Za ŭdzieł u akcyjach pratestu asudzili dvuch bratoŭ i žonku adnaho ź ich
U sudzie Savieckaha rajona Minska 17 traŭnia za ŭdzieł u troch akcyjach pratestu pavodle č. 1 art. 342 KK asudzili adrazu troch čałaviek: Alenu Niadbalskuju, Paŭła i Uładzimara Džežoraŭ. Adnamu z bratoŭ vystavili abvinavačvańnie jašče pa adnym epizodzie — jon byŭ pad vartaj da suda. Sudździa Volha Jemieljančanka pryznačyła ŭsim pa try hady «chatniaj chimii», piša «Viasna».
Dvuch bratoŭ Paŭła i Uładzimara Džežoraŭ i žonku adnaho ź ich Alenu Niadbalskuju abvinavacili pavodle č. 1 art. 342 Kryminalnaha kodeksa (aktyŭny ŭdzieł u dziejańniach, jakija hruba parušajuć hramadski paradak). U vinu im pastavili toje, što na troch akcyjach pratestu ŭ 2020 hodzie (adzin z bratoŭ — na čatyroch) błakavali i zastupali šlach transpartnym srodkam.
U prysudzie adznačajecca, što jany pryniali ŭdzieł u akcyjach «z metaj publičnaha vykazvańnia niezakonnymi sposabami svaich hramadska-palityčnych pohladaŭ i pratestu, viadzieńnia destruktyŭnaj dziejnaści, nakiravanaj, u tym liku na abvastreńnie napružanaści ŭ hramadstvie».
Na pracesie ŭsie troje pryznali vinu.
Z materyjałaŭ spravy viadoma, što ich identyfikavali pa videazapisach i fotazdymkach z prajeznaj častcy na akcyjach pratestu. Viadoma, što adrazu zatrymali adnaho z bratoŭ i źmiaścili ŭ IČU na Akreścina. Paśla hetaha siłaviki zacikavilisia jahonym bratam.
U vyniku Volha Jemieljančanka pryznačyła Alenie Niadbalskaj, Paŭłu i Uładzimaru Džežoram pa try hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»).
Alena Niadbalskaja i adzin z bratoŭ Džežoraŭ byli da suda pad zakładam 12 000 rubloŭ. Viadoma, što ŭ žančyny na ŭtrymańni jość małaletnija dzieci.
Adzin z bratoŭ utrymlivaŭsia pad vartaj da suda — paśla ahałošvańnia prysudu jaho vyzvalili ŭ zale suda.
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?13
Kamientary