeńnia dla našaha štata i ŭładaŭ krainy».
«Kali vy chočacie pavažać pryncyp viaršenstva zakona, to treba pačynać z taho, chto daŭ pieršapačatkovy zakon, heta značyć z Majsieja», — zajaviŭ hubiernatar pry padpisańni.
Novy zakon nie prosta patrabuje vyviesić u kłasach tekst dziesiaci starazapavietnych zakonaŭ, ale i apisvaje, jak jon pavinien vyhladać: jany pavinny być u centry, nadrukavanyja bujnym, lohka čytanym šryftam, a płakat ź imi pavinien być pamieram nie mienš čym 11 na 14 calaŭ (28 na 35,5 sm).
Akramia taho, tekst Dekałohu pavinien supravadžacca tłumačeńniem z čatyroch abzacaŭ, u jakim havorycca, što biblijnyja zapaviety źjaŭlajucca važnaj častkaj sistemy publičnaj aśviety ŭ ZŠA ŭžo amal try stahodździ.
Pradpisańnie vyviesić dekałoh tyčycca škoł i inšych navučalnych ustanoŭ, što finansujucca štatam Łuizijana, — pryvatnym škołam ułady štata svaju volu naviazvać nie stali.
Takija prajekty zakonaŭ u apošni čas byli ŭniesieny respublikancami jašče ŭ niekalkich štatach, dzie jany znachodziacca va ŭładzie, u tym liku ŭ Techasie, Akłachomie i Jucie.
Amierykanskaja presa miarkuje, što hety zakon asprečać pravaabarončyja arhanizacyi, jakija ličać, što jon supiarečyć pryncypu adździaleńnia carkvy ad dziaržavy, zamacavanamu ŭ pieršaj papraŭcy da Kanstytucyi ZŠA.
U historyi ZŠA ŭžo byli šmatlikija sudovyja ciažby z nahody vyviešvańnia dziesiaci zapavietaŭ u hramadskich ustanovach: škołach, sudach abo palicejskich učastkach.
U 1980 hodzie, naprykład, Viarchoŭny sud admianiŭ zakon štata Kientuki, jaki pradpisvaŭ vyviešvać zapaviety ŭ škołach.
Minimalnaj bolšaściu, piać sudździaŭ suprać čatyroch, sud pastanaviŭ, što heta patrabavańnie nosić vidavočna relihijny charaktar i śviecki zakanadaŭčy orhan nie pavinien vydavać takija zakony.
Viarchoŭny sud, u pryvatnaści, adznačyŭ, što akramia biassprečnych u sučasnym śviecie patrabavańniaŭ «nie zabi» i «nie kradzi», Majsiejevy zapaviety ŭtrymlivajuć i patrabavańni pakłaniacca kankretnamu adzinamu Bohu i, naprykład, vykonvać šabat.
Kamientary