«Časnok, cybula, ahurki, pamidory — usio pad vadoj. Škada pracy!» Viosku ŭ Jelskim rajonie zatapiła
Žarty pra biełaruskuju Vieniecyju i handoły ŭ žycharoŭ vioski Roza Luksiemburh u Jelskim rajonie nie vyklikajuć uśmieški. Pad vadu syšli pryvatnyja aharody i kałhasnaje pole. Płavaje navat mebla ŭ damach. Viaskoŭcy abvinavačvajuć miascovyja ŭłady.
U niekatorych miescach nasielenaha punkta niemahčyma prajści navat u humovych botach. Niekalki videa ź vioski Roza Luksiemburh na Jelščynie vykłaŭ u tyktok błohier, jaki paznačyŭ, što zatapleńnie adbyłosia 13 červienia. Najbolš papularny rolik pačynajecca z taho, jak miascovaja žančyna (aŭtar nazyvaje jaje baba Zina) vielmi emacyjanalna razmaŭlaje z kimści za kadram — mierkavana, z pradstaŭnikom Jelskaha pradpryjemstva mielijaracyjnych sistem.
— Usia respublika budzie viedać, ja razmažu vaš Jelski PMS! — aburajecca žančyna.
Niabačny surazmoŭca sprabuje niaśmieła apraŭdacca:
— Anatoljeŭna, vy dumajecie, adny? Ja ŭčora z 6 ranicy da 9 viečara…
— Što vy tam u kabinietach? I buchhałteryi hrabli dajcie, chaj hrabuć!
Viaskoŭcy z žalem i sumam hladziać na zatoplenyja harody. Taja sama baba Zina sprabuje prajści pa najbolš zatoplenych miescach, ale kaža, što dalej nie pojdzie, bo vady vyšej za kalena.
— Nu a što rabić, što rabić? Usio prapadzie, — bieznadziejna ŭzdychaje žančyna. — Pracy škada, stolki ž ukłali. Časnok, cybula, ahurki, pamidory — usio pad vadoj. Duša balić.
Žančyna dadaje, što kałhasnaje pole — zbožžavyja, kukuruza — taksama zatoplena. U tym, što adbyłosia, miascovyja abvinavačvajuć Jelskaje PMS. U kamientaryjach aŭtar videa tłumačyć, što byli daždžy, abvodnyja kanały zaśmiecilisia, słužby ich nie čyścili i čamuści nie adčyniali šluzy dla taho, kab vada ściakała ŭ raku.
Za dzień rolik nabraŭ bolš za 700 tysiač prahladaŭ.
Hod tamu była padarvanaja Kachoŭskaja HES. Što ciapier adbyvajecca na hetych terytoryjach va Ukrainie i jakaja budučynia ich čakaje?
U domie na Alšeŭskaha ŭ Minsku zatapiła dziesiać kvater — vada liłasia navat z razietak
U zatapleńni darohi ŭ Minskaj vobłaści vinavatyja babry — MNS
U Minskaj vobłaści zatapiła darohu i razmyła abočyny
Kamientary