Kino

U biełaruskim anłajn-kinateatry źjavilisia novyja filmy

Na płatformie VODBLISK źjavilisia novyja filmy — jak ad biełaruskich režysioraŭ, tak i ad dackich. Aryhinalnyja animacyjnyja stužki, dakumientałki pra biełaruskich žančyn i hrenłandskich padletkaŭ — raskazvajem pra navinki płatformy.

Kadr z animacyjnaj stužki «Kali ja byŭ Hienierał»

«Kraj žančyn»

Dakumientalnaja stužka režysiora Alaksieja Pałujana, čyj film «Śmiełaść» u 2022 hodzie patrapiŭ u łonh-list premii «Oskar». Rańniaja praca kiniematahrafista «Kraj žančyn» raspaviadaje pra los čatyroch biełarusak, apošnich žycharak vioski Lubiejki. Jany stracili svaich mužčyn, niekatoryja — dziaciej. U filmie žančyny śpiavajuć pieśni, dzielacca ŭspaminami i ščyra ŭśmichajucca, — usio heta pieryjadyčna źmianiajecca cudoŭnymi viaskovymi krajavidami.

Ź vialikaj piaščotaj, pavahaj i dalikatnaściu režysior praz historyi čatyroch hieraiń razvažaje pra kachańnie, žyćcio i jaho kaniečnaść, a taksama składanyja losy cełaha pakaleńnia. «Žyćcio sałodkaje, ale karotkaje», — vyrazna prykmiačaje prykazkaj adna z pratahanistak «Kraja žančyn» i tym samym padkidvaje dumki dla razvažańnia hledaču. Na siońnia z čatyroch žančyn u žyvych zastałasia tolki adna — Nadzieja Mikałajeŭna Niekraševič.

Prahlad pa-za miežami Biełarusi kaštuje 5$, a na terytoryi Biełarusi biaspłatny.

Film Alaksieja Pałujana «Voziera radaści», darečy, dahetul zastajecca samaj papularnaj stužkaj płatformy VODBLISK.

«Śmiećcievaja hałava» 

Na płatformie źjavilisia čatyry karotkamietražki režysiora-multyplikatara Juryja Siamaški. Juryj pa adukacyi inžynier, a režysury multyplikacyjnaha kino navučyŭsia samastojna. Ale ŭžo paśpieŭ navieści šumu ŭ biełaruskaj kinasupolnaści svaim filmam «Śmiećcievaja hałava», jaki byŭ adznačany tryma premijami «Čyrvony vieras» biełaruskich kinakrytykaŭ, vyjhraŭ biełaruskuju konkursnuju prahramu fiestyvalaŭ Bulbamovie (Polšča, 2022) i Unfiltered cinema (Biełaruś, 2023), a taksama ŭdzielničaŭ u «Paŭnočnym źziańni» (2023). Sioleta kiniematahrafist skončyŭ zdymki svajho pieršaha poŭnaha mietra, ale pakul premjera nie adbyłasia, možna aznajomicca ​​ź jahonaj papiaredniaj tvorčaściu.

Z terytoryi inšych krain arenda adnoj stužki kaštuje 5$, ale možna nabyć pakiet z 4 filmaŭ Juryja Siamaški razam za 12.99$.

Hałoŭny hieroj stužki «Śmiećcievaja hałava» śmiaciar i kinarežysior-pačatkoviec Jura znachodzić u śmiećci butaforskuju hałavu i zabiraje jaje dadomu. U toj ža viečar hałava ažyvaje i prapanuje Jury vykanać luboje jaho žadańnie. 

«Kali ja byŭ Hienierał»

Pa siužecie animacyjnaha filma hienierał pa zahadzie Karalevy adpraŭlajecca ŭ dalokija krai, kab znajści zahadkavuju ptušku, što vyratuje horad. Heta — apošniaja nadzieja pamirajučaha karaleŭstva. 

«Ultrakarotkija historyi» 

Animacyjny film, jaki składajecca z troch sapraŭdy ŭltrakarotkich historyj pra postapakaliptyčnuju budučyniu: «Karova», «Unikalny» i «Drovy».

 

«Baluča nie budzie»

Ujavicie: chłopiec pierajazdžaje ŭ tannuju kvateru, a ŭ jaho pakoi staić niepryjemny pach, — z hetaha pačynajecca stužka, jakaja potym nabyvaje cikavy pavarot. Adnojčy ŭ paštovuju skryniu viartajuć list papiaredniaj žycharki kvatery, dziakujučy čamu chłopiec paznaje šakavalnuju praŭdu…

«Dvojčy kałanizavanaja»

Vypadkovaje znajomstva dackaj režysiorki Lin Ałuna z hrenłandskaj aktyvistkaj Aajiu Piter kala dackaha parka «Civali» pryviało da stvareńnia praniźlivaha filma «Dvojčy kałanizavanaja». U im dakumientalistka raskazvaje historyju svajoj hieraini i jaje baraćby za pryznańnie karennych narodaŭ, a taksama z sučasnym kałanijalizmam i svaimi asabistymi traŭmami.

«Cumu: kudy viaduć mary»

Heta dakumientalny kałaž pra mary i nadziei zumieraŭ z depresiŭnaj pravincyi Hrenłandyi. Dacki režysior Kaśpier Kircnier robić svaich hierojaŭ paŭnavartasnymi suaŭtarami: bolšaja častka filma składajecca z zapisaŭ ź ich smartfonaŭ — enierhičnych, naiŭnych, trahičnych, ale zaŭsiody vielmi ščyrych.

Kali vy šanujecie mahčymaść hladzieć biełaruskaje kino i fiestyvalnyja chity zamiežža, možacie padtrymać kamandu prajekta VODBLISK danatam.

Kamientary

Dar‘ja Łosik vyjšła na svabodu pa pamiłavańni16

Dar‘ja Łosik vyjšła na svabodu pa pamiłavańni

Usie naviny →
Usie naviny

Iłan Mask zajaviŭ, što zhubiŭ syna z-za błakataraŭ pałavoha vyśpiavańnia23

U Franciška Skaryny ŭ Prazie skrali piaro — heta zdaryłasia nie ŭpieršyniu3

Zamiežniki pišuć u sacsietkach, što źbirajucca ŭ Biełaruś pa biaźvizie. A ich uprošvajuć pieradumać11

Paŭła Łatušku vyklikali ŭ polskuju prakuraturu2

Rasijski vajskoviec, jakoha nibyta siońnia ŭzarvali ŭ Maskvie: Ja žyvy, siadžu na pracy

Śpievaka — pastajannaha ŭdzielnika aficyjnych kancertaŭ — buduć sudzić za pratesty1

Siaredni zarobak u červieni vyras na 50 rubloŭ, ale nakolki jon adlustroŭvaje realnuju situacyju?

Dzikavicki: Kamanda «Biełsata» amal nie maje nijakaha ŭpłyvu na situacyju3

Stryžak tłumačyć, čamu suprać pieramovaŭ z łukašenkaŭcami i jakaja jaho prapanova1

bolš čytanych navin
bolš łajkanych navin

Dar‘ja Łosik vyjšła na svabodu pa pamiłavańni16

Dar‘ja Łosik vyjšła na svabodu pa pamiłavańni

Hałoŭnaje
Usie naviny →