Brytaniec sabraŭsia žyć u Biełarusi. Jamu prapanavali lepš skoknuć z vyšyni biez parašuta
U anhłamoŭnaj sacsietcy Reddit źjaviŭsia post brytanca, jaki vyrašyŭ pierajechać u Biełaruś.
Brytaniec, pra jakoha idzie havorka, nie tolki hatovy pierabracca ŭ Biełaruś, ale jašče i źbirajecca pastupić u adzin ź minskich univiersitetaŭ. Voś što jon piša:
«Raniej ja byŭ na adpačynku ŭ šmatlikich padobnych krainach Jeŭropy i davoli dobra viedaju rasijskuju movu. Prosta chacieŭ spytać, ci nie mahli b vy padzialicca paradaj datyčna pražyvańnia i vučoby ŭ Biełarusi, dy prosta pra žyćcio».
Zaklik chłopca sabraŭ 49 kamientaroŭ. Biełaruś — nie samaja papularnaja kraina dla emihracyi, i karystalniki pytalisia ŭ jaho, adkul uźnikła žadańnie siudy pierajechać. Akazałasia, što sam brytaniec nikoli nie byŭ u Biełarusi, ale maje biełaruskija karani, i jaho maci vielmi raić jamu pierajechać siudy.
Chłopiec uśviadomlivaje, što ŭ našaj krainie ciažkaja palityčnaja situacyja. Ale vyhladaje, što jaho heta nie pužaje.
Ale ž bolšaść kamientataraŭ syšlisia ŭ dumcy, što pierabiracca ŭ Biełaruś — sumnieŭnaje rašeńnie. Jany žartujuć nakont paradaŭ pierajechać, jakija chłopiec atrymlivaje ad maci — maŭlaŭ, svajaki žadajuć, kab jon źnik nazaŭsiody. A taksama sprabujuć pieraŭpeŭnić brytanca:
«Ludzi hadami šukajuć mahčymaści, jak adtul vyrvacca, i nikoli nie viartajucca. Niemahčyma žyć poŭnym žyćciom u takoj krainie, jak Biełaruś».
«Paŭnočnaja Kareja — cudoŭnaje miesca, nasamreč vydatnaja kraina i ŭvohule, voś tolki b možna było vyrašyć palityčnyja pytańni».
«Ja brytaniec, naviedvaŭ Biełaruś, Polšču, Łatviju i Estoniju. Nie rekamiendavaŭ by jechać u Biełaruś praź vidavočnyja palityčnyja pryčyny (i praz toje, što miascovaja adukacyja amal nie dapamahaje pabudavać karjeru na Zachadzie).
U zaležnaści ad taho, jaki aśpiekt Biełarusi vas najbolš cikavić, ja b zamiest jaje paraiŭ Polšču (harady i architektura, asabliva padobnyja da Bresta i Hrodna) ci Łatviju abo Estoniju (pryroda). Heta vialiki soram, i ja spadziajusia, što chutka ŭsio źmienicca».
Adzin z karystalnikaŭ uvohule nie strymlivaŭ siabie. Pavodziny maci brytanca jon patłumačyŭ ružovaj nastalhijaj, typovaj dla ludziej va ŭzroście, ale adznačyŭ — nie abaviazkova brać na siabie ryzyku, kab pravieryć, ci adpaviadaje hetaja nastalhija rečaisnaści:
«Kali vam patrebny adrenalin, jość lepšyja sposaby jaho atrymać. Jedźcie ŭ Aŭstraliju i pachadzicie pa siniakolčatych aśminohach, pakaštujcie drenna zhatavanuju rybu fuhu ŭ Japonii, daśledujcie miažu Mjanmy. Chalera, jość navat mahčymaść pasprabavać i skoknuć biez parašuta, kali heta bałamucić vašu fantaziju. Ale vam nie patrebna ŭdzielničać u krušeńni ciahnika na pavolnaj chutkaści, jakoje možna tolki nazirać z usio bolšym pačućciom bieznadziejnaści, bo vynik hetaha ŭžo całkam zrazumieły, i vy prosta nie majecie mahčymaści niešta źmianić».
Nie ŭsie kamientatary, adnak, prajavili stolki ž piesimizmu. Niekatoryja ź ich usio ž dali chłopcu niekalki paradaŭ. Naprykład, jany adznačyli nizkuju jakaść biełaruskaj adukacyi, mahčymyja vyklučeńni — miedycynskija i techničnyja śpiecyjalnaści. Brytancu paraili nie ŭžyvać u Biełarusi rekreacyjnyja narkotyki, bo heta zanadta ryzykoŭna, a kali jon užyvaje ałkahol, viedać mieru. Zatoje varta pakaštavać kvas i chaładnik, a taksama naviedać adno ź biełaruskich leciščaŭ.
Dla žyćcia chłopcu rekamiendujuć adzin ź vialikich haradoŭ: u Minsku vysokaja jakaść žyćcia i ŭniviersitety, a z Hrodna zručna jeździć u Jeŭrasajuz. Kamientatar z admoŭnym rejtynham u -76 taksama paraiŭ brytancu nie leźci va ŭnutranuju biełaruskuju palityku.
Taksama ŭ kamientarach raspačałasia dyskusija pra toje, ci varta raskazvać zamiežniku sumnuju praŭdu pra Biełaruś. Z adnaho boku, mahčyma, što chłopiec paźbiehnie biełaruskich represij, tym bolš što jon maje brytanski pašpart, i nie treba kazać šmat pra toje, jak žyviecca biełarusam, bo heta błaha dla reputacyi krainy. Ź inšaha — jość mierkavańnie, što ryzyka zanadta vialikaja, tamu varta papiaredzić čałavieka: maŭlaŭ, moža akazacca i tak, što jon zhubić u biełaruskaj turmie hady žyćcia i zdaroŭje.
«Naša Niva» — bastyjon biełaruščyny
PADTRYMAĆDźmitryjeŭ prosić viarnuć pasłoŭ u Minsk. «Sankcyi bjuć pa ludziach, a nie pa ŭładzie»39
Dźmitryjeŭ prosić viarnuć pasłoŭ u Minsk. «Sankcyi bjuć pa ludziach, a nie pa ŭładzie»
«Toje, što chtości siadzić za palityku, źjaŭlajecca častkaj piejzažu». Biełaruska, jakaja naviedała radzimu paśla doŭhaha pierapynku, padzialiłasia ŭražańniami99
Kamientary